Rommi 13 - Sumi Naga CL (Re-edited) Bible (BSI)

Yepemi Qhoqhülo

¹ Timi kümtsü no yepemi qhoqhülo. Kughengu Alhou launo kumo aye khunomu kükagha kühae, eno itehi akeqo ye kümtsü Alhou no süsüe.

² Tighenguno khuu no yepemi mjochileni keno Alhou no kiu puthu phetsü keno mjochile ani, eno ti ye Alhouw küghakütha pa shou ikughi kepu mla ayae.

³ Kughengu yepemi ye aghili-aye vimo kemi thono kivimi lau ye kiumu shikümsalu kepu kühae. No ye yepeu msa moni shi anima? Tishi aye, kiu no akivi keno ti shilo, eno pa no akishe o tsü nani,

⁴ kughengu pa ye o kivipu shitsüni ye Alhou ghinimi lakhi ke. Ikemu nono akumou shive aye msa kepu ani, kughengu pa ye adou loye azütakikihi pemo nani. Pa ye Alhou ghinimi kehu alhoksa kümlami shou Alhou loghu süghi cheni.

⁵ Tighenguno Alhou loghu lono poveni keu ghengu likhino kumo püzü pütüta mlo lono akipimi shimo kepushi kümtsü no yepemi qhoqhü masae.

⁶ Hi ghenguno nongu no zame ghi tsü cheni, kughengu yepemi ye hikithipu jukütsü chekemi Alhou ghinimi ke.

⁷ Panoqo lau kiu tsü kepushi ani keno kümtsü tsülo: khuno lau zame, momu süqhasüli tsü kepushi ani keno tsülo, sükümsa eno agigihu pesü khuno tsüküzü keno tsü ishilo.

Kikimiye lono Ayezah Shikupu

⁸ Lakhino lakhi kimiye kile keu pi-agha kumo aye khuu laumu api pu kevilo, khuu no kütami kimiyelu cheni keno Ayezah shikupu luvae.

⁹ Kughengu Azakütsü, “No ye shupu-salha moni, No ye ghiqhi moni, No ye püka moni, No ye alamine moni,” eno kütau kiu kiu Zakütsü pinamu, kümtsü xuküqhape hipa tsalo pipuku püani: “No ye o likhi o toi o kisüghüu kimiyelo.”

¹⁰ Kikimiye ye akisüghümi lau alhoksa mla chemoe; tighenguno kikimiye ye Ayezah shikupukulu ke.

¹¹ Hinguno alau nongu no ado-ghuloki ithi anino itehi nongu ye züida thughive kepu do ighivae. Kughengu xakulupu ye püzüu ningu no atüghü lo pülülu kelo nguno itehiu no kupunukhoi ighivae.

¹² Tsüküzü ye wove chea; tsüküvü ipecheae. Ikehu ningu aküzü lo kümlaqo peve no aküvü lo ghünanu pepuni nolo.

¹³ Ningu aküvü lo kichemi toi tsaqütsalei checheni thono ashi ghapiqi ghi shomzü moni, shupu-salha eno ghaghu-ghale shimoni, momu mtomshu eno anheshu moni nolo.

¹⁴ Ikemu Ampeu Jisü Khristo lhoaye pepuni, eno khilemu ashi ghakiqipu shinike mineqhiyi keu jeli lo amlo tsümoni.