Rommi 7 - Sumi Naga CL (Re-edited) Bible (BSI)

Ayezah lono Khaqhiphe

¹ Athiküzümiqo—khunoqo no ayezah ithi ani keno ni ye tipaqo pütsa ani—ayezah no milakhi tsügha luni keu ye pa no xüake tivilo ghengu likhino kepi nongu ye mtha kea?

² Kughengu akibo shive keu totimi lakhi ye li kimi no xüake tivilo pa gholo xünike ayezah no tsügha püani, ikemu li kimi no thive aye, li ye külakupu yezah lono kuqhovae.

³ Titoi, akimi no xü aphi lono li no kütami sasü küghünauve aye, li ye küsalhami ipi kuniae. Ikemu li kimi no thive aye, li ye tipa yezah lono kuqhove akeke kütami sasü küghünauve namu küsalhami kumoae.

⁴ Tihutoi I thiküzümiqo, nonguu ghi Khristo phimpi vecheo Ayezah küdau ye thivae, tishianguno nongu ye Alhou no Khuu akithi lono xüputhu keno, Pa laumi shino Alhou ghenguno axathi pithilu peniye ke.

⁵ Kughengu ningu no ashi lo xüche kelono Ayezah no ningu lolo axine lhoaye xukutho püzü akithipu xathi pithi peniye ningu phiau peitha cheke.

⁶ Ikemu Ayezah khikhi ghuthu lakhi lo ningu tsügha püache keno, ti küdau ye thive keu lono itehi ningu ye Ayezah lono kuqhovae, tishi kehu ningu ye aqau laghi, ti ye yepüakeu Yezah, lono kumo püzü aghola kithe, ti ye Aghungu laghi, lono huthu niye ke.

Ayezah ngo Axine

⁷ Tishi aye, ningu ye kiu pini kea? Ayezah no axine keo? Kiu gholau nomu kumoe! Ikeghi Ayezah ghenguno kumo aye ni ye axine ithimoni cheke. Kughengu Ayezah no, “Nongu ye jumine kevilo” ipimo keaye, ni ye jumine keu ye kiu keno ithimoni cheke.

⁸ Ikemu axine no azakütsü tipau vecheo ado kivi luve no I lolo no jumine keu jeli kümtsü ipeghipe. Kughengu Ayezah sümo kelo axine ye thi ake.

⁹ Ghuthu lakhi lo ni ye Ayezah sümono xüche, ikemu kughou azakütsü ighi keno axine no xüuve eno niu no thive.

¹⁰ Azakütsü khikhi no aküxüpu tsüni keu shi piqhipüa keno, I ghenguu ye akithi shi aghive.

¹¹ Kughengu axine no azakütsü tipau vecheo ado kivi luve püzü I pishiqhive no I pithive.

¹² Ikehu, Ayezah eno azakütsü ye akimthe, achipi eno akivie.

¹³ Imaye, khikhi akivie picheni keno, tino akithi I lau süghive keshea? Kiu gholau nomu kumoe! Ikemu axine no akivi peitha püzü I lolo akithipu kümla shiuve, tishikeu lono axine ye qeti axine kepi ithive peniye eno azakütsü vecheo axine ye kimghi kümlapu shive peniye ke.

¹⁴ Kughengu Ayezah ye anguagha küxü lo ghenguno kepi ningu no ithi ani, ikemu ni ye ashi lo timi axine qüaxe lo jesüve kemi.

¹⁵ Ni ampi ghi I kümla küghütha ithikuthu chemoe. Kughengu I no kiu shinishi cheni keno ni ye ti shichemoe, ikemu I no kiu mithi cheni keno ti shiuve cheni.

¹⁶ Ikehu I no kiu shinishi chemo keno shiuve cheghi aye, Ayezah ye aloe pi ni ghi pulo auvae.

¹⁷ Tighenguno itehi ye niu no kumono axine khikhi I lolo ani keno tino axine kümla shi auvae.

¹⁸ I no ithi anike ashi lhoaye lo ni ye I lolo akivi kiumu kühae. Kughengu, kiu no achipi keno I no shinipi kümsü anamu ni ye shikulupu küka kühave cheni.

¹⁹ Ti ye I no akivi shinishi chekeu shimove eno küsakügha I no shinishi chemo keu shi auve keu lono ke.

²⁰ Tsala I no kiu shinishi chemo keno shiuve cheghi aye, ti ye I no kumono axine I lolo akeu no ke.

²¹ Ikehu I no ithive ake achipiu shinipi ake lono alhoksa no agilo iju ighive chekeu ye aye kütau lakhiu noke.

²² Kughengu I mlo alouno ni ye Alhou Yezah lo I züküvü acheni,

²³ ikemu I phiau lou ye aye lakhiu no I mlo alou akeu Yezah sasü kichighi acheni, eno I phiau lo axine yezah akeu lau I küghape akughu shive cheni.

²⁴ Ni ye kiu toi anguküsapu timi kelae! Khuu no akithi phimpi hipau lono I xaphetsü nani kea?

²⁵ Alhou shikimthi, Ni Mpeu Jisü Khristo vecheo ke! Tishi aye, I mlo alouno ni ampi ye Alhou Yezah qüaxemi ipi acheni, ikemu ashi phimpi lou no ni ye axine yezah qe acheni.