Rommi 1 - Sumi Naga CL (Re-edited) Bible (BSI)

Pethakütsü

¹ Paul, Khristo Jisü qüaxeu, apostolmi shi peniye kulu, eno Alhou tsakiviu ghenguno kishe kütüta shive keu no ye ani.

² Atsape ti ye Pa no khaghi no Paw tungkupmi vecheo Kuchoyesü lono piqhi püakeu,

³ Pa Nu, khuu timi lhoaye gholau no pini aye David polo kughukomi

⁴ kemu Pa lolo akimthe nguagha akeu kiqilou ye Pa no akithi lono xüthughive keu vecheo aküka lo akeu Alhou Nu shi penike shuphetsü keno, ni Mpeu Jisü Khristo ghili huke.

⁵ Pa vecheo ningu no küpükini eno apostol kümlapu ithulu keu ye Pa je lono shiye kümtsü sasü aküpülü ghokulu lo ighi niye ke,

⁶ ti ye nongu khunoqo Jisü Khristo laumi shi peniye kuluve akeno kümtsü kihi küqha anie.

⁷ Rome lo khunoqo Alhou no qhuivü keu lono akimtheshi xü peniye kulu keno: ni Pu Alhou eno Ampeu Jisü Khristo launo ighi keu küpükini eno aloinokütsü nongu gholo alo.

Rome lo Wunishi Kümsü

⁸ Atüghüshi, nongu kümtsü ghenguno I no Jisü Khristo vecheo I Pu Alhou shikimthi ani, kughengu ayeghiqha kümtsü lo nongu küpülü ghili kügha anike.

⁹ Kughengu I nguagha kümtsü pesü Anu tsakiviu sheshu keu vecheo Alhou khuu I no huthu acheni keno, Pa no Iw thopike ni ye tamono nongu jeku

¹⁰ alhokuthu lo inikhu acheni, eno kishila shino ashekhalau nomu Alhou pulou lono nongu lau ighilu penike ni ye ado kivi khu acheni ke.

¹¹ Kughengu ni ye nongu ithuluni shikütü acheni, tishianguno I no aghungulo gho hami pesü nongu lau küsaje no shikumto tsüniye ke—

¹² tishino ningu ye lakhi no lakhi küpülü vecheo shikumto kileluni kehue.

¹³ Aküsamiqo, nongu pelo mthano apeni shimoye pi ani, ni ye ghuthu kutomo nongu lau eno Jewkumomi lau ghi ighi no nongu gholo ghile hunike kughu ighivae (ikemu ishi kutolo lakhave ke likhie).

¹⁴ Ni ye Greekmi ngo ayekümthami lau, ithishe kemi ngo mbomzümi lau ghi api xapu anie.

¹⁵ Tighenguno nongu khunoqo Rom lo ani keno ni ye atsakiviu pesü nongu lau ghi pikülhani ke khekulhoshi anie.

Aküpülü lono Xü nani

¹⁶ Ikehu ni ye atsakiviu ghenguno kujove chemoe, kughengu ti ye pülülu kemi kümtsü, atüghüshi Jewmi eno tithiu no Greekmi ghi, xalu nike ghenguno Alhou küka ke.

¹⁷ Kughengu ishi yepüake toi, “Amikuchomi ye aküpülü lono xülu nani,” atsakiviu lo ghi Alhou mikucho ye aküpülü lono huthu eno aküpülü lono kishekha keu pephe piye ani.

Amikuchokumomi Shou Aloghu

¹⁸ Kughengu Alhou kümthami ngo amikuchokumomi khunono pano mikuchokumo lono kuchou qhasüpe acheni keno, kümtsü shou Alhou loghu ikughini ke kungugha lono pephe piyevae.

¹⁹ Kughengu Alhou ghili kiu ithi kepu ani keno Pa no panoqo piyeve akehu ti ye panongu zülo thoqhalei ani.

²⁰ Kughengu ayeghiqha lhoke lono Alhouw ithukümla lho, ti ye Paw lhokta küka eno akimthe lhoaye, huye pulhosü keu thimeqo lono mtsümishei ithikuthulu ighivae. Ikehu panongu ye ajeku kiumu kühavae.

²¹ Kughengu panongu no Alhou ithi anamu Pa ye Alhou kepi agigihu momu shikimthi tsümove, tike kumono pano kükümsü ye ame kühave, eno pano mbomzü mlo huno zümoi kitheve.

²² Alokütsümie pi pükha ghi panongu ye mbomzümi ilhouve,

²³ eno thimoni keu Lhou juküvü theli lo thiveni keu timi, ashi-aghau, momu itikiche lhoxü julho kimihiqou sasü küsükilive.

²⁴ Tighenguno panongu no pano dolo aphimpi ghi gihumo no niqhinilai keu kümla shinike mineqhiyi ache ketoi Alhou no panoqo ikhiphepe tsüve,

²⁵ ti ye panongu no Alhouw kuchou vehu pesü akimki sasü küsükilive, eno Pulhoküsüu, khuu pülhapuju lo sheqhe aküzüpu keno, iyei, tishi pelo, Pa züqhulo pulhoküsü thime mlla eno huthu auve keu lono ke.

²⁶ Hi ghenguno Alhou no panoqo pelo ashilo ghakiqipu shi auve penike ikhiphepe tsüve. Totimiqo no alhoaye lo aphimpi peitha chekeu theli lo alhoaye kumomithe keu sasü küsükilive,

²⁷ titoi kiptimiqo ghi alhoaye lo totimi sasü ashiaji küqha chekeu ye qhive no pitipüza lakhino lakhi ghapiqi kileni keu no chhitoive, kiptimi no kiptimi sasü akukujopu kümla shiuveke lono pütüta jume panongu no aghime ithulu püani.

²⁸ Panongu no Alhouw kuchou ghili ithini keu pulomo keke panongu pelo shimo kepu shiauve peniye Alhou no shiküpsapu pe pano kükümsü shipuqove tsü.

²⁹ Ikehu panongu ye achipikumo, kixikila, akughuvu, aghichikupo, lhoaye no chhitoi ani. Pano lolo anhekushu, ghikiqhi, kuqhu-kidikumo, pishikiqhi, kütami lau alhoksa shini keu likhi ke. Panongu ye timi xikishimi,

³⁰ alatsa kipimi, Alhou kimthimi, timi thaigha kichemi, aqheküza akülakimi, alhoksa kiyiqimi ke, apuaza gholumo kemi,

³¹ mbomzümi, piqhive no papemo kemi, akükümsü küha kemi, eno küpükini küha kemi ke.

³² Alhou mikucho zakütsü kiqilo khunono hikithipu shicheni keno thive küzüe pi ithi apülaghi panongu no hipaqo shike likhi kumono kütami no shi aghike lo ghi pano kupulo tsü cheni.