Piyeküsü 4 - Sumi Naga CL (Re-edited) Bible (BSI)

Kungugha lo Kükalakhü

¹ Hipa thiu julo, itaghi kungugha lo ahukikha lakhi khaqhi püakeu I no ithulu! Eno azüu asütsa khikhi afuko toi vekipighi I pütsa keno, tipau huno pi, “Hilau ikughilo eno hipa thiu kiu shiveni cheni keno I no o piyeni.”

² Paikhavi Aghungu no I peitha luve, eno julo, kungugha lo kükalakhü aghi eno timi lakhino tile iqa aghi.

³ Khuu no tile iqa akeno Pa gi ye amekusho tu jasper eno carnelian toi, eno kükalakhü vehomxa pe akeu milisü huno emerald jukimihi shiae.

⁴ Kükalakhü kütau muku bidi no tipau vehope ae, eno layemi muku bidi no aphimini kimiye pepusü ameshoyi kütsükuqho xapu tipaqo lo iqa aghi.

⁵ Kükalakhü lono tsütsüpha küvü ipeghi, tsütsüküsü ghügha no vekipighi igha, eno kükalakhü tipau zülo akulu tsüni, khikhi Alhou Ghungu tsüni keno tipaqo lono ami iqüae,

⁶ kükalakhü zülo kiu kela tsüghükhüi ayina züghi ipi kepu toike ae. Kükalakhü homxape ako bidi lo aküxüküa lhoxü bidi, anhethi no azüu eno athiu ghi chhitoi xapuae:

⁷ aküxüküa lhoxü atüghüu ye abongshuu mihi; akiniu no amshitsü mihi, aküthüu no timi gi mihi, eno abidiu no alhuqu yechekeu mihie.

⁸ Aküxüküa lhoxü bidi, lakhikhi no achishibo tsüghogho xapusü anhethi no ashou eno alou ghi chhitoi, eno putho pucho panongu no tamono ishi piae: “Ampeu Alhou Khuu no acheghi eno acheni eno ighi nani keno, Akughushuu huye akimthe, akimthe, akimthe ke.”

⁹ Kugho kughomu aküxüküa lhoxüqo no ajuküvü, agigihu eno shikimthi keu pesü Khuu kükalakhü lo iqa no pülhapuju eno alholo xüacheni keno, Pa tsü kelo,

¹⁰ layemi muku bidi huno Khuu kükalakhü lo iqa no pülhapuju eno alholo xüacheni keno, Pa zülo itsaqi no mllae. Panongu no kükalakhü zülo pano kütsükuqho lhaqhi no pi,

¹¹ “Ni Mpeu eno Alhou, ajekipi, agigihu eno aküka ye Nono ithulu küzüe, kughengu Nono thime kümtsü pulhosü, eno tipaqo ye O pulou lono acheghi eno pulhosü ke.”