Rommi 8 - Sumi Naga CL (Re-edited) Bible (BSI)

Aghungu Küxü

¹ Tighenguno itehi ye khunono Khristo Jisü laumi shive akeno, panoqo ye kileqhive kepu kühavae.

² Kughengu aküxüpu Ghungu yezah huno Khristo Jisü küdau no axine ngo akithi yezah lono nongu kuqhovae.

³ Ashi lhoaye no shikimqepe Ayezah no kiu shimlave keno Alhou no shive tsüae. Axine shipühave tsüniye Pa Nu kuchou pesü axine phimpi kimihi shi puwu keu vecheo Pa no timi lhoaye lo axine jeli kileve tsü,

⁴ tishikeu lono Ayezah lo achipiu-mikucho avehupu shi akeu ye ningu ashi lhoaye kiqi lono kumo püzü Aghungu lono cheche kemi launo shikupu tsüniye ke.

⁵ Kughengu khunono ashi gholau no xücheni keno, pano mlo ye ashi lo thimeqo shou kümsü pukupe acheni, ikemu khunono Aghungu gholau no xücheni keno, pano mlo ye Aghungu küdau kümsü pukupe acheni.

⁶ Ashi küdau amlo tsükeu ye akithipue, ikemu Aghungu küdau amlo tsükeu no aküxüpu eno alokiqipu ke.

⁷ Ashi küdau amlo tsükeu ye Alhou ghümi shivae, kughengu ti ye Alhou Yezah qhoqhü luamoe; kuchou no ti ye qhoqhü lumo nani.

⁸ Khunono ashi lono xücheni keno Alhou lopu shimla nani.

⁹ Tishimu Alhou Ghungu no nongu lolo aghi aye, nonguu ye ashi lono kumono Aghungu lono xücheni. Khukhumu Khristo Ghungu küha keu ye Pa laumi kumoe.

¹⁰ Ikemu Khristo no nongu lolo aghi aye, axine ghenguno ashi phimpi ye thive kepu shimu, nongu no achipikaluve keu vecheo Aghungu no aküxüpu tsü nani.

¹¹ Tsala akithi lono Jisü xüputhu keu Ghungu no nongu lolo aghi aye, Khuu no akithi lono Khristo Jisü xüputhu keno, Pa Ghungu nongu lolo akeu vecheo Pa no nonguw thiveni keu phimpi lo ghi aküxüpu tsü nani.

Amheghi Kiyighimi

¹² Ikehu I thiküzümiqo, ningu ye ashi pulou kumono Alhou lopushi xümasa keu piagha kupumie.

¹³ Kughengu nongu no ashi gholau no xü aye nongu ye thinia, ikemu Aghungu lono xü aye ashi phimpi lo axine kümtsü pithi luve ani kehu nongu ye xü nani.

¹⁴ Khunono Alhou Ghungu pelo saphepe cheni keno kümtsü Alhou nuliqo ke.

¹⁵ Kughengu nongu ye akümsapu lo ideilove peniye aqüaxekishi ghungu ithulu ke kumoe, ikemu Alhou no atianuli shi saluve keu Ghungu ithulu ke, tishikeu lono ningu no “Apuo! Apuo!” ipi ighamku cheni.

¹⁶ Alhou Ghungu ampi no ningu nguagha gholo süküqha no ningu ye Alhou nuli kepi thopi shitsü cheni,

¹⁷ ike anuli ipi aye, Alhou mheghi kiyighimi, eno tsala ningu no Khristo juküvü ghi küsajeni kehu Pa gholo ime küqha aye, ningu ye Khristo gholo amheghi kiyighimi ke.

Ajuküvü Chekeu

¹⁸ Kughengu I no thebei kiqiphelu akeu no itodolo aghime akeqo ye kiu lonomu ningu lau pephe niye akeu juküvü sasü kimhelu kepu kühae.

¹⁹ Kughengu pulhoküsü kümtsü no khekulhoshi Alhou nuliqo pephe niye akeu huqhe ani.

²⁰ Kughengu pulhosü püakeqo ye pütüta kupulo lono kumo püzü Pulhoküsüu kimji lono ame kühave keu shi kihive tsü, ti ye lajupu hipau akeu lono ke:

²¹ Alhou nuliqo pesü ajuküvü eno ililai keu küxü lo kuqhophe keshi itehi pulhoküsü ghi shiküpsapu kütsügha lono kuqhophe luniye ke.

²² Kughengu ningu no ithi anino itehi kutolo pulhoküsü kümtsü no apunu küsü lo toi iju igha akhani.

²³ Pulhoküsü likhi kumoe, ikemu ningu khunoqo Aghungu lo amsüu xathi ani keno, ningu pesü atianuli shi saluve no ni phimpi xachilelu tsü penike khekulhoshi huqhe akelo, ninguu ghi aghime pulho kelau no alouno iju igha acheni.

²⁴ Kughengu ningu ye hipau lajupu lono xalue. Ikemu laju akeu ithuluve aye ti ye lajupu kumovae. Kughengu khuu no pa no ithulu akeu laju cheni kea?

²⁵ Ikemu ningu no ithumla no akeu lajuqhiyi cheghi aye, ningu ye kheakulu shi tipau huqhe acheni.

²⁶ Tihutoi ningu no miqemlei akelo Aghungu no ni kuphutsü cheni. Kughengu ningu ye kishi inikhu kepu keno mthae, ikeghi Aghungu ampi no atsa lono pikhamla keu mlo ghuju ghügha lono ningu ghenguno qhüiniju tsü cheni.

²⁷ Eno Khuu no timi mlo lheju cheni keno Pa no Aghungu kükümsü ye kiu keno ithi ani, kughengu Aghungu no küpülümi ghenguno Alhou pulou lono qhüiniju tsü acheni.

²⁸ Eno nino ithi akeu no Alhou kimiye chekemi khunoqo Pa kimji kupulo kiqi lono kuluve akeno, panongu ghengu ye thokha kümtsü Alhou no akivipu ghenguno mla küqhatsü cheni.

²⁹ Timi khunoqo Alhou no azünatha ghi ithi akeno panongu pelo Pa Nu julho kimihi shiluve peniye Pa no panoqo kishe kütüta shive, tishianguno athiküzümi kutomo gholo Anu pelo amsüu shi peniye ke.

³⁰ Alhou no khunoqo kishe kütüta shi keno Pa no tipaqo ghi kulue; khunoqo kulu keno Pa no achipikalupe; eno khunoqo achipikalupe keno Pa no ajuküvü ghi küsaje ke.

Alhouw Lhokta Kikimiye

³¹ Tishi aye, hipa vehulo ningu ye kiu pini kea? Alhou no ni küdau aghi aye, khuu no ningu mjochile kulupu kea?

³² Pa likhi Pa Nu ghi süchile mono ningu kümtsü ghenguno pephetsü püaghi aye, tipau gholono Pa ye itaghi thime kümtsü pesü kümsa lono ningu tsümoni keshea?

³³ Khuu no Alhouw kishekiphemi shou akipimi tsüluni kea? Khumu kühae, achipikalupe chekeu ye Alhou noe.

³⁴ Khuu no aghimepu lo ikhiphe tsüluni kea? Khumu kühae, Khristo Jisü khuu thive—tinguno alau xüputhuve—eno Alhou u ajeu ngo püzü ningu ghenguno qhüiniju tsü ani keno, Pa ghenguno ke.

³⁵ Khuu no Khristo kikimiye lono ningu küghüxalu nani kea? Aghime kitikhi no keo, kijiküpsa no keo, shikimighi keu no keo, püqümiye no keo, aphikümsa no keo, akümsapu no keo, azütakikihi no kea?

³⁶ Ishi yepüake toi, “Atsala kupuju ningu ye o ghenguno akithipu sholu acheni; ambe ghiqhi niye akeu paphishi ningu kihi acheni.”

³⁷ Moe, Khuu no ningu kimiye cheni keno Pa vecheo ningu ye hi kümtsü lo aghütomi nguno alau tokulupu ani.

³⁸ Kughengu I no mtsüqheilu anike akithi na aküxü namu, kungumi na yepemi namu, itehi akeu thimeqo na ighini keu thimeqo namu, aküka jeli na,

³⁹ ayeghi shou akeu na aqhou akeu namu, pulhoküsü thime kümtsü gholo kiu nomu ni Mpeu Khristo Jisü vecheo Alhouw kikimiye niw shiluve keu launo ningu küghüxave tsümla nani.