RUTH 4 - Sumi Naga CL (Re-edited) Bible (BSI)

Boaz no Ruth Xachilelu

¹ Tithiu Boaz ye khagho lo iqhove no tile iqave. Eno julo, xachilekuluu khuu ghili Boaz no pi akeno, pa ighive. Ikehu Boaz no pi, “Tsüghü ighilo, aküsau; hile iqalo.” Pa no tsüghü ighi no iqave.

² Eno Boaz no mishighüna lo layemi chighi süghi no pi, “Hile iqalo.” Ikehu panongu no iqave.

³ Tileno pa no xachilekuluu vilo pi, “Naomi, khuu Moab ghakhu lono ide ighive akeno, li no ayeghi ado lakhi jeve anie, ti ye ni laghami Elimelechw ke.

⁴ Ikehu I no o vilo hipau pinie pi kümsülue, ‘Khunoqo hile iqa ani keno panoqo zülono eno Iw timi layemi zülono hipau qhüluve lo.’ Tsala nono xachile luni aye xachile luve. Ikemu nono tishimo aye, I pelo ithi pelo, kughengu o nguno alau kütami ye kühae eno o shelo no ni anie.” Pa no pi, “I no xachile luveni.”

⁵ Ikehu Boaz no pi, “Nono Naomi u lono alu qhülu ke tsalani no kithimi je pesü pa mheghi lono pekishe wonike ghenguno akithiu nipu Moabmi Ruth ghi ow ake.”

⁶ Tileno xachilekuluu no pi, “Ni ye tipau xachilelu moae, tikumo aye I mheghi lo ghi küpünalu nosake. Xachilekulupu chipiu akeu ye nono luvelo, kughengu ni ye ti xachilelu moake.”

⁷ Wovekeu ghuloki lo xachile eno tsüchile kelo hipau khuaye Israel lo acheghi: tsüve eno luve keu xakütha kiqishi, milakhi no pa pukhukuqho xape timi lakhiu tsüve che eno hipau lhoaye ye achipi kepi Israel lo pimheche.

⁸ Ikehu kughou xachilekuluu no Boaz vilo, “O sala shi qhüluve lo,” ipi keno pa ye pa pukhukuqho xave.

⁹ Tileno Boaz no layemi eno timiqo vilo pi, “Nongu no thopimi ake, ishi tsala lono I no Naomi u lono Elimelech, Khilion eno Mahlon noqo mheghi shi akeqo kümtsü qhüluvae.

¹⁰ Eno Moabmi Ruth, Mahlon nipu achimeu ghi I nipu shinike I no qhüluvae, ti ye kithimi je pesü pa mheghi lono pekishe wonike, eno akithiu je ye pa thiküzümi eno pa ghakhumi launo hauve pemo niye ke. Atsala hipau lo nongu no thopimi ake.”

¹¹ Ikehu khagho lo timi akeqo eno layemi kümtsü no pi, “Ningu no thopimi ke. Ampeu pelo totimi khuu o kilo ighi niye ani keno, Rachel ngo Leah pama no Israel kibolomi shiqhe puku ketoi shilu peni. No ye Ephrathah lo ameküapu kümla eno Bethlehem lo akighichemi shipeniu,

¹² eno Ampeu no totimi alhothe hipau vecheo alagha kughuko tsüniye akeu ghenguno o ki ye Perez, khuu Tamar vecheo Judah punu tsü keno titoilu peniu.”

Ruth ngo Boaz pama Külave

¹³ Tishino Boaz no Ruth luve eno li ye pa nipu shive. Pa no li xuju eno AMPEU no li pelo mishi lupe, li no anu lakhi punu.

¹⁴ Ikehu totimiqo no Naomi vilo pi, “AMPEU je sheqhelo, ishi tsala lo Pa ye o qhivemo no o xachileni kemi aghipe ke, pa je ye Israel lo akighiche shipelo!

¹⁵ Pa no o lau aküxü kithe süghi nani, o teasü lo o tuchomjo nani, kughengu o mukishiu khuu o kimiye cheni keno, khuu anu tsüni nguno akughupu keno, li no pa punulu ke.”

¹⁶ Naomi no anu khape luno li lukobo lo beno pa tucho hiju.

¹⁷ Eno asa-aho lo totimiqo no pa je kutsü no pi, “Anu lakhi Naomi lau punuvae.” Panongu no pa je Obed kutsü. Pa ye Jesse papu, David pasü ke.

David Laghaphi

¹⁸ Hipaqo no Perez polo kughukoqo ke: Perez nu Hezron,

¹⁹ Hezron nu Ram, Ram nu Amminadab,

²⁰ Amminadab nu Nahshon, Nahshon nu Salmon,

²¹ Salmon nu Boaz, Boaz nu Obed,

²² Obed nu Jesse, eno Jesse nu no David.