SAMUEL AKINIU 1 - Sumi Naga CL (Re-edited) Bible (BSI)

David no Saul Kithi Chilu

¹ Saul thive kethiu David no Amalekmi ghiqhive no ideighi kelo, David ye atsala kini Ziklag lo ngove.

² Atsala aküthüni, julo timi lakhi aphimini süxüve no ayeghi pa kütsü shou epuku no Saul ghazü lono ighi. Kughou pa no David lau ighi keno, pa no ayeghi lo qhoqhü luve no agigihu tsü.

³ David no pa vilo pi, “No ye khilau no ighi ani kea?” Pa no pa vilo pi, “Ni ye Israelmi ghazü lono poka ighi anie.”

⁴ David no pa vilo pi, “Kishive kea? I vilo pijulo.” Pa no khochile, “Timiqo ye aghüshiqa lono pokhave no timi kutomo ikiqi thivae, eno Saul ngo pa nu Jonathan pama ghi thivae.”

⁵ Tithiu David no apumi khuu asütsa peighi keno pa vilo pi, “Kishino no ye Saul eno pa nu Jonathan pama thive keu ithi kea?”

⁶ Apumi asütsa pa vilo pi ighi keu huno pi, “Angukivishi I no Gilboa naghuto lo ighilu kelo tile Saul ye pa ngupa tsüqüpe ngo aghi, eno khurkulu ngo khurkulu küsami no pa kupunu cheghive.

⁷ Kughou pa no pa thiu jupuwo keno, ni ithulu no I ku. I no pa vilo pi, ‘Ni hile ani.’

⁸ Pa no I vilo pi, ‘No ye khuu kea?’ I no pa khochile, ‘Ni ye Amalekmi ke.’

⁹ Pa no I vilo pi, ‘I phivilo puthugho no I heqhive lo, kughengu amloghuju no I tsügha luvae, ikemu I lolo aküxü tuthu ye aphie.’

¹⁰ Ikehu I no pa phivilo puthugho no pa ghiqhive, kughengu pa no ikiqive kethiu, pa ye xülumo nani pi I no mtsüqhei ithive. I no pa kütsü lono akütsükuqho ngo pa umlo lono aküsa ikhiluve no tipaqo I mpeu lau süghi anie.”

¹¹ Tithiu David no pa phimini tsüqü luve no süxüve, eno pa gholo timi akeqo kümtsü no tihutoi shie.

¹² Panongu no Saul, pa nu Jonathan, Ampeu timi eno Israel lagha ghenguno avela kutolo mloqa, anhezü piji kümvü kughengu panongu ye ghüyi lono wove ke.

¹³ David no pa vilo asütsa pi ighi keu apumi vilo pi, “No ye khilau no ighi kea?” Pa no khochile, “Ni ye Amalekmi, kupokichemi nu ke.”

¹⁴ David no pa vilo pi, “Kushiye no ye Ampeu no nukisheve keu shou o u beni keu msa move kea?”

¹⁵ Tithiu David no paw lhothemi lakhi kuno pi, “Wuno pa ghiqhive lo.” Ikehu pa no pa ghiqhi pithive.

¹⁶ Eno David no pa vilo pi, “O ji no o kütsü lo ikuve peniu, kughengu o likhi o kichi no o pimi ghi thopi shivae, eno pi, ‘I no Ampeu no nukishe keu ghiqhivae.’”

Saul ngo Jonathan ghenguno Mloqa

¹⁷ David no akumlo le hipau pesü Saul ngo pa nu Jonathan pama ghenguno mlo,

¹⁸ eno hi ye Judah timiqo shika kepue pi pa no pi; hi ye Jashar Kaku lo yepüani. Pa no pi:

¹⁹ “O Israel, o juküvü ye ow akiqhe-a lono ghiqhivae! Akumtomi ye kishi ikiqive akela!

²⁰ Gath lo hipau pi kevilo, Ashkelon laghila lo hipau asheshu kevilo, tikumo aye Philistiami ilimi no alovi aphighüyiko ghamo kemi no alokivi shilu nosae.

²¹ “Nongu Gilboa naghutoqo, atsüzü momu tsütsüghu nongu shou qipuku pemoniu, aluzaqo pelo akümllagho thi peipeghi pemoniu! Kughengu Saul züto ye thazü no nukepu shimovae, akughushuu züto ye tileno küthakügha shive ake.

²² “Jonathanw shexilika eno Saul zütakikihi ye aghümi kumtomi launo kümsa ideighi mono ache.

²³ “Saul ngo Jonathan, kimiye eno küpü chekeu, aküxü lo eno akithi lo ghi pama ye kütüta shive moe; pama ye alhuqu nguno akümthüu; abongshuuqo nguno akumtoue.

²⁴ “Nongu Israelmi ilimiqo, hughüike phi nongu pipe, ameshoyi tünananu nongu xipipe chekeu Saul ghenguno mloqa lo.

²⁵ “Aghüshiqa lono akughushumi ye kishi ikiqive akelae! “Jonathan ye now akiqhe-a lo ghiqhipe püani.

²⁶ I thiküzüu Jonathan, o ghenguno ni ye ijuime anie; no ye I lau ighono alokepu shie; I lau ow kikimiye ye akighiche, totimiw kikimiye vekiye ke.

²⁷ “Akumtomi ye kishi ikiqiva eno aghünanu ye kishi pühava kela!”