RUTH 1 - Sumi Naga CL (Re-edited) Bible (BSI)

Naomi ye Chimemi Shive

¹ Xaküthami no ayepe cheke ghuloki lo aghakhu lo püqümiye lakhi ighi, eno Judah lo Bethlehemmi lakhi ye Moab ghakhu lo pa nipu eno pa nu kini sasü wuve.

² Pa je ye Elimelech, pa nipu je no Naomi, eno pa nu pama je no Mahlon ngo Khilion. Panongu ye Judah lo Bethlehem, Ephrathami ke. Panongu ye Moab ghakhu lo wuve no tilau acheuve.

³ Ikemu Naomi kimi Elimelech ye thive eno li ye anu kini sasü chime ache.

⁴ Pama ye Moab limi luve; lakhi nipu je no Orpah eno lakhiu nipu je no Ruth. Panongu ye tilau ampe chighi qhalo ngove,

⁵ ikemu Mahlon ngo Khilion pama gha thive, ikehu atopuu ye li kimi eno anu pama gha kühave no ache.

Ruth no Naomi lau Amikucho shi

⁶ Tileno li no li mukishiu pama sasü Moab ghakhu lono idewo niye kutove, kughengu Ampeu no Paw timiqo xuju no achuqupu tsü anie pi li no Moab luza lono chilue.

⁷ Ikehu li no khile ache keno tilehi no amukishiu pama sasü wuve, eno panongu no Judah yeghi lo idewove niye chesü wuve.

⁸ Ikemu Naomi no li mukishiu pama vilo pi, “Nokujo pütüta shelo apuaza kilo wovelo. Nokujo no thive kemi eno I tucho ighive ketoi Ampeu pelo kimiyeqhiyi nokujo tucho peniu.

⁹ Ampeu no kimiye tsüno nokujo gha pütüta shelo akimi phulu no pa ki lo akulhoqhilu peni!” Tishino li no pama müma kelo pama no ighamku qauve.

¹⁰ Eno pama no li vilo pi, “Moe, nikujo ye o gholono now timi lau idewonie.”

¹¹ Ikemu Naomi no pi, “Idewove lo, ninga nokujo; kushiye nokujo ye I gholo woni kea? Ni ye I tita lo anu aghi no nokujo kimi shilupe kepu keshea?

¹² Nokujo laghi lo idewove lo, ninga nokujo, kughengu ni ye ighono kichimi shivae eno akimi ake ghuloki kumoae. Tsala I no lajupu anie pino itijino akimi auve eno anuli punulu namu,

¹³ nokujo ye panongu no kichimi shimoke kutolo ngokhelu nani kea? Nokujo ye tishi niye külaumo no akepu keshea? Moe, ninga nokujo, kughengu Ampeu no I shou au beve ake nokujo nguno niu no ighono kukhukimji shivae.”

¹⁴ Tileno pama no asütsa süqhe no itaghi qa. Eno Orpah no ani mümave, ikemu Ruth ye li vape luve.

¹⁵ Naomi no pi, “Julo, o nipa ye linow timi eno alhou lau idewovae; o nipa pape idewove lo.”

¹⁶ Ikemu Ruth no khochile, “I vilo o qhive lopi kevi momu o papemo no idewove lopi kevilo. Kughengu nono khile wuni keno ni ghi wuni eno nono khile ngoni keno ni ghi ngoni. Ow timi no Iw timi shiveni eno o Lhou no I Lhou shiveni.

¹⁷ Nono khileno thini keno ni ghi tileno thini eno tileno I shiqho peni. Akithi nguno kütauno nikujo dolo kütüta shivepe aye Ampeu no alaushi I ghime peni.”

¹⁸ Kughou Naomi no li ye tsüikhomo li gholo wuniye anipi ithive keno, li ye kiumu pimove.

Naomi ngo Ruth no Ideighi

¹⁹ Tishino pama no chesü Bethlehem toluve. Kughou pama no Bethlehem lo ighi keno, tile akemi kümtsü no qheghüi pama ju, eno topumiqo no pi, “Hi ye Naomi keshea?”

²⁰ Li no panoqo vilo pi, “Naomi ipi I ku kevilo; Mara ipi kulo, kughengu Akughushuu no kukhukimji shi I peitha ke.

²¹ Ni ye chhitoi wu kemu Ampeu no au kümsa I sachile ighi ani. Ampeu no I mjochile, eno Akughushuu no amhekiqi I shou süghitsü keghi kushiye Naomi ipi I kuni kea?”

²² Naomi ye hitoi shi ideighi eno li mukishiu Moabmi Ruth ghi li gholono Moab ghakhu lono ideighive. Eno pama ye barleythi ghile hukuthu lono Bethlehem lo ighi.