Rommi 12 - Sumi Naga CL (Re-edited) Bible (BSI)

Aküxüpu Kümllagho

¹ Tighenguno athiküzümiqo, Alhouw kimiyekini vecheo I no nongu hakite ani, nongu phimpi pesü aküxüpu kümllagho shi Alhou lau akimthe eno ikhikulupu shi tsülo, hi no nonguw aghungulo kümlla kuchou ke.

² Hipa yeghi xüghola sasü kimshive kevi, ikemu nongu kükümsü püxü kithelu keu vecheo aküxü pekili lulo, tishianguno nongu no chhejuke lono kiu no Alhou lopu, kiu no akivi, ikhikulupu eno kupukülai keno kimchilu nani.

Küpükini Gho

³ Kughengu Alhouw küpükini I tsükeu vecheo I no nongu lakhikhi vilo pi anike khumu aqü kiyeve ghi ampi pesü qhemghai kümsü kepu kumoe, ikemu tsükhüi shino Alhou no pütüta küpülü qhemi lono akümlapu piche keu vethalu kepue.

⁴ Kughengu aphimpi lakhi lo aphiau jeli kutomo ani kemu akümlapu no aphiphi kumo ketoi,

⁵ ningu ghi kutomo shi anamu Khristo küdau no aphimpi lakhi shiluve akehu pütüta müzülo lakhino lakhi sasü kütshükime luvae.

⁶ Alhouw küpükini ningu tsükeu vecheo agho jeli kütüta ningu no ithuluve akehu tipaqo peithani nolo: tsala tungkuptsa shi aghi aye, ningu küpülü gholo kimshilu ghi pi masa;

⁷ hukuthu kümla shi aghi aye, huthu masa; khuu no shika cheni keno, shiküka gho peitha masa;

⁸ khuu no hakite eno shikumtolu cheni keno, tipau peitha masa; khuu no tsü-jekini mlo ani keno, amlo qhaqhilei shino tsülu masa; khuu no saphekulupu kükagha ani keno, aghüiloqhiyi mla masa; khuu no kimiyekini kümla shicheni keno, aloviqhiyi shimasa.

Kuchou Khristomi Michipu

⁹ Kikimiye ye mtsümishei shilo. Alhoksa mithilo, eno kiu no akivi keno tsüqülu lo.

¹⁰ Akibolomi dolo kimiye kile ketoi lakhino lakhi ivükile lo. Gihukileni keu lo nongu paghino alomsü lo.

¹¹ Akipichi shi kevino aghüthi püxülo, anguagha xüthilei shino Ampeu qelo.

¹² Lajupu küdau juno alovilo, aghime lo kheakulu shilo, akighini lo pükhükulupu shilo.

¹³ Küpülümi vehupu lo qhasü tsülo eno pütüta ki lo shoinami sasükinimi shilo.

¹⁴ Khunono nongu pishipujuni keno pano kümgha tsüni thono ghusho kevilo.

¹⁵ Khunono alovi aghini keno, pano gholo alovi küqhalo, eno mloqa aghi kemi gholo mloqa küqhalo.

¹⁶ Lakhino lakhi sasü kuloni küghüvüi xülo. Tsütsüngoju kevilo, ikemu timi no kihimo kemi sasü kuloji lo. Khilemu o likhi nou no alokütsüu shiuve kevilo.

¹⁷ Alhoksa shike ghenguno alhoksa pesü tsüchile kevilo, ikemu kiu no aqha zülo agigihupu keno tishini keu kümsü lo.

¹⁸ Toluke thaqhü, o müzülou ye timi kümtsü sasü külakishi lono xülo.

¹⁹ Kimiye chekemiqo, khilemu nonguu no amkhü luve kevilo, ikemu ti ye Alhou loghu lau picheve tsülo, kughengu hitoi yepüani, “Amkhükulu ye Iw ke, I no tsüchile nani ipi Ampeu no pi.”

²⁰ Tipa züqhulo, “o ghümi no müzüthi aghi aye pa loji lo; pa no tüghüthi aghi aye kiuala yekepu tsülo; kughengu nono tishikeu huno ami kuchughei keu hipe pa kütsü lo pukutsü keshi nani.”

²¹ Alhoksa no nongu theqhivepe kevilo ikemu akivi pesü alhoksa theqhilo.