Piyeküsü 20 - Sumi Naga CL (Re-edited) Bible (BSI)

Ampe Qhethonhe

¹ Tithiu itaghi kungumi lakhi no pa u lo akuthoku khaqhiyi eno ayikichhe shishoi keu pesü kungugha lono iqi cheghi keu I no ithulu.

² Eno pa no dragon khuu pesü tüghami eno Satan ipiche keno mulho pighi hu tsüqü luve no ampe qhethonhe ghenguno tsüghape,

³ aqo lo vesüve, eno tipau khaveno mekhave, tishianguno ampe qhethonhe kutolo pa pelo shiye jeliqo pishiqhi pemo niye ke. Ti kupuve kethiuno ado kitila pa kuqhophe masa nani.

⁴ Tishino I no kükalakhüqo ithulu, eno küghathabe kepu kükagha pesü khuno tsüpüa keno panoqo no tile iqa aghi. Itaghi timi khunoqo Jisü shepekishi ghenguno, Alhou tsa shekushu ghenguno, tüghashi momu tipau julho mllamo eno pano kishe lo momu au lo amchipu shimoke ghenguno ghiqhi khave keno, tipaqo ngulho I no ithulu. Panongu ye xüchile luve no Khristo gholo ampe qhethonhe ayepe thuve.

⁵ Kithimi kütami achiliqo ye ampe qhethonhe kishekha moke kutolo xüchile mlave. Hi no kithimi xüchilekulu atüghüu.

⁶ Khunono xüchilekulu atüghüu lo küsaje luni keno akümghapu eno akimthepue. Akithi akiniu ye hipaqo shou aküka kühavae, panongu ye Alhou eno Khristo chinemi shi nani eno Pa gholo ampe qhethonhe ayepe nani.

Satan Theqhikulu

⁷ Kughou ampe qhethonhe kishekhani keno Satan ye pa kughuki lono khaqhi pheve nani

⁸ eno pa no ayeghiqha cheku bidi lo shiye jeli akeqo pishiqhini ke, eno aghü shinike ghenguno Gog ngo Magog hekütsü nani; pano kikihi ye azüghimkü lo asaye jehi ake.

⁹ Panongu no aqayeghi nhakhape chesü iqhoghi no küpülümi no achekeu-a, kimiyekiche phughi hu boluve, ikemu kungugha lono ami iqighi no panongu pitiqhive.

¹⁰ Eno panoqo pishiqhive keu tüghami huye khile tüghashi eno kichile tungkupu akeno, amiyizü eno amichu iqüke-a lo küghape vesüve, tilau no panoqo ye putho pucho pülhapuju eno alholo ghimeqhi anani.

Kükalakhü Zülono Küghatha

¹¹ Itaghi I no kükalakhü metsüghoike kije lakhi eno tipau lo Khuu iqa akeno ithulu. Atsütsü eno ayeghi ye Pa küa lono hauve no ithumlave.

¹² Kükalakhü zülo kakuqo lhaphe püaghi, eno kithimi, kijemi, kitilami kümtsü puthugho aghi keu I no ithulu. Kaku kütau khikhi aküxüpu kaku keno tighi lhaphe püa, eno kithimi ye pano no kiu mla püa keno kakuqo lo yepüa keu kiqi lono pano shou küghathabe tsü.

¹³ Azüghi lono thive kemi tilau azüghi no ikhiphe tsü, Akithi ngo Kithigha ghi tilau kithimi akeqo ikhiphe tsü, eno panongu lakhikhi no kiu mlapüa keno tipau kiqi lono küghathabe tsü.

¹⁴ Tishino Akithi ngo Kithigha küma ye amiyizü lo vesüve. Amiyizü hipau no akithi akiniu ke.

¹⁵ Khukhumu aküxüpu kaku lo aje ye püaghimo keu ye amiyizü lo vesüve.