Piyeküsü 22 - Sumi Naga CL (Re-edited) Bible (BSI)

Aküxüpu Ghoki

¹ Tithiu kungumi huno aküxüpu zü ghoki, phuphushi Alhou eno Ambeti kükalakhü lono qoipeghi keu I piye,

² ti ye aphughi lo alaghila mta züsü qowu, eno aghoki ajeu piyiu ghi aküxüpu sübo aghi, tipau lo axathi jeli chighikini pithi eno aqhi atsütsü xolu cheghi. Asübo nipaqo ye shiye shikipivi ghenguno ae.

³ Itehi ye müsüini keu jeli kiumu shimoae, ikemu Alhou eno Ambeti kükalakhü no aphughi lo anani eno Pa qemiqo no Pa mlla nani.

⁴ Panongu no Pa gi ithulu nani, eno Pa je no panongu kishe lo anani.

⁵ Tile ye putho kühave nani. Panongu ye akulu momu khetsünhe küvü avehupu shimoae, kughengu Ampeu Alhou no pano küvü shi nani eno panongu no pülhapuju eno alholo ayepe cheuve nani.

Jisü ye Cheni

⁶ Tileno kungumi huno I vilo pi, “Atsa hipaqo ye pükhükulupu eno kuchou ke. Ampeu Alhou Khuu Ghungu no tungkupmi peitha cheni keno Pa no ke-i kiu shiniye ani keno Pa qemiqo piye penike Paw kungumi puwuvae.”

⁷ “Julo, Ni ye itheno cheni. Khunono kaku hipau lo tungkuptsa yepüa keu peluni keno akümghapue.”

⁸ Ni John no thime hipaqo chilu eno ithulue. I no hi kümtsü chilu eno ithulu kelo kungumi khuu no hipaqo pesü I piye keno pa mlla nike pa pukhu philo itsaqi

⁹ kemu pa no I vilo pi, “Moe, tishi kevilo! No eno o thiküzümi tungkupmi, eno khunono kaku hipau lo akeu tsaqo pecheni keno, tipaqo gholo nighi aqemi lakhike. Alhou mllalo.”

¹⁰ Itaghi pa no pi, “Kaku hipau lo tungkuptsa akeqo mekhape püa kevilo, kughengu ado ye punukhoivae.

¹¹ Küsaküghami no küsakügha shi apelo, eno mithekumomi no mithekumo shi apelo, ikemu achipimi ye achipiu shialo, eno akimthemi ye akimthe shialo.”

¹² “Julo, Ni ye itheno cheni, milakhikhi no kiu mla püani keno tsüchile nike I no ajume pecheni.

¹³ Ni ye Alpha eno Omega, atüghüu eno ashekhau, abothu eno kishekhau ke.”

¹⁴ Khunono aküxüpu sübo xathi küsajelu kepushi eno khagho vechesü aphughi lo ilolu kepushi pano phimini ishi kimtheveni keno akümghapue.

¹⁵ Kughengu khalau ye atsüqo, küdüu kishimi, ashupu asalhami, ghikiqhimi, ajulho kümllami, eno pishikiqhi kimiye no tipau lono xüche kemi no acheni.

¹⁶ “Thime hipaqo pesü akukuhouqo lau sheshu penike Ni, Jisü no Iw kungumi puwuvae. Ni ye David laghami kuhu aghü, inaqhe yepu vüqai keue.”

¹⁷ Aghungu eno külaliu no pi, “Ighilo.” Eno khuu no hipau chiluni keno pa ghi ishi pilo, “Ighilo.” Khukhumu tüghüthi keu no ighilo; khuu no pulo ani keno aküxüpu zü ame sümono lulo.

¹⁸ Khunono kaku hipau lo tungkuptsa chiluve akeno, ni John, no milakhikhi vilo kütüghüve ani, khuana no hipaqo lo süküphave aye, kaku hipau lo püsa jeli yepüa keqo pesü Alhou no pa shou küphatsü nani,

¹⁹ eno khuana no kaku hipau lono tungkuptsa ikhive aye, aküxüpu sübo eno akimthe phughi, khipa ghili kaku hipau lo yepüani keno, tipaqo lo pa saje akeu Alhou no ikhiluve tsü nani.

²⁰ Khuu no thime hipaqo pesü thebei sheshu ani keno, Pa no piani, “Mtsüqheino Ni ye kighithe cheni.” Amen. Ighilo, Ampeu Jisü!

²¹ Ampeu Jisüw küpükini no kümtsü gholo apeniu. Amen.