Rommi 6 - Sumi Naga CL (Re-edited) Bible (BSI)

Axine lo Thivae, Alhou lau Xüani

¹ Imaye ningu ye kiu pini kea? Küpükini no pofushi apeni kehu ningu ye axine shikibe akepu kea?

² Kiu gholau nomu kumoe! Ningu khunoqo axine küdau ye thive akeno kishi püzü itaghi tipau lo xüni kea?

³ Ningu khunoqo Khristo Jisü gholo baptiz shisü luve akeno ningu kümtsü Pa kithi lo baptiz shisü luvae pi nongu ye mtha keshea?

⁴ Ikehu akithi lo baptiz shisü luve keu lono ningu ye Pa gholo qhove, tishikeu lono Apu juküvü küka lono Khristo pesü xüputhuve ketoi, ningu ghi aküxü kitheu lo cheche peniye ke.

⁵ Tsala Pa kithi lo hitoi küsajelu keu lono ningu pesü Pa gholo küqhalu püaghi aye, mtsüqheino Paw xüchilekulu lo ghi ningu ye Pa gholo küqhaluve nani.

⁶ Ningu no ithi anino ni lhoaye aqau ye Khristo gholo no yedavae, tishianguno axine phimpi ye kütsave no tithiu ye axine qüaxemi shikithe pemo niye ke.

⁷ Kughengu timi khuu no thive akeno axine lono kuqho phevae.

⁸ Ikehu ningu no Khristo gholono thive aye, Pa gholono itaghi ningu ye xü nani kepi pülü cheni.

⁹ Ningu no ithi anino Khristo ye akithi lono xüputhuve akeke khilemu thi kithemae; akithi ye Pa qhasü lumoae.

¹⁰ Kughengu Pa no thikeu kithi ye ghuthu khavino kümtsü ghenguno axine küdau thive, ikemu Pa no xü akeu küxü ye Alhou lau xü anie.

¹¹ Tihutoi, nongu ampi ghi axine küdau ye thive akemu Khristo Jisü gholono Alhou lau xü anipi kihilo.

¹² Tighenguno axine pelo nonguw thiveni keu phimpi qhasüpe ashi ghakiqipu shini keu gholu auvepe kevilo.

¹³ Nongu phiau pesü axine lo tsüve ghi amikuchokumo ghenguno peitha kevilo, ikemu akithi lono aküxü lo süghive kemi toi Alhou lau nongu küxü ikhiphe tsülo, eno nongu phiau pesü amikucho ghenguno peitha penike tsülo.

¹⁴ Kughengu nongu ye Ayezah qholo kumono küpükini qholou ani keke axine ye nongu qhasüve mo nani.

Amikucho Qüaxemi

¹⁵ Imaye kiu pinia? Ningu ye Ayezah qholo kumono küpükini qholou anipi axine shini keshea? Khilemu kumoe!

¹⁶ Tsala nongu no aghokulu qüaxemi lakhi toi khuana lau nongu mpi ikhiphe tsü aye, nongu ye pa qeu shivae pi mtha keshea? Nongu no khuu gholu ani keno ti ye axine lo sawuve chekeu akithi keo, achipikalu keu lo sawu chekeu aghokulu keno, hiküma dolo lakhi shi aghi nani.

¹⁷ Ikemu Alhou shikimthi akeu ye nongu khunoqo ghuthu lakhi lo axine qüaxemi shi ache keno, itehi ye nonguu no amlo lono ipeghi püzü agholuqhiyi akükütsü tsa nongu lau apasü shi shikave keu ikhiluvae,

¹⁸ eno axine lono kuqhopheve akehu Alhou chipiu qüaxemi shiluvae.

¹⁹ Nonguw vethakulu no mikhelo kehu ni ye tipau gholau no pi anike. Ghuthu lakhi lo nongu no niqhinilai keu eno Ayezah kiphikumo küdau nongu phiau pesü aqüaxemi shi tsükelo tiuno alau Ayezah kiphikumo lo sailove cheke toi, itehi ye nongu phiau shikimthe pe akimthepu lo peithalu kepushi Alhou chipiu qüaxemi shi ikhiphe tsülo.

²⁰ Kughengu kughou nongu no axine qüaxemi shiche keno, nongu ye Alhou mikucho launo agho aghoshi xüche.

²¹ Ikemu itehi thime khipaqo ghenguno nongu no kujo ani keno, tipa ghuloki lo nongu ye thime tipaqo launo kiu ala shilu kea? Kughengu thime tipaqo shekuho ye akithi ke.

²² Ikemu itehi nongu ye axine lono kuqhophe pe Alhou qüaxemi shive akehu nongu küxü ikhiphe pe akimthepu lo tsülu keu huno nongu la ke, eno tipau shekuho ye lhokta küxü.

²³ Kughengu axine jume ye akithi, ikemu Alhouw kümsagho huno ni Mpeu Khristo Jisü küdau no lhokta küxü ke.