Piyeküsü 18 - Sumi Naga CL (Re-edited) Bible (BSI)

Babylon Ikiqive

¹ Tithiu I no kungumi kütau lakhi kungugha lono iqi cheghi keu ithulu, pa ye kükagha kije akemi eno pa küvü no ayeghi kuchopu yepüvüve.

² Pa no asütsa kuloghi lono ighamku pi, “Ikiqivae, Babylon akijeu huye ikiqivae! Li ye tüghami kungo-a, mithekumo ghawu, mithekumo ghau, mithekumo eno aphikümqhüpu tüghashi jeli kümtsü kicheqho-a shivae.

³ Kughengu shiye kümtsü no liw ngosükümla ji shomzü, ayeghi lo kükamiqo no li sasü salha eno li no aghakiqishi küakini kuthole xükeu lono ayeghi lo lhidimi no kinimi shikhavae.”

⁴ Tishino kungugha lono asütsa kütau lakhi I no ishi chilu, “Iw timiqo, li launo ipeghive lo, tikumo aye nongu ye li xine lo kitimelu nosa, eno li tsükeu püsa küsajelu nosae;

⁵ kughengu li xine ye amoqhe keshi iku kungugha to ani, ikehu Alhou no li kipimi kümsüchilelu anie.

⁶ Li no kütami lau tsü püakeu qhemi tsüchile lo, li kümla pesü kinino küghüsü no lochilelo; kiu qhemi pesü ajukhu lo kitetsü keno ti veküghüsü no li jukhu lo lesü tsülo.

⁷ Li ampi no li jepipi eno aghakiqishi küakini kuthole xü kehu tipa qhemi aghime eno akumlo li tsülo, kughengu li no amlo lono piche, ‘Ni ye kükaliu lakhi shi iqa ani, ni ye chimemi kumoe, eno ni ye khilemu akumlo sholumo nani.’

⁸ Hi ghenguno li tsüni keu püsa akithi, akumlo eno püqümiye, kümtsü ghulo lakhi lono ighive nani, eno li ye ami pesü pitiqhive nani; kughengu Ampeu Alhou Khuu li shou küghathabeve akeno, Pa ye Akughushu ke.”

⁹ Ayeghi lo kükami khunoqo no li sasü kütüqha no li gholo kuthole xüche keno panongu no li pitikeu michhi ithulu kelo li ghenguno amloksa shi ighaqa nani.

¹⁰ Panongu no li ghime jumsa kelauno putou puthugho ngo no pi nani, “Oishe! Babylon, no akiqheu mishighüna, no akumtou phughi, anguküsapu ghi lae! Kughengu asüchedo lakhi lono ow küghakütha ighivae!”

¹¹ Ayeghi lo lhidimi ghi li ghenguno amloksa shi ighaqa nani, kughengu itehi ye khunomu panongu nhemgha qhümo ake,

¹² ameshoyi, ghükayi, amekusho tu, mlapuchi; phephei, hughaike phi, atayeho phi, huchuyike phi; tsüngqüike sü-tsüni kümtsü; akühahu nhemgha; amekusho sü-atu, ayi, alazayi, akimiyetu jeli pesü shikeu nhemghaqo;

¹³ yeghüthi, tsüngqüikeu mukhu, müsüghüta, axokütsüngü zü, aji, thazü, ashomkhu, ashothi, atsüaqu ngo ambe, khurshi ngo khurkulu, eno aqüaxemi, ti ye küxümi pesü kimje keu piani. Lhidimi no highi pi,

¹⁴ “O ngulho no mine chekeu xathi ye O launo wuvae, o küakini eno phuphushi keu thimeqo ye khilemu ithulu kithemo kepushi püha khavae!”

¹⁵ Thime hipaqo kimje chekemi khunono li launo küakini heshelu keno panongu no li ghime jumsa kelauno putou puthugho no amloksa shi ighaqa pi nani,

¹⁶ “Oishe, akiqheu mishighüna, phephei, hughai, eno huchuyike phi pepusü ameshoyi, akughupu tu, eno mlapuchi kighipu chekeu ghenguno ahasapu nolae!

¹⁷ Kughengu asüchedo lakhi lono küakini qhoi pükhülevae.” Zükilu mpemi eno tile kichemi, zükilu sakichemi eno azüghi lo kilhishomi kümtsü no putou puthugho

¹⁸ eno li pitikeu michhi ithulu kelo panongu no ighamku, “Mishighüna kighiche hutoi keu kiu phughi ache kea?”

¹⁹ Panongu no mloqa keu michishi ayeghimkhu pesü pano kütsü lo vepuku no ighamku, “Oishe, akiqheu mishighüna ghenguno ahaküsapu ghi lae! Li küakini pesü zükilu pighimi no kinimi shilu khaveno li ye asüchedo lakhi lono pükhülevae.

²⁰ O kungugha eno nongu küpülümi, apostolmi ngo tungkupmiqo, li jupe alovilo, kughengu Alhou no nongu saphu no li shou küghakütha bevae!”

²¹ Tileno kungumi kumto lakhi no atuqu kuloghi lakhi athi kütsüghü tuqu toike ikhipe azüghi lo vesüve no pi, “Akiqheu mishighüna Babylon ghi hitoi ngukangugha shi kütsakungove no khilemu ithulu kithe move nani;

²² küghaküsü lebo, fulili eno afuko küighami ghügha nono chilu kithemo nani, au tshamgha kümlami ghi o gholo aghi move nani, eno athi kütsüghü ghügha mu nono chilu kithe move nani,

²³ akulu küvü ye o lolo no vüipeghi moae, külapuu eno külaliu sütsa mu chilu moae, ayeghi lo ow lhidimi ye ajuaje küami keghi ow küdüu kümla pesü nono shiye kümtsü pishiqhie.

²⁴ Tungkupmi ngo küpülümi, eno ayeghi lo timi pithive keqo kümtsü ji Babylon lo kighiji püaghi keu phulue.”