RUTH 2 - Sumi Naga CL (Re-edited) Bible (BSI)

Ruth no Boaz Sholu

¹ Naomi ye li kimi no kibolomi lakhi ache, Elimelech lagha lo akhotomi lakhi, pa je ye Boaz.

² Moabmi Ruth no Naomi vilo pi, “I pelo alu lo wuno khukhumu I kimiye qhiyilu keu thiuno aghipe muxupe ighilu pelo.” Naomi no li vilo pi, “Wulo, ninga.”

³ Ikehu li no wuve eno ghile kuhumi papesü alu lo ghile huae, ikelo li ye Boaz, khuu Elimelech laghami keno pa luza qhalo ighilu.

⁴ Eno julo, Boaz no Bethlehem lono hughi, eno ghile kuhumi vilo pi, “Ampeu no nongu gholo apelo!” Panoqo no khochile, “Ampeu no o kümghatsü peni.”

⁵ Tile Boaz no paw apumi lakhi ghile kuhumi jukükütsüu vilo pi, “Ilimi hupau ye khuno kea?”

⁶ Aqeu khuu ghile kuhumi jukütsü akeno pa no khochile, “Li ye Moab noghalimi, Moab lono Naomi sasü ideighi keu ke.

⁷ Li no pie, ‘Kimiyeno I pelo ghile kuhumi thiuno athi muxulu pelo.’ Ikehu li ye inaqhe itheno hughi no kitila akulho qhilu keu do thono itehi kutolo mla anie.”

⁸ Tile Boaz no Ruth vilo pi, “Inilo, ninga, kütami lulo ghile muxu luniye wukevi momu hipa-a qhive kevilo, ikemu I qelimiqo phivilo shilo.

⁹ Panongu no khile gholu ani keno tilau panoqo pape wulo. Ni ye aqepumiqo pelo o bupe moni keu za ghi tsüve ake kumo? Kughou nono tüghüthiveni keno, aqepumiqo no azühu lo shophe püakeu lo wuno yelo.”

¹⁰ Ikehu li no agi pishiqhope ayeghi lo itsaqive no pa vilo pi, “Ni ye inalimi lakhi keghi kushiye o zülo kikimiye ithulu eno o nhethi lo ijulu kea?”

¹¹ Ikemu Boaz no li khochile, “O kimi thiveke lono nono kiu o ni lau mla ighi keno, eno nono kishi o puaza eno o ghakhu qhive no püzüu nono mtha kemi timiqo lau ighive keno akuchopu I vilo pivae.

¹² Nono kiu mlave akeno Ampeu no lochile peni, eno Israelmi Lhou Ampeu, khuu chishibo qholo nono itshü luniye ighive akeno Pa pelo asaxü kuchopu o tsü peniu!”

¹³ Ikehu li no pi, “O zülo I no kikimiye ithuluvae, I mpeu, kughengu nono I lokughuno tsü eno I no o qelimi kumomu nono ni o qeliu lau kimiyeqhiyi keu tsa pitsü ke.”

¹⁴ Alhe kuchudo lo Boaz no li vilo pi, “Hila ighilo eno asho hami chulo eno o shopa atsaizü lo pütsülo.” Ikehu li no ghile kuhumi phivilo iqave, eno pa no athi ghuve keu li tsüpuwu. Li no aghakiqi shi chuve eno chukhakumo khami qhiluve.

¹⁵ Kughou li no athi muxu niye ithu keno Boaz no pa qepumi ghutu ghi pi, “Li pelo aghi ghope püakeu lonomu lupelo eno li hasü kevilo.

¹⁶ Itaghi hami ye akipiqhe lono li pelo muxulu penike süjophepe qhitsülo eno li lomipi kevilo.”

¹⁷ Ikehu li no avela kutolo alu lo athi luve, eno kiu ithulu keno shesü kelo barleythi akho lakhi toikeu shilu.

¹⁸ Eno li no ti xapusü aki lo ighi. Li no athi süghi keu ani no ithulupe aghakiqi shie, tithiu li no itaghi chukhakumo ghopu chekeu ikhiphepe Naomi tsüe.

¹⁹ Li pani no pi, “No ye khilau athi luwu kea? Eno no ye khile mla akea? Timi khuu no o ju michilu keno mügha peniu.” Ikehu li no ani vilo li no khunoqo gholo mla akeno pi, “I no ishi khuu lulo mla keno pa je ye Boaz ke.”

²⁰ Tileno Naomi no li mukishiu vilo pi, “Ampeu no pa kümghatsü peniu, Pa ye küxümi lau pina kithimi lau pinamu kikimiye kümla qhive mphie!” Naomi no highi li vilo pi, “Timi hu ye ni bolomi kuchou, ni xachilekuluu lakhi ke.”

²¹ Ikelo Moabmi Ruth no pi, “Tinguno alau ghi pa no pi, ‘Ghile huqhi moke kutolo no ye I qepumi phivilo shilo.’”

²² Eno Naomi no li mukishiu Ruth vilo pi, “Ti ye aloe, ninga, kütami lu loye o hakha luvike ghenguno no ye pa qelimiqo gholo wulo.”

²³ Ikehu li no barleythi eno ashothi ghile huqhi moke kutolo Boaz qelimiqo phivilo shino athi lu. Eno li ye ani gholo xü ache.