Piyeküsü 6 - Sumi Naga CL (Re-edited) Bible (BSI)

Michida Tsüni

¹ Tithiu Ambeti no liküküzü kaku tsüni dolo lakhi xükho keu I no ju akelo aküxüküa lhoxü bidi dolo lakhi no asütsa vekipighi tsütsüküsü toi “Ighilo!” ipikeu I no chilu.

² I no jupuwo kelo khurshi kimiye lakhi aghi! Ti sakicheu u lo shexilika ae, eno akütsükuqho pa tsü püakeu xapu aghü lo tokulumi shi ghi itaghi lewu nike ipeghi.

³ Kughou Ambeti no michida akiniu xükho keno, aküxüküa lhoxü akiniu no, “Ighilo!” pikeu I no chilu.

⁴ Eno khurshi kütau huchuyi keu lakhi ipeghi. Ti sakicheu ye azütakikihi kije tsüpüa, pa ye ayeghi lono külakishi ikhi süwuve peniye azah tsüpüa, tishikeu lono timiqo pelo lakhino lakhi ghiqhikile peniye ke.

⁵ Kughou Ambeti no michida aküthüu xükho keno, aküxüküa lhoxü aküthüu no, “Ighilo!” pikeu I no chilu. I no jupuwo kelo khurshi tsübui keu lakhi aghi. Ti sakicheu u lo ahu kimghipu ae.

⁶ Eno aküxüküa lhoxü bidi dolono ipeghi aketoi asütsa lakhi I no chilu, “Atsala kupuju lo qelu keu huye ashothi ahu lakhi, momu barley ahu küthü me shivae, ikemu olive ngo atsailu küma ye shipüsa kevilo!”

⁷ Kughou Ambeti no michida abidiu xükho keno, aküxüküa lhoxü abidiu no, “Ighilo!” pikeu I no chilu.

⁸ I no jukelo khurshi phalai keu lakhi aghi. Ti sakicheu je ye Akithi, eno Hades no pa papeche. Ayeghi lo küxümi tushoqü ye pama pelo aghükishi, püqümiye, asa-agha, eno tüghashiqo u lono pithive penike aküka tsüve.

⁹ Kughou Ambeti no michida apunguu xükho keno, Alhou Tsa eno tipau shepekishi ghenguno ghiqhive kemi ghunguqo akümlla kiptia qholo aghikeu I no ithulu.

¹⁰ Panongu no asütsa kuloghi lono igha, “O Akughushu Mpeu, akimthe eno kuchou, ayeghilomi no ni pithive keu lo Nono küghatha eno ni mkhü lutsü moke kutolo ningu ye khitohi khea lopi kea?”

¹¹ Tileno chijeboike phi kimiye pesü panongu aküphashi tsü, eno pano küsami aqemi ngo athiküzümi kütamiqo ghi panongu toi pithi khaveno akikihi kupulu moke dolo ado ikhonhei ngokhe aghilo pive.

¹² Kughou Ambeti no michida akütsüghou xükho keno, ayeghi küghütha kije ighikeu I no ithulu, khetsünhe no kumshophi tsübui keu toi zümoive, aqhi huno aji toi huchuyive,

¹³ eno amülhü kümka no süsü lo mubuthi küxü fuqhive tsü keshi atsütsü lo ayepuqo no ayeghi lo ighiqive.

¹⁴ Atsütsü no kaku liküzü akeshi hauve, naghuto ngo züdoyeghi kümtsü pütüta-a lono kiqeve tsü.

¹⁵ Tishino ayeghi lo kükami, kijemi, ghüshitomi, kinimi, akumtomi, eno lüthü, aqemi, eno ililai xüakemi kümtsü no atuki eno naghuto lo atuqo dolo itshüpe,

¹⁶ ngono naghuto eno atuqo pütsa, “Ni shou ilu ikughi lo eno Khuu no kükalakhü lo iqa ani keno Pa zülono eno Ambeti loghu launo ni küghütshüve lo,

¹⁷ kughengu panongu loghu tsala huye ighivae eno khuu no tipau lo puthugho luni kea?”