Piyeküsü 7 - Sumi Naga CL (Re-edited) Bible (BSI)

Israelmi shou Amchipu

¹ Hipa thiu kungumi bidi no ayeghiqha cheku bidi lo puthugho no ayeghi lo ako bidi mülhü sünhe chilepe aghikeu I no ithulu, ti ye ayeghi momu azüghi eno asübo shou kiumu mülhü puku pemo niye ke.

² Tileno kungumi kütami lakhi no aküxüpu Lhouw michida pesü khetsünhe kipelau no ipe cheghi keu I no ithulu, eno kungumi bidi khunoqo pelo ayeghi eno azüghi ghime penike aküka tsüpüa keno, panoqo vilo pa no asütsa kuloghi lono

³ pi, “Nino ni Lhou qemiqo kishe lo amichi shikhamla aphilo ayeghi momu azüghi eno asüboqo kütsa kevilo.”

⁴ Israel lagha chighikini dolo amichi shive kemi kikihi ye lakh lakhi qhethonhe lhobidi bidi kepi I no chilu:

⁵ Judah lagha lo amichi shive kemi pano 12,000, Reuben lagha lono 12,000, Gad lagha lono 12,000,

⁶ Asher lagha lono 12,000, Naphtali lagha lono 12,000, Manasseh lagha lono 12,000,

⁷ Simeon lagha lono 12,000, Levi lagha lono 12,000, Issachar lagha lono 12,000,

⁸ Zebulun lagha lono 12,000, Joseph lagha lono 12,000, Benjamin lagha lono 12,000.

Shiye Aqokitikhi

⁹ Hipa thiu I no jupuwo kelo khunomu kihikhamla kepushi aqokitikhi kije, shiye lakhikhi, ashiaye jeli, timi eno atsa jeli, kümtsü no aphi kimiye pepusü au lo amsabo loka pe püzü kükalakhü eno Ambeti zülo puthugho aghi,

¹⁰ eno asütsa vekipighi igha, “Xakulupu ye Khuu kükalakhü lo iqa ani keno, Pa eno Ambeti u lo anie!”

¹¹ Kungumi kümtsü no kükalakhü eno layemi ngo aküxüküa lhoxü bidi vehope puthugho, eno panongu no kükalakhü zülo itsaqi agi no ayeghi dape Alhou mlla ghi

¹² pi, “Amen! Shekiqhe eno ajuküvü, alokütsü eno shikimthikütsü, agigihu eno aküka kumto ye alholo eno pülhapuju ni Lhouw ke! Amen.”

¹³ Tileno layemi gholo lakhi no I vilo iniju, “Aphi kimiye chijebobo pepu akemi hipaqo ye khuno, eno khilau no ighi kea?”

¹⁴ I no pi, “Nono ithi anie, akijeu.” Pa no I vilo pi, “Hipaqo ye küsakushu kije hechesü ipeghi luve kemie. Panongu ye Ambeti ji lono panow chijeboike phi ishikimthepe metsüghoi luvae.

¹⁵ “Ikehu panongu ye Alhou kükalakhü zülo ngono putho pucho Pa chineki lono Pa huthu acheni; eno Khuu kükalakhü lo iqa ani keno Pa ampi no panoqo süsho nani.

¹⁶ Panongu ye müzüthi, tüghüthi keu mu shimoae, khetsünhe momu kiu külü nomu panongu phuqhi lumoae.

¹⁷ Kughengu kükalakhü mta lo Ambeti huno pano kheu shino panoqo sasü aküxüpu züpuki lo tucho sawu nani, eno Alhou no pano nhethi lono anhezü isüvetsü nani.”