Piyeküsü 2 - Sumi Naga CL (Re-edited) Bible (BSI)

Ephesus Kukuhou lau Atsape

¹ “Ephesus kukuhou lo kungumi lau yelo: ‘Khuu no Pa u ajeu ayepu tsüni pesü ameshoyi kulukibepu tsüni gholo checheni keno, Pa tsape.

² “‘O kümla, o ghime eno nono kutuokutuu puqhe chekeu I no ithi ani, nono kishi küsaküghami tshalu chemo keno, eno kumomu alikhi ampi pesü apostolmie piche keqo nono phuju no kichileu shive aghikeu I no ithi ani.

³ Nono I je ghenguno kutuukulu shi puqhe akeu eno aghime sholu namu azüzüve mphi keu I no ithi ani.

⁴ Ikemu Ni ye o shou xube kepu hi ani, no ye o kikimiye atüghüu hu phevae.

⁵ Tighenguno no ye khileno ikiqive akeno kümsü lulo; xaidelo, eno atüghü lo nono kiu mlache keno tipau shilo. Nono xaidemo keloye, I no o lau ighi no o kulukibepu hu tipa-a lono ikhivetsü nani.

⁶ Tishimu no ye hipau aphie: no ye Nicolaitmi kümla mithi cheni, Ni ghi ti mithi chenie.

⁷ Khuu no akini ani keno Aghungu no akukuhouqo lau piakeu chilulo. Khuu no theqhi luni keno Alhou ghutu lo aküxüpu sübo akeu xathi chulu penike I no puloza tsüni.’

Smyrna Kukuhou lau Atsape

⁸ “Smyrna kukuhou lo kungumi lau yelo: ‘Khuu no thive no xüchilelu keno, Atüghüu eno Ashekhau tsape.

⁹ “‘I no ow küsakushu eno o qüagha ithi ani (ikemu no ye kinimie), eno khunono Satanw sinagogmi keghi akimki lono Jewmie picheni keno, panow piküptha ghi I no ithi ani.

¹⁰ Nono kiu ghime sholu niye ani keno msa kevilo. Julo, nongu gholo khami ye tüghami no pejuni ye akughuki lo süveni ke kuto ani, eno atsala chighi kutolo nongu ye küsakushu shinani. Akithi kutolo pükhü kulupu shilo, eno I no aküxüpu kütsükuqho pesü o tsünani.

¹¹ Khuu no akini ani keno Aghungu no akukuhouqo lau piakeu chilulo. Khuu no theqhi luni keno pa ye akiniu kithi huno ghüzamla nani.’

Pergamum Kukuhou lau Atsape

¹² “Pergamum kukuhou lo kungumi lau yelo: ‘Khuu u lo putoputo züta kütsügha ani keno Pa tsape.

¹³ “‘Nono khile acheni keno ti ye Satan kükalakhü kepi I no ithi ani. Tishimu nono kuchou shi I je tsüqüpe puthugho ke, eno I shepekishiu, pükhü kulupu Antipas khuu nongu gholono sawo Satan no achekeu-a lono ghiqhive tsü keno, tipa ghuloki lo pinamu no ye I shou pükhübe chekeu phevemo ke.

¹⁴ Ikemu Ni ye thime hami pesü o shou xube kepu ani: timi khami khunono Balaam kükütsü pape cheni keno tilau o gholo ani. Balaam no Israelmi zülo apukhu küpsüpu qhitsüni ye Balak kipe, tishianguno panongu pelo asüatu julho mllave keu chuqupu chuno shupu salhauve peniye ke.

¹⁵ Titoi khunono Nicolaitmi kükütsü pape cheni keno panoqo ghi o gholo ani.

¹⁶ Tighenguno xaidelo. Tikumo aye I no kighithe o lau ighini eno I kichi lo azütakikihi akeu pesü panoqo mjochile aghü shini.

¹⁷ Khuu no akini ani keno Aghungu no akukuhouqo lau piakeu chilulo. Khuu no theqhi luni keno I no küsü püakeu manna hami tsüni, eno atu kimiye lo aje kithe yepuku pe pa tsüni, ti ye khuu no ithuluni keno pa no kumo aye khunomu ti ithimo nani.’

Thyatira Kukuhou lau Atsape

¹⁸ “Thyatira kukuhou lo kungumi lau yelo: ‘Alhou Nu, Khuu nhethi no ami mili toi eno apukhu no alazayi ghukimthepe phuphushi aketoi keno, Pa tsape.

¹⁹ “‘O kümla, o kikimiye, aküpülü, hukuthu, kutuokutuu puqhe chekeu, eno püzüu kümlaqo kiyeve ghi itehiu pavi mla akeu kümtsü I no ithi ani.

²⁰ Ikemu Ni ye o shou xube kepu hi ani: Jezebel, khuu ampi no li ye tungkupliu ipi cheni keno, li no I qemi pelo shupu-salha eno asüatu julho mllave keu chuqupu chusho peniye shikabide eno müsü kutho chekeghi nono juzüve tsü cheni.

²¹ I no li pelo xaidelu penike ado tsü kemu li ye asalha xine lono xaideni keu milive ke.

²² Julo, I no li pesü aküsü züalo vepukuve nani, eno khunono li sasü kütüqha cheni keno, panongu no li xine lono xaidemo keloye I no küsakushupu lo panoqo vesüve nani,

²³ eno li laghami qhoi ghavetsü nani. Tileno akukuhou kümtsü no Khuu timi kükümsü-mlo lheju cheni keno Pa huye Ni kepi ithi nani, eno nongu lakhikhi lau pütüta kümla kiqi lono I no ajume tsü nani.

²⁴ Ikemu nongu kütami Thyatira lo akeqo thaqhü, khunono hipau kükütsü pape chemo, eno Satanw kuthoküzü kükütsü ikhilu mphi keno, I no nongu vilo piani, Ni ye kütau makho kiumu nongu xapipe amoe.

²⁵ Nongu no kiu ani keno I no ighi moke dolo tilikhi mtotoi tsüqüpe lulo.

²⁶ Khuu no theqhilu no ashekha kutolo I kümla shini keno, pa pelo shiyeqo shou ayepe penike I no kükagha tsü nani,

²⁷ ti ye Ni ampi no I Pu launo kükagha ithuluke toi, tishino ayeghi li vepho pinyive ketoi pa no ayiküsü pesü panoqo shou ayepe nani.

²⁸ Eno I no inaqhe yepu pesü pa tsü nani.

²⁹ Khuu no akini ani keno Aghungu no akukuhouqo lau piakeu chilulo.