Piyeküsü 21 - Sumi Naga CL (Re-edited) Bible (BSI)

Atsütsü eno Ayeghi Kithe

¹ Tileno I no atsütsü eno ayeghi kithe ithulu, kughengu atsütsü eno ayeghi atüghüu, eno azüghi ye kühave ke.

² Eno akimthe phughi, Jerusalem kitheu, külaliu no kutope külapuu khe akeshi, kungugha lo Alhou launo iqi cheghi keu I no ithulu.

³ Kükalakhü lono asütsa kuloghi lakhi no pikeu I no chilu, “Julo, Alhou no achekeu Phiki huye timi gholo auvae. Pa no panongu sasü xü nani eno panongu no Paw timi shi nani, eno Alhou ampi no panongu Lhou shi pano gholo xünani.

⁴ Pa no panongu nhethi lono anhezü kümtsü isüvetsü nani, tile ye akithi ke kumono akumlo, aküqa, eno aghimeu ghi kühave niae, kughengu püzüu thime thaqhü ye wovae.”

⁵ Kükalakhü lo khuu iqa akeno Pa no pi, “Julo, I no thokha kümtsü akithe kughulho tsü ani.” Eno itaghi pi, “Hi yepe qhilo, kughengu atsa hipaqo ye kuchou eno pükhükulupu ke.”

⁶ Pa no I vilo pi, “Hi no tavae! Ni ye Alpha eno Omega, abothu eno ashekhau. Tüghüthi kemi lau aküxüpu züpuki lono I no ame lumono tsüni.

⁷ Khuu no theqhi luni keno hipau mheghi ithulu nani, eno I no pa Lhou shino pa no I nu shinani.

⁸ Ikemu amlo kulotimi, aküpülü pheve kemi, kitiqeve kemi, ghikiqhimi, küsalhami, küdüumi, ajulho kümllami, eno kimkimi, hipaqo saje ye ami eno amichu piti chekeu yizü lo anani, tino akithi akiniu.”

Jerusalem Kitheu

⁹ Tile kungumi tsüni khunoqo püsa bohu tsüni dolo ashekhau püsa tsüni chhitoi süpe chekeno, panoqo gholo lakhino I vilo pi, “Ighilo, I no Ambeti nipu Külaliu o piyeni.”

¹⁰ Aghungu no I peitha luve no kungumi huno naghuto kuloghi chuqumghaike lakhi lo I xapusü wu, eno akimthe phughi Jerusalem kungugha lo Alhou launo iqi chekeu I piye,

¹¹ ti ye Alhou juküvü no chhitoi, akughupu tu toi yebide, eno jaspertu toi tsüghükhüi ke.

¹² Tipau ye aliwo kije eno chuqumghai keu no botha püa, eno kungumi chighikini no khagho chighikini khea, ti kümtsü lo Israel laghami chighikini je yepüa—

¹³ khagho küthü no kipelau, küthü no ahuu, küthü no apeu, eno küthü no kulolau ishi ae.

¹⁴ Aphughi liwo ye aboqha tu chighikini shou shipuku püa, eno tipaqo lo aje chighikini yepüa, ti ye Ambetiw apostolmi chighikini je ke.

¹⁵ Kungumi I pütsa akeu no aphughi eno khagho ngo aliwo mighi niye ameshoyi kimghipu süta au lo pecheghi.

¹⁶ Aphughi huye kobidi shiaghi, akijelau huno akushulau sasü aphiphi. Kungumi huno pa süta pesü aphughi mighiju kelo akijelau, akushulau eno akiqhelau ghi aqhemi shi kilometer 2,400 aghi.

¹⁷ Kungumi huno thosülo timi no mighi chekeu ghola lono pa ghi titoi aliwo ghi mighiju kelo akiqhelau no auxakuchho 66 aghi.

¹⁸ Aliwo ye jaspertu pesü shipüa eno aphughi huye ayina toi tsüghükhüi keu ameshoyi no shike.

¹⁹ Aphughi liwo boqha ye akughupu tu jeli kümtsü pesü shipüa. Atüghüu no jasper, akiniu no sapphire, aküthüu no agate, abidiu no emerald,

²⁰ apunguu no onyx, akütsüghou no carnelian, akütsüniu no chrysolite, akütacheu no beryl, atokuu no topaz, achighiu no chrysoprase, chighiaqhaqhiu no jacinth, chighiakiniu no amethyst.

²¹ Khagho chighikini ye mlapuchi chighikini ke, mlapuchi lakhikhi no khagho lakhikhi mlapüa, eno aphughi laghiqo ye ayina toi phuphushi tsüghükhüi keu ameshoyi no shike.

²² Ni ye aphughi lo achineki ithumlae, kughengu aphughi chineki ye Ampeu Alhou Akughushuu eno Ambeti huke.

²³ Aphughi ye tipau shou yepüvü kepu khetsünhe momu aqhi mu avehupu shimoe, kughengu Alhou juküvü no yepüvü ae, eno Ambeti no tipau kulubo ke.

²⁴ Shiye kümtsü no tipau küvü pesü xünani, eno ayeghi lo kükami no pano jekipi pesü tipau lo süghi nani,

²⁵ tipau khagho ye puchopuju khaqhi püache nani, eno tile ye khilemu putho shivemo nani.

²⁶ Shiye kümtsü jekipi eno agigihu pesü aphughi lo iloghi nani.

²⁷ Ikemu mithekumo ye kiu gholau nomu tile ilolumo nani, tike kumono kitiqeve keu momu kichile kümla shive keumu ilolumo nani, ikemu khunono Ambetiw aküxüpu kaku lo aghini keno pano likhino ilolu nani.