SAMUEL AKINIU 10 - Sumi Naga CL (Re-edited) Bible (BSI)

David no Ammon ngo Syria Leluve

¹ Hipa thiu Ammonmi kükau thive, eno pa nu Hanun no pa züqhulo kaluve.

² David no pi, “Papu no I lau amikucho shike toi, I no Nahash nu Hanun lau amikucho shini.” Tighenguno David no pa lopiqi tsüniye pa qemi puwue. David qemi no Ammonmi yeghi lo ighi.

³ Ikemu Ammonmi sakiphemi no panongu mpeu Hanun vilo pi, “David no aloino kütsümi o lau puwuke ghenguno pa ye o pu gihu anie pi no ye kümsü anio? Pa ye ow mishighüna phuju eno ti puju ghi leveni ye pa qemi o lau puwu anike kumo keshea?”

⁴ Tighenguno Hanun no David qemi küghaluve no milakhikhi kichimhi tüxa miyeve tsü eno panongu phimini ayiku lono tsaxüve tsüno puwuve.

⁵ Kughou David vilo hi pi keno, pa no panoqo kusho peniye aghinimi puwu, kughengu panongu ye ighono kujove ke. Akükau no pi, “Nongu kichimhi thuipeghi moke kutolo Jericho lo ngo aghi no tithiuno ideighi lo.”

⁶ Kughou Ammonmi no panongu ye David zülo kumthu kümna shivae pi ithi keno, panongu no Beth-rehob eno Zobah lo Syriami ghüshimi qhethonhe muku, akükau Maacah timi 1,000 eno Tobmi kiptimi qhethonhe chighikini piqeve.

⁷ David no tipau chiluve no Joab ngo aghütomi aqokitikhi puwu.

⁸ Ammonmi no ipeghi no khagho ikulo lo aghü shiniye kutope ngove, Zobah ngo Rehob lo Syriami eno Tobmi ngo Maacahmi no bokütha kühakeu qhalo ngove.

⁹ Kughou Joab no pa züu eno athiu ghi ghüshimi kutope aghikeu ithulu keno, pa no Syriami mjochileni ye Israelmi dolono aghükivimi kishepe qhie.

¹⁰ Achili thaqhü no Ammonmi mjochile peniye pa thiküzüu Abishai zakütsü qholo qhivetsü.

¹¹ Eno pa no pi, “Syriami no I nguno akumtou shive aye, nongu no I kuphulo, ikemu Ammonmi no nongu nguno mtotoive aye, I no ighi no nongu kuphuni.

¹² Amlo mtolo, ningu ye niw timi, ni Lhouw mishighünaqo ghenguno amlo mtoni, Ampeu no kiu akivi keno shipeni.”

¹³ Ikehu Joab ngo timi khunoqo pa gholo akeno panoqo no Syriami sasü aghü shiniye kupunu wu kelo panongu no pa zülono pove.

¹⁴ Kughou Syriami no pocheghi keu Ammonmi no ithulu keno, panongu ghi Abishai zülono posü mishighüna lo ilove. Tithiu Joab no Ammonmi ghüshi lono idesü Jerusalem lo ighive.

¹⁵ Ikemu kughou Syriami no panongu ye Israelmi no leluvae pi ithi keno, panongu no kümtsa kütsüluve.

¹⁶ Eno Hadadezer no Euphrates kukuu no Syriami saighive. Shobak no Hadadezer ghüshimi shou zatsüu shino panongu sasü Helam lo ighive.

¹⁷ David vilo hipau pi kelo pa no Israelmi kümtsü hekütsü kumqo no Jordan khathasü Helam lo ighi. Syriami no David sasü küpüghü niye kithipe ngove no pa mjochile thuve.

¹⁸ Syriami no Israelmi zülono pove, eno David no Syriami khurkulu küsami 700 eno khurshimi qhethonhe lhobidi ghiqhive tsü, eno panow ghüshimi shou zatsüu Shobak ghüzave, pa ye tileno thive.

¹⁹ Kughou Hadadezer qholo kükami akeqo no Israelmi no panongu leluvae pi ithive keno, panongu no Israelmi sasü külashi luve no panongu qholo shive. Ikehu Syriami ye itaghi Ammonmi xaluni ke msave.