Rommi 2 - Sumi Naga CL (Re-edited) Bible (BSI)

Alhouw Amikucho Küghakütha

¹ Tighenguno O timio, no khuu kütami shou küghathabe cheni keno, no ye ajeku kiumu kühavae. Kughengu no küghaküthau huno panoqo toi shicheni püzü itaghi küghathabe aye, o likhi o peve auvae.

² Khunono hitoi shicheni keno Alhouw küghakütha ye achipi lono pano shou ikughi chenie pi ningu no ithi ani.

³ Imaye, no khuu hikithipu shiche pülaghi kütami shou küghathabe acheni keno, no ye Alhouw küghakütha lono pokalu nani küghashi anio?

⁴ Ikeo no ye Paw ivüilai keu, kutuukulu eno kheakulu kupukuno shi akeu huye xaidekulu lalo o sawu nike ghengunoe pi mthano küthathai ani kea?

⁵ Ikemu o mlo kümka eno kuthovi keu lono no ye aloghu tsala ghenguno, ti ye kughou Alhouw achipiu küghakütha pepheni keno, o sala aloghu pekike ayae.

⁶ Pütüta no mla püaghi keu kiqi lono Alhou no ajume tsü nani;

⁷ khunono kheakulu shi akivi kümla shikeu lono shekiqhe, agigihu, eno thimoni keu küxü phucheni keno, Alhou no lhokta küxü pesü panongu tsü nani;

⁸ ikemu aghükha shi alikhi asala phu eno kuchou gholumo püzü amikuchokumo gholu chekemi ghengu ye aloghu eno axukighide anani.

⁹ Jewmi paghi eno Greekmi ghi, khunono alhoksa mla cheni keno kümtsü ghenguno aghime kitikhi eno kushuküqha anani,

¹⁰ ikemu Jewmi na Greekmi namu akivi mla kemi kümtsü ghenguno shekiqhe, agigihu, eno aloino keu anani.

¹¹ Kughengu Alhou ye agi juchemoe.

Alhouw Küghakütha eno Ayezah

¹² Khunono Ayezah nguno khalau no axine shive akeno Ayezah nguno khalau no pühave nani, eno khunono Ayezah qholono axine shive akeno Ayezah vecheo küghathabe nani.

¹³ Kughengu Alhou zülo ye Ayezah chikulumi no kumono pekupulu kemiu no achipikalu nani.

¹⁴ Jewkumomi khunono Moses Yezah pechemo keghi pano lotsü no hakite keu lono Ayezah lo akeu shini keno, Ayezah huno panow kumo aghi namu pano ghengu ghi ake.

¹⁵ Panow kivi-küsa lotsü no thopi shino Ayezah lo akeu ye pano mlo lo yepüanie pi panongu no piye cheni, eno küqüve kelo akipimi tsü, momu achipiu loye süsholu kepu shicheni,

¹⁶ I no atsakiviu pikülha chekeu kiqilo, kughou Alhou no Khristo Jisü vecheo timiw tuqhou jeli shou küghathabeni keno, tipa tsala lo hitoi shi nani.

¹⁷ Ikemu no ye Jewmi; Ayezah pükhü chekemi; Alhou ithi anie pi aqheküza shi o likhi nou no pi aghi aye;

¹⁸ eno Ayezah lono o qophe püaghi kehu no ye Pa pulou ithi no kiu kiumu akighicheu shichenie pi aghi aye;

¹⁹ momu no ampi no no ye thebei anhethi kighichemi lapiyeu, aküzü lo küami lau aküvü;

²⁰ eno mbomzümi qokipheu, itimi shikükau, Ayezah lo akighithi ngo kuchou ghili akeqo ye o lolo anie pi aghi aye—

²¹ no khuu kütami shika cheni keno, no ye le o likhi o shika chemo kea? Nono püka kevilo pi kütsü cheni püzü le nou ye pükauveni keshea?

²² No khuu shupu-salha kepu kumoe picheni keno, nou no shupu-salhani kea? Nono ajulho jupe aphimqhü cheni püzü le nou no achineki xüpe wuveni keshea?

²³ No Ayezah pükhüpe qheza chekeu huno Ayezah hexa keu lono Alhou gihu move cheni.

²⁴ Ti ye ishi yepüake toie, “Nongu ghenguno Jewkumomi zülo Alhou je küthakügha shi acheni.”

²⁵ Kughengu nono Ayezah gholu cheghi aye aphighüyiko kügha ye ame ani, ikemu nono Ayezah hexa aye o phighüyiko kügha ye ghamoke paphiae.

²⁶ Tishi aye, khuana aphighüyiko ghamo keu no Ayezah lo azah tsü püakeu pelu cheghi aye, pa no ghapüaghi monamu ghaveke paphishi pa kihi nani ke kumo?

²⁷ Ikehu khukhumu aphighüyiko ghamo namu Ayezah pelu cheghi keu huno, no aye papelu no ayiko ghi ghave akemu Ayezah hexa chekeu kileve nani.

²⁸ Kughengu khunomu ashou likhino Jewmi kepi pimlae, tikumo no aphighüyiko kügha ye ashou aphi lo vehuke kumoe.

²⁹ Ikemu Jewmi kuchou ye alou noe, eno aphighüyiko kügha ye Aghungu vecheo amlo lo shikeu thono pimheye lono kumoe. Hitoi kemi ye timi launo kumono Alhou launo shekiqhe ithulu cheni.