Rommi 14 - Sumi Naga CL (Re-edited) Bible (BSI)

Kütami Shou Küghathabe Kevilo

¹ Khuu no aküpülü lo miqemlei ani keno alokivishi ikhiluni thono akükümsü kiyeqü ke ghenguno mto kevilo.

² Milakhi no pa ye kiu kiumu chulu nanie pi pülü aghiluvi, ikemu lakhiu miqemlei keu ye ayetsüni likhi chucheghi luvike.

³ Khuu no chucheni keno pa ye chuchemo keu jukünatha moni, eno khuu no chuchemo keno pa ye chuche keu jukünatha moni, kughengu Alhou no pa ikhiluve ake.

⁴ No ye khuue pi kütami qeu shou küghathabeni kea? Pa no achipishi aghina monamu pa mpeu likhino pi nani. Eno pa ye Ampeu no kuphutsü keu lono puthugholu nani.

⁵ Khuana ye atsala lakhiu no kütau tsala nguno akhotou shi cheni, eno milakhiu ye atsala kümtsü akhotoshi cheni. Ikehu pütüta mlo lono mtotoi kümsüpu luvelo.

⁶ Khuu no atsala lakhi hu pini cheni keno Ampeu gigihu lono pini cheni. Thokha chuche keu ghi Alhou lau shikimthi tsücheni keke Ampeu gigihu lono chucheni, eno chuchemo keu ghi Alhou shikimthi püzü Ampeu gigihu lono chuchemoe.

⁷ Ningu khumu pütüta ghengu likhino xüchemo, momu pütüta ghenguno thive chemoe.

⁸ Kughengu ningu no xü aye Ampeu ghenguno xümasa, eno thive aye Ampeu laumi shi thi masae. Ikehu ningu ye xüna thive namu Ampeuw ke.

⁹ Hi ghenguno Khristo ye thive no xüchile luve, tishianguno Pa no kithimi ngo küxümi shou ghi Ampeu shiniye ke.

¹⁰ Kushiye o thiküzümi shou küghathabe cheni kea? Momu no ye kushiye o thiküzümi jukünatha cheni kea? Kughengu ningu ye kümtsü Alhouw küghakütha lakhü zülo puthughoni aphie;

¹¹ kughengu ishi yepüani, “Ampeu no pi, Ni xüküau zülo kümtsü no qhoqhünhe nani, eno ashiaye kümtsü no Alhou sheqhe nani.”

¹² Tishi aye, ningu kümtsü pütüta müzülo kihikülai pe Alhou tsü masa nani.

Kütami Küpxa Kevilo

¹³ Tighenguno, itehi ye ningu lakhino lakhi shou küghathabe moveni nolo, eno athiküzümi la lo küpxalu momu kütüsülu kepu kiumu qhitsümoni.

¹⁴ I no Ampeu Jisü laumi shino ithitoi luve ake kiumu pakutoshi no mithemo keu ye kumoe, ikemu khuana no mithekumo kepi kümsüve aye pa ghenguno ti ye mithe movae.

¹⁵ Kughengu nono kiuala chukeu lono o thiküzümi mlo kütakihive tsü aye, no ye kikimiye lono cheche movae. Nono chuche keu huno khumu kütsave kevilo, kughengu Khristo ye pa ghenguno thive ke.

¹⁶ Tighenguno nono kiu pesü akivie picheni keno ti ye kütami zülo tichetighepu shivepe kevilo.

¹⁷ Kughengu Alhou yekipe ye chuqu-kusho vehuke kumoe, ikemu Aghungu Kimthe no tsükeu achipiu-mikucho, külakishi eno aloviqhiyi keu ke.

¹⁸ Ikehu khunono hitoi Khristo qeni keno Alhou zülo ikhikulupu eno timi mlokiqipu shilu ani.

¹⁹ Tishi aye kiu lono külashilu eno shiqhe kilelu cheni keno ningu no hajuni nolo.

²⁰ Achuqupu ghenguno Alhou kümla kütsave kevilo. Kuchou loye thime kümtsü mqhamqhiyi ke, ikemu milakhi no chukeu lono khuana küpxalu keu huno achipikumo ke.

²¹ Ashi na aji namu momu kiu kiumu o thiküzümi no küpxa luve kepu thime ye chusho move keu pavie.

²² Nono Alhou lau aküpülü achekeu ye Alhou ngo nokujo dolo qhilo. Timi khuu no pa ampi shou küghatha bemo kepushi achipi lono mlaithani keno akümghapue.

²³ Ikemu khukhumu lipi ghi chusho keu ye aküpülü lono kumove akehu Alhou zülo pimivae. Kughengu kiu kiumu aküpülü shou bepemo keu ye axine ke.