Piyeküsü 9 - Sumi Naga CL (Re-edited) Bible (BSI)

¹ Kungumi apunguu no pa fuko küigha kelo atsütsü lono ayepu lakhi ayeghi lo ikiqighi keu I no ithulu, tipau ye akuthoku lo ilo kepu lashew khaqhiyi tsü püake.

² Ayepu huno akuthoku lashe khaqhi kelo amiphoki kuloghi lono amchhi pho akeshi alashe lono ipeghi no tipau no phoiku khetsünhe ngo amülhü küzüphope zümoive.

³ Tileno amchhi lono tülhaquqo taipe ayeghi lo ngove, tipaqo ghi achuwopazaqo kumto toike tsüpüae.

⁴ Khunono akishe lo Alhouw michida küha keno tipaqo kumo aye ayeghi lo atsüni küxü momu asübo jeli kiumu shipüsa pemoni ke azah panoqo tsüpüa.

⁵ Panongu pelo aqhi pungu ghenguno timi tipaqo kijipüsa penike, ikemu pithi pemo nike azah tsüpüae, eno panongu no kijipüsa keu ye achuwopaza no khuana qüqhi ketoie.

⁶ Tipa ghuloki lo timiqo no akithi phu nani kemu ithumla nani, akithi kümsü khelho nani kemu ti ye panoqo launo pove nani.

⁷ Tülhaquqo ju aye aghüshi lo sawuni ye kuto püakeu khurshiqo mihi, panongu kütsü lo ameshoyi kütsükuqho toi qhopu, eno agi no timi gi mihie.

⁸ Panongu sa no totimi sa toi, eno ahu no abongshuu hu toi;

⁹ panongu ye ayi mlaküxa dapu, eno pano chishibo ghügha no khurkulu kutomo no aghüshiqa lo koha iloche keu sütsa toike.

¹⁰ Panongu ye ashomhi eno achuwopaza toi qüche keu shu xapu, eno aqhi pungu dolo timi ghüzakulupu küka ye pano shomhi lo ae.

¹¹ Akuthoku lo kungumi akeu huno panongu shou akükau shiae. Hebrew tsau pa je ye Abaddon, eno Greek lo ye Apollyon ke.

¹² Ahasapu atüghüu ye wovae; julo, ahasapu kini ighini aphie.

¹³ Tishino kungumi akütsüghou no pa fuko küigha kelo Alhou zülo ameshoyi kiptia lo akibo bidi lono asütsa ipeghi keu I no chilu,

¹⁴ asütsa huno afuko kipeu kungumi akütsüghou vilo pi, “Kungumi bidi khunoqo tshüpe Euphrates ghoki kije lo püani keno kuqhophe lo!”

¹⁵ Ikehu kungumi pano bidi huye ayi kihedo, atsala, aqhi, eno ampe hipau ghenguno kuto püa keke ayeghi lo timi kikije küthü lo lakhi ye pithive penike kuqho pheve.

¹⁶ Panow khurghüshimi kikihi I no chilu keu ye qhethonhe chighi no qhethonhe chighi küghüsü keu ghuthu kini.

¹⁷ Iw kungunhetsü lono I no khurshi eno tipau sakichemiqo hitoi ithulue: panoqo ye ayi mlaküxa pepu, tipau ju ye ami toi huchuyi, sapphire tu toi tsülabei, eno amichu toi aune; khurshiqo kütsü ye abongshuu kütsü toi püzü tipaqo kichi lono ami eno amchhi ngo amichu ipeghi.

¹⁸ Püsa küthü, ami, amchhi eno amichu, hipaqo kichi lono ipeghi keu lono timi kikije küthü lo lakhi ye püghave.

¹⁹ Kughengu khurshi tipaqo küka ye akichi ngo ashomhi lo ake, pano shomhi ye apighi toi akütsü xapu eno tipaqo pesü timi ghüza ke.

²⁰ Püsa hipaqo vecheo pithi mlave kemi timi khunoqo achili akeno, panoqo ye pano kümla lhoksa lono xaide keumu kumo, moaye tüghami kümlla momu ameshoyi, ghükayi, alazayi, eno asüatu julhoqo ye ithulu chemo, chilu eno alachelu chemo kehu tipaqo kümlla pimu phevemo,

²¹ tike kumono panow ghikiqhi, küdüu kümla, asalha ashupu momu aküpka lono xaide moe.