Rommi 15 - Sumi Naga CL (Re-edited) Bible (BSI)

Khristow Kichekipiye

¹ Ningu khunoqo no aküpülü lo mtotoi ani keno, ningu ampi pulou kumono miqemlei akeqo no ikiqive kelo xaqhe masa kepu ani.

² Ningu pütüta kisüghümi shiqhe kumtoni ke pa kivipu shi tsüni.

³ Kughengu Khristo ye Pa ampi pulou shimoe, ikemu ishi yepüake toi shike, “O thaigha chekemiw küthakügha tsa huno I shou ikughie.”

⁴ Khaghi ghuloki lono kiu yepe qhive keno ti ye ishi ningu qoputhu niye ke, tishianguno Kuchoyesü lo kheakulu eno shikumtokütsü vecheo ningu pelo lajupu apeniye ke.

⁵ Kheakulu eno shikumtokütsü Lhou no nongu pelo Khristo Jisü gholo xüküqhalu keu vecheo kuloni küghüvüi amlo lakhishi xülu peni,

⁶ tishianguno nongu no asütsa lakhi lono ni Mpeu Jisü Khristo Papu Alhou juküvü shilu peni.

⁷ Ikehu Alhou juküvüpu ghenguno Khristo no nongu ikhilu ketoi nongu lakhino lakhi ikhilu kilelo.

Khristo no Kümtsüw Lajupu

⁸ I no nongu vilo piani ke Khristo ye Alhou mikucho piyeni ye Jewmi qeu shive, tishianguno püzüu apuasüqo lau pikiqhitsa tsükeu ye xüaphi kepi iqhikumto tsüniye ke,

⁹ tishino Jewkumomi pelo Alhouw küpükini ithulu ke ghenguno Pa juküvüpu shi peniye ke. Ti ye ishi yepüa keu kiqi lono, “Ikehu I no Jewkumomi gholono O sheqhe eno O je shipilini.”

¹⁰ Itaghi ishi yepüani, “O Jewkumomi, Paw timi gholono alovilo.”

¹¹ Eno itaghi, “Nongu Jewkumomi kümtsü no Ampeu sheqhelo, ashiaye kümtsü no Pa sheqhelo”

¹² Itaghi Isaiah no pi, “Jesse kuhu-aghü lono ighi nani, shiye shou aye peniye ithu chekeu shou Jewkumomiu no laju nani.”

¹³ Nongu no pülü akeu lo lajupu tsü chekeu Lhou no alokivi eno aloino keu kümtsü pesü nongu shepichhi tsü peni, tishianguno Aghungu Kimthe küka vecheo nongu ye lajupu no qochili apenie.

Jewkumomi Lau Paul Tsape

¹⁴ I thiküzümiqo, ni ampi no nongu ye akivi no chhitoi, akighithi no qochili, eno lakhino lakhi qophelu nanie pi chilu kelo nongu ghenguno aghakiqishi ani.

¹⁵ Ikemu akimji tsa hami loye nongu ghutu kithe ghi ni ye süchile mono mtotoi yevae, kughengu Alhou no küpükini I tsükeu ye

¹⁶ Alhou tsakiviu kümlapu lo achinemi lakhi shi Jewkumomi lau Khristo Jisü tsapeu shi peniye ke, tishianguno panongu ghi Aghungu Kimthe vecheo shikimtheve no akümllagho toi ikhikulupu shi peniye ke.

¹⁷ Tishino Khristo Jisü gholono ni ye Alhou ghenguno I kümlapu lo akijivile lukepu ani.

¹⁸ Kughengu ni ye hipa tsa nguno alau kütau ye pimoae: Jewkumomi pelo aghokulu lo ighilu peniye Khristo no I vecheo mlae, ti ye—atsapi eno akümla,

¹⁹ amchipu eno akümzapu küka, eno Alhou Ghungu küka lono ke—tishi kehu ni ye Jerusalem lono Illyricum qha kutolo homxasü Khristo tsakiviu kümla shikupu luvae,

²⁰ eno hi ghenguno atsakiviu pesü khilehi Khristo je chimla aphi keno tilau pikülhani keu no I kimjie, tikumo aye ni ye kütami no abo qhave keu shou mlapuku lunosa ke.

²¹ Ikemu ishi yepüake toi, “Khuno lau Pa ghili pimphi keno pano no ithulu nani, khunono khilemu chilu mphi keno pano no vethalu nani.”

Rome lo Wunikeu Kukughu

²² Akiqi hipau ghenguno I no nongu lau ighi niye ake lono ghuthu kutomo I vekha ighivae.

²³ Ikemu itehi ni ye hipa cheaxü qhalo ye ashehova, eno ni ghi nongu lau ighinishi kelauno ampe kutomo huqhe ighive akeke,

²⁴ I no Spain lo wucheke lono nongu sasü kujuthukile lunike huqhe aghini, eno ado hami nongu gholo ngove no itaghi I ghüzüla lo wuni kelono nongu kukuphu luni.

²⁵ Ikemu itehi ni ye Jerusalem lo küpülümi lau akukuphu pewu cheni.

²⁶ Kughengu Macedonia eno Achaia kukuhou no Jerusalem lo küpülümi gholo kumlhomi akeqo ghenguno akukuphu hami qhaphetsü ke.

²⁷ Kuchou lo panongu ye tishi kelau kehu amlokiqi shi tsüni keu kümsülue. Kughengu Jewkumomi no Jewmi vecheo aghungulo kükümgha küsajelu püaghi aye, itehi Jewmi no avehupu shi akelo panongu ghi tinhemgha jeli pesü kümghatsü kepue.

²⁸ Ikehu kughou I no hipa ghini shiveni eno qhaphetsü keu pewo Jerusalem lo tsüveni keno, ni ye nongu kila küdau no Spain lo wuveni.

²⁹ Kughou I no nongu lau ighini keno ni ye Khristow kükümgha nibonilei shi nongu sasü küsajelu nani kepi ithi ani.

³⁰ Athiküzümiqo, ni Mpeu Jisü Khristo eno Aghungu kikimiye vecheo I no hakite ani: I no aghimeküsa shi akelo nongu kighini lono I züqhushi Alhou lau khu tsülo;

³¹ tishikeu lono Judea lo pülümokemi launo I xaphelu, eno Jerusalem lo I kümlapu ye küpülümi zülo ikhikulupu shi peni,

³² tishianguno I pelo Alhou pulou lono alokivi shi nongu lau ighilu eno nongu gholono aghüthi püxülu penie.

³³ Aloinokeu Lhou no nongu kümtsü gholo apeniu, Amen.