Piyeküsü 19 - Sumi Naga CL (Re-edited) Bible (BSI)

Kungugha lo Lokivi

¹ Hipa thiu kungugha lo aqokitikhi no igha akeshi asütsa kuloghi lakhi I no ishi chilu, “Hallelujah! Xakulupu, ajekipi eno aküka ye ni Lhouw ke,

² kughengu Paw küghakütha ye kuchou eno achipie; Pa no kütüqhaliu khuu ngosükümla lhoaye pesü ayeghi shipixi chekeno, li shou küghathabe tsü, eno li shou Pa qemi ji pele keu mkhü lutsüe.”

³ Panoqo no itaghi igha pi, “Hallelujah! Li pitikeu michhi ye pülhapuju eno alholo phoiku aniae.”

⁴ Layemi muku bidi eno aküxüküa lhoxü bidi huno itsaqi no Alhou, Khuu kükalakhü lo iqa akeno, mlla ghi pi, “Amen. Hallelujah!”

⁵ Eno kükalakhü lono asütsa lakhi no ishi pi, “Nongu Alhou qemi, Pa msaqhiyi chekemi, kijemi kitilami kümtsü no ni Lhou sheqhelo.”

Ambetiw Külakupu Ghulhu

⁶ Tile I no aqokitikhi sütsa toike lakhi chilu, ti ye azüghi kuloghi ghügha toi eno tsütsüküsü ghügha toi igha pi, “Hallelujah! Kughengu Ampeu ni Lhou Akughushuu huno ayepe anie.

⁷ Ningu alovi ilheni eno ajuküvü pesü Pa tsüni nolo kughengu Ambetiw külakupu do ighivae eno Paw külaliu ye kutope ngovae;

⁸ Li pelo phepheike phi, phuphushi eno tsüghükhüi keu pepu penike tsüvae”— kughengu aphi tipau ye küpülümi mikucho kümla michipu ke.

⁹ Kungumi huno I vilo pi, “Hi yelo: Ambetiw külakupu ghulhu lo khuno kusüni keno pano kümghapue.” Pa no highi I vilo pi, “Hipaqo ye Alhou tsa kuchoue.”

¹⁰ Ikehu I no pa mllani ke pa pukhu philo itsaqi, ikemu pa no pi, “Tishi kevilo! Kughengu no eno o thiküzümi khunoqo Jisü no kuchou shepe shikeu pecheni keno, nongu gholo nighi aqemi lakhike. Alhou mllalo!” Kughengu Jisü no kuchou shepe shikeu pelu kemi no tungkuptsa pikulupu ghungu achenie.

Khurshi Kimiye Sakicheu

¹¹ Tithiu kungugha khaqhi keu I no ithulu, eno julo, khurshi kimiye lakhi cheghi! Tipau shou iqa cheghi keu je ye Pükhükulu eno Kuchou, eno pa ye achipiu-mikucho lono küghathabe eno aghüshi chekemi.

¹² Pa nhethi ye ami mili toi eno pa kütsü lo kükakütsüqho kutomo ae, pa ye aje lakhi yepe dapuche kemu pa likhino kumo aye khunomu ithimo.

¹³ Pa ye aji pusüsü keu chijeboike phi pepu, eno pa je pesü “Alhou Tsa” ipi kutsüe.

¹⁴ Kungugha lo ghüshimi no khurshi kimiye shou iqa no phepheike phi kimiye eno tsüghükhüi keu pepusü pa papeche.

¹⁵ Azütakikihi kütsügha khipa pesü pa no shiyeqo ghiqhi nani keno ti ye pa kichi lono ipeghi nani, eno pa no ayiküsü pesü panoqo shou ayepe nani. Pa no Akughushu Lhou loghu pepheni ke atsaithi kütsüghü-a lono qole nani.

¹⁶ Paw chijeboike phi eno pa lukobo lo aje hipau yepuku püa, kükami shou Akükau eno ampemi shou Ampeu.

¹⁷ Tile kungumi lakhi no khetsünhe lo puthugho aghikeu I no ithulu, pa no asütsa kuloghi lono atsütsü lo aghau yeche keqo vilo pi, “Ighilo, Alhou ghulhu kije akeu ghenguno hekütsü lo,

¹⁸ kükami shi chukepu shi, keptenqo shi, akumtomi shi, khurshi ngo tipau sakichemi shi, timi shi, ti ye ililai kemi eno aqüaxemi, kijemi eno kitilami, kümtsü shi chukepu shilo.”

¹⁹ Tithiu tüghashi eno ayeghi lo kükamiqo no panow ghüshimi sasü khuu no khurshi shou iqa akeno pa eno paw ghüshimi sasü aghü shinike kumqope aghikeu I no ithulu.

²⁰ Tüghashi eno tipau gholo kichile tungkupu hughi küghaluve, pa no tüghashi zülono akümzapu kümla shikeu vecheo tüghashi michipu auve kemi eno tipau julho kümllami pishiqhi cheke. Hi küma ye aküxü no küghape amichu pesü küiqü chekeu miyizü lo vesüve.

²¹ Eno panow ghüshimi achili thaqhü ye khuu khurshi shou iqa akeno pa kichi lono azütakikihi ipeghi keu pesü ghiqhi khave, eno aghauqo no pano po sünhei tipaqo shi mighive.