Rommi 9 - Sumi Naga CL (Re-edited) Bible (BSI)

Alhouw Kishekiphe

¹ Ni ye Khristo laumi shino kuchou tsa pi ani—I lolo I pütsa chekeu huno Aghungu Kimthe vecheo I shepe shi anike ni ye miki amoe—

² ike ni ye amloksa kije eno tamomithe iju keu huno I lolo ani.

³ Kughengu shiluke aye ashi lo I thiküzümi eno I laghami ghenguno ni ampi nomu angusüu shive no Khristo sasü ayigheveni cheke.

⁴ Panongu ye Israelmi, eno hi kümtsü panoqo saje shitsüe: Alhou nuli shi saluve keu; ajuküvüpu; puloshoqhi; Ayezah; akümlla; eno pikiqhitsa.

⁵ Alhouw tushokiqhi pekibe ighi keu ye panongu puasüqo ke, eno ashi kiqi lono pini aye, pano kuhu-aghü lono Khristo ighi, Pa ye kümtsü shou Alhou, alhokupuju sheqhe akepue, Amen.

⁶ Ikemu panongu ghenguno Alhou tsa ye adou shiveke kumoe. Kughengu aji lono Israelmi shi aghi kemi kümtsü no Israelmi kekumoe,

⁷ eno Abraham polo kughukomi shi aghi kehu kümtsü no pa tianuli ke kumoe, ikemu “Isaac vecheo ighi kemiu no o polo kughukomi kepi kihini,” ipike.

⁸ Hipau kiqi ye Alhou nuli kepi kihi luni keu ye ajilo kiyighiqo no kumoe, ikemu pikiqhitsa kiqi lono ighi kemiu noke.

⁹ Kughengu pikiqhitsa lo akeu ye hike: “Tokuu hipa ghuloki lo I no ideighini, eno Sarah ye anu ithuluve nani.”

¹⁰ Tilikhi kumono kughou ni sü Isaac vecheo Rebekah no mishipu keno,

¹¹ punu mphi lono keke kivi-küsamu ithimphi lou no—Alhou no kishelu keu kimji ye akümla lono kumono Pa no kulu keu lono kepi ishokibe pewolu peniye—

¹² li vilo ishi pi, “Akichiu no ayitiu qe nani.”

¹³ Ti ye hitoi yepüa keu kiqi lono ke, “Jacob ye I no kimiye, ikemu Esau ye I no mithie.”

¹⁴ Tishi aye ningu ye kiu pini kea? Alhou sheamzü lo achipikumo anio? Kiu gholau nomu kumoe!

¹⁵ Kughengu Pa no Moses vilo pi, “I no khunoqo shou küpükini ani keno panoqo shou küpükini anani, eno I no khunoqo shou amloighi qhiyi cheni keno panoqo shou amloighi qhiyi nani.”

¹⁶ Ikehu hi ye timi kupulo momu timi no müamzü keu lono kumono küpükini akeu Lhou shou ani.

¹⁷ Kughengu Kuchoyesü lo Pharaoh vilo ishi pi püani, “I no o süqhe puku keu ye o launo I küka pephe eno ayeghiqha kümtsü lo I je sheshu peni keu kimji lono ke.”

¹⁸ Hi ghenguno Alhou ye khukhumu Pa no pulo keu lau küpükini tsü cheni, eno khukhumu Pa no pulo keu lono shikümkave cheni.

¹⁹ Nongu khami ye I vilo piluvi, “Kishino Alhou ye itehi ghi timi kipimi phucheni kea? Kughengu khuu no Pa pulou lakha luni kea?”

²⁰ Ikemu o timio, no ye khuue pi Alhou ghechile luni kea? Ayeghi li lakhi ye tipa kiyiqiu vilo, “No ye kushiye hitoi I kughuphe kea?” ipilu nanio?

²¹ Alikiyiqiu ye aghani mqo lakhi pesü ali kütüta, lakhi no akhotopu lo eno lakhiu ye inapügha vehulo peitha kepu, mlapheni keu chipiu kühaveni keshea?

²² Tsala Alhou no Pa loghu eno Pa küka ithi peniye kütsaveni keu shi kuto püakeu, aloghu liqo, lau alaushi ado kushuo kheakulu eno kutuukulu shipüaghi aye kiu pini kea?

²³ Pa no hitoi shikeu ye Pa juküvü kinikülüshi akeu pesü khunoqo Pa no azünatha ghi ajuküvü küsajeni ke kuto püani keno, ti kimiyekini liqo, pelo ithi peniye ke,

²⁴ eno ti ye ningu khunoqo Pa no kuluve akeno, Jewmi dolo likhi kumono Jewkumomiu ghi kümtsü kihisü ani.

²⁵ Ti ye Pa no Hosea vecheo pikeu kiqi lono ke, “Khunoqo Iw timi kumono ache keno I no ‘Iw timi’ ipi kuni, eno I qhuu kumono achekeu vilo I no ‘I qhuu’ ipi kuni.”

²⁶ “A-a khileno, ‘Nongu ye Iw timi kumoe,’ ipi püa keno, tileno panoqo vilo, ‘aküxüpu Lhou nuliqo,’ ipi kunani.”

²⁷ Isaiah no Israelmi ghenguno ishi sheshu püani: “Israelmi kikihi no azüghi lo asaye jehi aghi namu, ghükulumi aghulo likhi xalu nani,

²⁸ kughengu Ampeu no ayeghi lo timi kümtsü shou süpushumo no Paw xakütha be nani.”

²⁹ Eno Isaiah no pichhotsü ketoi, “Aqokitikhi Mpeu no ningu tikughuko qhitsümo keaye, ningu ye Sodom toive aghini che Gomorrah kimihi shiveni cheke.”

Israel Küpülükumo

³⁰ Imaye ningu ye kiu pini kea? Jewkumomi khunono Alhou lau achipikalu kepu phumono ache keno, tipaqo no ithuluvae, ti ye aküpülü vecheo achipikalu keu tsa piani;

³¹ ikemu Israelmi ye Ayezah vecheo achipikalu nani kepi tiu püzüche kelaye Ayezah hughi pape mlave.

³² Kushiye kea? Kughengu panongu no aküpülü vecheo phumono akümla shou pükhübe kehue. Panongu ye apukhu küpsüpu tuqu lono küpxave,

³³ ti ye ishi yepüake toi, “Julo, I no Zion lo apukhu küpsüpu, küpxa kepu tuqu sho püani; ikemu khukhumu Pa pülübe keu ye shikukujo monani.”