SAMUEL AKINIU 11 - Sumi Naga CL (Re-edited) Bible (BSI)

David ngo Bathsheba

¹ Tipa mpe tsülü tusho lo, kükamiqo no aghülawu cheke ghuloki lo David no Joab eno pa qemi pa gholo akemi ngo Israelmi kümtsü puwuve. Panongu no Ammonmi leluve no Rabbah khasü luve. Ikemu David ye Jerusalem lo ngoae.

² Ghulo lakhi avelau David no pa zü-a lono ithughi no kükaki kütsüqa lo ala cheche kelo, pa no akütsüqa lono totimi lakhi azü kuchhu aghikeu ithulu; li ye ighono ajukivie.

³ David no totimi tipau ghili iniju wupe. Milakhi no pi, “Hi ye Eliam nonga, Hittimi Uriah nipu Bathsheba ke kumo?”

⁴ David no aghinimi puwu no li saluve, eno pa no li sasü züve. (Tipa tüqhüdo lo li ye mithekumo do taveno ake.) Tishino li ye aki lo idewove.

⁵ Eno li ye mishiuve kehu li no David vilo pi puwu, “Ni ye mishi ayae.”

⁶ Tighenguno David no Joab lau asütsa tsüpuwu, “Hittimi Uriah I lau puwolo.” Eno Joab no David lau Uriah puwove.

⁷ Kughou Uriah no pa lau ighi keno, David no Joab ngo timiqo ye kishi ani, eno aghüshi ye kishi ani keno ighiju.

⁸ Tithiu David no Uriah vilo pi, “O kilo iqi no o pukhu qhuvelo.” Uriah no akükau ki lono ipeve, eno akükau no agho pa tsüpuwu.

⁹ Ikemu Uriah ye akükau ki kulaghi lo pa mpeu qemi gholo züve no pa kilo iqi move.

¹⁰ Kughou panongu no David vilo, “Uriah ye pa kilo iqi move” ipi keno, David no Uriah vilo pi, “No ye aghüzüla lono ighike kumo? Kushiye o ki lo iqi move kea?”

¹¹ Uriah no David vilo pi, “Puloshoqhi bohu eno Israel ngo Judah no aphiki lo ani, eno I mpeu Joab ngo I mpeu qemi ghi aghüshiqa lo aghazü shi ani. Ikeghi ni ye chusho eno I nipu sasü züniye I kilo wuni keshea? No eno o ngulho hi xü anike ni ye hi shimo nani.”

¹² Tithiu David no Uriah vilo pi, “Ishi ghi hila ngovelo, thoghiu no I no o puwuni.” Ikehu Uriah ye tipani eno thoghiu ghi Jerusalem lo ngove.

¹³ David no pa kusü no pa gholono chushope, eno pa pelo shomzüve pe. Avelau pa ye pa mpeu qemiqo gholo iqi pa zü-a lo ihozüni ye wuve, ikemu pa kilo iqi move.

¹⁴ Inaqhe David no Joab lau yesü lakhi yepe Uriah u lono tsüpuwu.

¹⁵ Pa no yesü lo ishi ye, “Aghüshi mta lo Uriah hasülo, eno pa ghiqhi pithive penike pa qhive no ideighive lo.”

¹⁶ Joab no mishighüna khasüpe akehu pa no khileno aghütomi akeno tipa-a lo Uriah qhive.

¹⁷ Mishighüna lo timiqo no Joab sasü aghüshi ipeghi, eno Davidw timi khami ikiqive. Hittimi Uriah ghi thive.

¹⁸ Tithiu Joab no David lau aghüshi ghili kümtsü pi puwu.

¹⁹ Pa no tsaqüi aghinimi piputo, “Kughou nono aghüshi ghili kümtsü akükau vilo piveni keno,

²⁰ tithiu akükau no amloide aye, eno o vilo, ‘Kushiye nongu ye mishighüna kupunu aghü shiniye wu kea? Panongu ye aliwo dolono apiji kapuwu nani pi nongu ye ithimo kea?

²¹ Khuu no Jerubbesheth nu Abimelek pithive kea? Thebez lo topumi lakhi no aliwo lono athi kütsüghütu pesü pa veqhi pithive kekumo keshea? Kushiye nongu ye aliwo kupunu wukea?’ ipi aye, ishi pilo, ‘Hittimi o qeu Uriah ghi thivae.’”

²² Ikehu atsapeu no wu püzü Joab no pa vilo pilo pikeu kümtsü David vilo pive.

²³ Atsapeu huno David vilo pi, “Timiqo no ningu shou adokivi luve no aghüshiqa lo ningu le ighive, ikemu ningu no khagho ikulo kutolo panongu hachilesü wuve.

²⁴ Tile shexilika kipemi no aliwo lono o qemiqo veqhie. Akükau qemi khami ye thivae, eno Hittimi o qeu Uriah ghi thivae.”

²⁵ David no atsapeu vilo pi, “Joab vilo ishi pilo, ‘Hi no o loshipüsü pe kevilo, kughengu azütakikihi ye itehi lakhi eno kutou no lakhiu heqhive cheni. Akumtoshi aphughi mjochile no leluve lo.’ Eno pa shikumto lo.”

²⁶ Kughou Uriah nipu no pa kimi Uriah thivae pi chilu keno, li no li kimi ghenguno mloqa.

²⁷ Eno akumlo do kishekhave kethiu David no pa kilo li saighivepe, eno li ye pa nipu shive no anu lakhi punu. Ikemu David no kiu shive keno tino Ampeu ye Pa loshipüsüve.