Rommi 5 - Sumi Naga CL (Re-edited) Bible (BSI)

Aküpülü Vecheo Külashilu

¹ Tighenguno, ningu ye aküpülü lono achipikaluve akehu, ni Mpeu Jisü Khristo vecheo ningu ye Alhou sasü külashi luvae.

² Pa vecheo ningu ye aküpülü lono Alhouw küpükini khipa shou ningu no itehi puthugho ani keno tighi ithulue, ikehu ningu ye Alhou juküvü küsajeni keu lakuju lo aloviqhiyi acheni.

³ Tinguno alau niw shiluküsa lo ghi ningu ye aloviqhiyi acheni, kughengu nino ithi akeu no shiluküsa huno kheakulu iqiphe cheni,

⁴ eno kheakulu no Alhou lopu süqe iqiphe cheni, titoi Alhou lopu süqe huno lajupu iqiphe cheni,

⁵ eno lajupu hipau ye ni lokümthsüve tsü chemoe, kughengu Aghungu Kimthe ningu lau puwutsü keu huno Alhouw kikimiye pesü ni lolo sütsüke.

⁶ Kughengu ningu no miqemlei akelo ado achipi lono Khristo no küsaküghami ghenguno thive tsüe.

⁷ Khanilo khuana ye kivimi lakhi ghenguno ighümo no aküxü mu tsüluvi—tishimu achipiu shiche kemi ghenguno thive tsüni kemiu ye khumu aghimo nani—

⁸ ikemu Alhou no Paw kikimiye ni ghenguno akeu piye anipi nino axinemi shiaphi lou no Khristo no ni ghenguno thive tsü.

⁹ Ikehu itehi ye Pa ji vecheo ningu ye achipikaluve akeke Pa ye Alhou loghu lono kishita alaushi ni xalu nani kelae!

¹⁰ Kughengu nino Alhou ghümi shi ache kelo thotsü Pa Nu kithi vecheo ni pelo Alhou lau külashilu püaghipe aye, itehi ye nino külashi luve akeke itaghi alaushi Pa küxü vecheo ni xalu nani.

¹¹ Tinguno alau, ni Mpeu Jisü Khristo ghenguno ningu ye Alhou lau külashilu kehu nino Pa vecheo Alhou lau aloviqhiyi acheni.

Adam no Akithi, Khristo no Aküxü

¹² Ikehu, milakhi vecheo ayeghiqha lo axine ighi, tipau lono akithi ighive, eno timi kümtsü no axine shive keke akithi huno kümtsü shou ikughive—

¹³ kughengu axine ye Ayezah tsümphi lou no ayeghiqha lo ache pütsae, ikemu khile Ayezah küha keno axine kihikülai tsü chemoe.

¹⁴ Ikeghi Adam lono Moses kutolo timi khunono Adam xine toi keu kumo namu pimive keno kümtsü shou akithi no qhasüpe aye peche. Adam ye athiu khuu ighi niye akeno Milakhi kumlho shiae.

¹⁵ Ikemu kümsagho ngo akipimi küma ye aphiphi kumoe. Kughengu milakhi kipimi lono timi kutomo no thi püaghi aye, Alhouw küpükini eno Milakhiw kümsagho, ti ye Jisü Khristow küpükini lono tsükeu, huno alaushi timi kutomo ghenguno kupukuno shi ighivae.

¹⁶ Itaghi kümsagho huye timi atüghüu no axine shive keu ghakichile hutoi moe. Kughengu akipimi thiu küghakütha ighi keu ye aghimepu, ikemu akipimi kutomo thiu kümsagho ighi keu huno achipikalu kepu süghi tsüe.

¹⁷ Kughengu timi lakhi kipimi ghenguno akithi no qhasüpe ache aye, tinguno alaushi khunono Timi lakhiu, ti ye Jisü Khristo, vecheo Alhouw küpükini eno achipikalu kepu kümsagho kupukuno shi ithulu keno, pano no aküxüpu lo ayepe nani.

¹⁸ Tighenguno, akipimi lakhi huno timi kümtsü sawo aghimepu lo ikhiphetsü ketoi amikucho kümla lakhi no timi kümtsü khaqhi pheve no aküxüpu tsü cheni.

¹⁹ Kughengu timi lakhiw hekibide ghenguno kutomo pesü axinemi shivepe ketoi Timi lakhiu ghokulu ghenguno kutomo pesü achipikalupe nani.

²⁰ Ayezah ye akipimi kighisheni ke iloghi, ikemu khile axine kighishe keno küpükiniu no alau pofushi kithe,

²¹ ikehu, axine no akithipu lo ayepe ketoi, küpükini no Alhou mikucho vecheo ni Mpeu Jisü Khristo küdau no lhokta küxü tsünike ayepe nani.