RUTH 3 - Sumi Naga CL (Re-edited) Bible (BSI)

Aniqa lo Ruth ngo Boaz

¹ Tithiu Naomi no Ruth vilo pi, “Ninga, o pelo akivishi apenike ni ye o ghenguno akulhokiqhi phutsü masa anike kumo?

² Boaz, khuu qelimiqo gholo nono mla akeno, pa ye ni bolomi kekumo keshea? Julo, pa ye itiji aniqa lo barley amuu fuleni cheni.

³ Tighenguno azü kuchhuve no o phiau nuvelo, eno aphimini kivi pepusü aniqa lo iqilo, ikemu pa no chusho tave moke kutolo pa pelo ithipe kevilo.

⁴ Eno kughou pa no khile ihozüni keno jukutolo. Tithiu wuno pa phi lhaphe no ihozülo, eno pa no kiu shikepu keno o vilo pi nani.”

⁵ Li no khochile, “Nono pikeu kümtsü I no shini.”

⁶ Ikehu li no aniqa lo iqi no ani no azah tsüke toi shie.

⁷ Eno kughou Boaz no chushove no alopiqilu keno, pa no athi amoqhe püakeu shekhalau wuno iqi ihozüve. Tileno li no agholau no ighi no pa phi lhapheve tsüno ihozüve.

⁸ Zübumta lo pa ye akichiqhive no ide ithughi kelo julo, totimi lakhi pa pukhu philo zü aghie!

⁹ Pa no pi, “No ye khuu kea?” Li no khochile, “Ni ye o qeliu Ruth. O qeliu shou o chishibo xakho tsülo, kughengu no ye xachilekuluu ke.”

¹⁰ Pa no pi, “Ampeu pelo o kümghatsü peniu, ninga. Apumi kinimi na kumlhomi namu nono pape wumo keu hi ye kimiyekini kümla atüghüu nguno ashekhau hipau no akijeu shivae.

¹¹ Itehi ye msa kevilo, ninga. Nono khukeu kümtsü I no o ghenguno shitsüni, kughengu ni ghami kümtsü no no ye ameküa totimi kepi ithi anie.

¹² Iyei, ni ye xachilekuluu ke. Ikemu I nguno punukhoi keu xachilekuluu lakhi aphie.

¹³ Itiji ye ngove lo eno thanau no pa no o xachile luve aye alovae; pa pelo tishivepe. Ikemu pa no o xachileni keu pulomo aye, Ampeu xü anike, I no o xachile luveni. Inaqhe shimoke kutolo züaghive lo.”

¹⁴ Tighenguno li ye inaqhe tomoke kutolo pa pukhu philo züve eno khumu khuu michimla aphi lono ithuve. Eno pa no pi, “Totimi huye aniqa lo ighie pi khuu pelomu ithipe kevilo.”

¹⁵ Pa no pi, “Nono pepu akeu phi süghi no mighelo.” Li no mighe eno pa no barleythi akimghi tsügho mighipe tile sütsü. Tishino li ye mishighüna lo wuve.

¹⁶ Kughou li no ani lau ighi keno, pani no pi, “Kishive kea, ninga?” Ikehu li no timi huno li ghenguno kutotsü keqo kümtsü li vilo pi,

¹⁷ “Barleythi akimghi tsügho hipaqo pa no I tsüe, kughengu pa no I vilo, ‘No ye o ni lau au kümsa idewo kepu kumoe’ ipi.”

¹⁸ Li no khochile, “Avehu kishive nani keno nono ithi moke kutolo khe aghilo, ninga, kughengu timi huye ngomo no ishi no avehu xathave nanie.”