Piyeküsü 8 - Sumi Naga CL (Re-edited) Bible (BSI)

Michida Akütsüniu eno Akiptibo

¹ Kughou Ambeti no michida akütsüniu xükho keno, kungugha lo asüchedo tüxa toike yenguyive.

² Tileno kungumi tsüni khunoqo Alhou zülo acheni keno I no ithulu, eno afuko tsüni pesü panongu tsü.

³ Kungumi kütau lakhi no ameshoyi kiptibo peighi no akiptia lo puthughove, pa pelo kükalakhü zülo ameshoyi kiptia lono küpülümi kümtsü kighini süküqha no mlla penike müsüghüta kutomo pesü pa tsüpüa,

⁴ ikehu küpülümi kighini gholo müsüghüta pitikeu michhi no kungumi u lono Alhou zülo phoiku.

⁵ Tileno kungumi huno akiptia lono ami hipe akiptibo lo süno ayeghi shou vepuku kelo tsütsüküsü ghügha no vekipighi eno tsütsüpha kulo püzü ayeghi ilü thuve.

Afuko Tsüni

⁶ Ikelo kungumi tsüni khunoqo no afuko tsüni pe akeno tipaqo küighani ke kutoluve.

⁷ Kungumi atüghüu no pa fuko küigha kelo aji no apüghü ngo ami gholo xukütshü püzü ayeghi lo veqhi. Ikelo ayeghi eno asübo kikije küthü lo lakhikhi ye pitileve, tipau gholo atsüni küxü ghi qhoi pitive.

⁸ Kungumi akiniu no pa fuko küigha kelo naghuto kuloghi toi kiukela lakhi ami iqü ghi azüghi lo vesü, ikelo azüghi kikije küthü lo lakhi ye aji ilhouve.

⁹ Azü lo lhoxü kikije küthü lo lakhi ye thikhave eno zükiluqo ghi küthü lo lakhi ye shipüsa khave.

¹⁰ Kungumi aküthüu no pa fuko küigha kelo atsütsü lono ayepu kije lakhi akuluqhe toi phuphushi ikiqighi no aghoki eno azüpuki kikije küthü lo lakhi shou ikuve.

¹¹ Ayepu tipau je ye Kukhukimji. Azü kikije küthü lo lakhi ye khumtsaive, eno azü khumtsai kughulhove tsükeu lono timi kutomo thive.

¹² Kungumi abidiu no pa fuko küigha kelo khetsünhe kikije küthü lo lakhi ye kütsave, titoi aqhi eno ayepuqo ghi küthü lo lakhikhi ye kütsaleve, tishikeu lono tipaqo küvü ghi kikije küthü lo lakhi ye zümoive, ikehu puchou pimu küthü lo lakhi ye khetsünhe küvü kühave, eno putho lomu lakhi ye aqhi ayepu küvü kühave.

¹³ Tishino I no jukelo kunguu atsütsü lo alhuqu lakhi yecheghi no vekipighi igha keu chilu, “Kughou kungumi küthü huno afuko kütau kutope akeu küighani keno, ayeghi lo xüküami ye ahasapue, ahasapue, ahasapue!”