Rommi 3 - Sumi Naga CL (Re-edited) Bible (BSI)

Alhou Chipiu-mikucho

¹ Tishi aye, Jewmi pavibei keu kiu ani kea? Momu aphighüyiko kügha lo ame kiu ania?

² Kuchou no pithuni keloye ala kümtsü lono thono, Alhou tsape ye Jewmi lau tsü paghie.

³ Imaye ti pülü move kemi khami yeo? Panow pükhükümla huno Alhouw pükhübekulu kümsa shivetsü nanio?

⁴ Kiu gholau nomu kumoe! Ishi yepüake ketoi, kümtsü no kimkimi shivemu Alhou ye kuchou shi nani, “O shou küghathabe kelo nono tolu, eno o tsapi lono o pesü achipiu shilu peniye ke.”

⁵ Ikemu ni mikuchokumo no Alhou chipiu-mikucho mtsümishei piyelu cheghi aye, ningu ye kiu pinia? Alhou no ni shou aloghu pukuni keu ye achipi kumoe pi nanio? (Ni ye timi gholau no pi anike.)

⁶ Kiu gholau nomu kumoe! Kughengu tishini kelo Alhou ye ayeghiqha shou kishi küghathani kea?

⁷ Ikemu I kimki lono Alhou jekipipu shi Pa chipiu kighishelu aye, kushiye itehimu axinemi toi I pimi aphi kea?

⁸ Eno kushiye, “Akivi ighi penike ningu alhoksa mlani nolo” ipi moni kea?—hi ye timi khami no küthakügha shi ningu no ishi picheni ipi ni shou xube chekeu tsae. Panongu kileqhive keu no achipie.

Khumu Amikucho Kumoe

⁹ Tishi aye kiu pini kea? Ningu Jewmiu pavi anio? Moe, kiu lonomu kumoe. Kughengu ningu no pi ighive ketoi Jewmi ngo Jewkumomi kümtsü axine qholo ani,

¹⁰ ti ye ishi yepüakeu kiqi lonoe: “Khunomu amikucho kumoe, milakhimu kühae;

¹¹ khunomu vethalu chemoe; milakhimu Alhou phu chemoe.

¹² Kümtsü no tsüghüvae; küqhano ame küha khavae; khunomu akivi shimoe, milakhimu kühae.”

¹³ “Pano baxa ye akumoki lhaphe püake toi; panongu no pishiqhi nike pano mili peitha cheni.” “Apighiw tüghü huno pano milibo qholo ani.”

¹⁴ “Pano kichi loye ghukusho ngo khumtsai ke tsa likhi.”

¹⁵ “Aji peleni keu lo pano pukhu ye mthüe;

¹⁶ pano laghi loye shiküpsa ngo aghuju likhi,

¹⁷ eno pano ye külakishi laghi ithi amphie.”

¹⁸ “Pano nhethe lo Alhou sükümsa kühae.”

¹⁹ Ningu no ithive ake Ayezah no kiu pi ani keno ti ye Ayezah qholo akemi vilo pi ani, tishianguno atsa kipipu kühano akichi lakhave tsü, eno ayeghiqha kuchopu Alhou lau kihikülai tsükulupu shiniye ke.

²⁰ Kughengu Ayezah vecheo axine shinikeu ithi keke timi ye khunomu Ayezah pelu keu lono Alhou zülo achipikalu monani.

Aküpülü Vecheo Achipikalu

²¹ Ikemu itehi ye Ayezah sümono Alhou lau achipikalu kepu pephe piyevae, ti ye Ayezah ngo Tungkupu kakuqo lo ghi ashepe shipüani—

²² Jisü Khristo lau aküpülü akeu vecheo pülülu kemi kümtsü Alhou lau achipikalu peniye ke. Ikehu tile kiyeqü keu kühae:

²³ kughengu kümtsü no axine shive no Alhou juküvü lono ikiqive,

²⁴ ikemu Paw küpükini no kümsagho shi Khristo Jisü gholo xachilekulupu akeu vecheo achipikalu peke.

²⁵ Khristo no axine pevekulupu ghakishi shikeu aküpülü lono ikhilu peniye Alhou no Pa pephetsü. Hi ye Alhou chipiu-mikucho piyeni kehue, kughengu Paw kheakulu vecheo Pa no püzüu xineqo juzüve tsüe.

²⁶ Ti ye ishi tiqheli lo ghi Pa chipiu-mikucho piyeni kehue, tishianguno Pa ye achipiu, eno khukhumu Jisü lau aküpülü aghi keu pesü achipiu shi tsüniye ke.

²⁷ Tishi aye, aqheküzapu ye khile ani kea? Ti ye kophevae. Kiu yezah lono? Ayezah pelu keu lono keo? Moe, aküpülü khuaye lonoe.

²⁸ Kughengu ningu no kiqikuto luve ake milakhi ye Ayezah pelu keu nguno khalau aküpülü vecheo likhino achipikalupe chenie.

²⁹ Ikeo Alhou ye Jewmi Lhou likhi kea? Pa ye Jewkumomi Lhou ghi ke kumo? Iyei, Jewkumomiw ghi ke,

³⁰ kughengu Alhou ye lakhi likhi keke—Pa no aphighüyiko ghave kemi lau pano küpülü pesü achipiu shitsü nani, eno aphighüyiko ghamo kemi no aküpülü vecheo achipiu shitsü nani.

³¹ Tishi aye, ningu ye aküpülü hipau pesü Ayezah pishiqhove tsü ani kea? Kiu gholau nomu kumoe! Tike kumo ninguu no Ayezah iqhikumto cheni.