Piyeküsü 17 - Sumi Naga CL (Re-edited) Bible (BSI)

Kütüqhaliu ngo Tüghashi

¹ Tileno kungumi tsüni khunoqo u lo abohu tsüni akeno tipaqo gholo lakhi no ighi no I vilo pi, “Ighilo, kütüqhaliu khuu aghoki kutomo shou iqa ani keno, li shou küghatha keu I no o piyeni,

² ayeghi lo kükamiqo no li sasü kütüqha cheni; eno li ghili küsa jukhu no ayeghi lo timiqo shokümzüvae.”

³ Kungumi huno aghungu lono I xapusü yenguyi ke-a lo wu, tile totimi lakhi no huchuyi keu tüghashi shou iqa akeu I no ithulu, tüghashi ti ye akütsü tsüni eno akibo chighi xapusü aphi lo küthaküghapu je chhitoi aghi.

⁴ Totimi huye hughai eno huchuyike phimini pepu, ameshoyi ngo akughupu tu eno mlapuchi thimeqo kighipusü au lo ameshoyi jukhu pe aghi, ajukhu tipau lo aphikümqhüpu jeli eno li ghili küsa mithekumo no chhitoi ae.

⁵ Eno li kishe lo ithikümla tuqhou je lakhi yepüa: “Babylon akijeu, kütüqhalimi eno ayeghi shikipiximi paza.”

⁶ Atotiu ye küpülümi ji eno Jisüw thopi ghakishimi ji shomzüpe ae. Kughou I no li ithulu keno ni ye shishe akümzave.

⁷ Ikemu kungumi huno I vilo pi, “No ye kushiye akümzaqhiyi ani kea? I no atotiu eno li xapu chekeu tüghashi akütsü tsüni akibo chighi kupuu hikümaw ithikümla tuqhou akeu o vilo pini.

⁸ Nono tüghashi ithulu keu ye xüache kemu itehi ye kühavae, eno ti ye akuthoku lono ipeghi no kütsave peni keu lo ani. Ayeghi lo küxümi khunoqo je ayeghi boqha ghomphi lono aküxüpu kaku lo yepüaghi moni keno, tipaqo no akümzaqhiyi tüghashi ju nani, kughengu ti ye xüache kemu itehi ye kühave no itaghi ighi nani kehue.

⁹ “Hi ye vethakulupu lokütsü aghi peniye ghutu anike: akütsü tsüni ye naghuto tsüni khipaqo shou atotiu no iqa ani keno tipaqo ke;

¹⁰ tipaqo ye kükami tsüni ghi ke, panoqo gholo pungu ye ikiqivae, lakhi no ani, eno lakhiu ye ighi mphi kemu kughou pa no ighini keno pa ye ado ikhonhei likhi ngomasa nani.

¹¹ Tüghashi xüache no kühave keu no akütacheu kemu pa ye kükami tsüni laumi eno kütsaveni keu lo ani.

¹² Eno akibo chighi nono ithulu püakeu ye kükami khunoqo kükagha ithulu mphi keno pano chighi ke, ikemu tüghashi gholono kümtsa ayikihedo lakhi ghenguno kükami nguagha ikhiluni ye ani.

¹³ Hipaqo no akükümsü lakhi shino aküka eno anguagha kulhuqhipe tüghashi tsüve nani.

¹⁴ Panongu no Ambeti sasü aghüshi nani kemu Ambeti no pano theqhive nani, kughengu Pa ye ampemi shou Ampeu eno kükami shou Akükau, eno Pa gholo kichemi ye kuluve kemi, kishekiphemi eno pükhükulumi ke.”

¹⁵ Kungumi huno I vilo pi, “Aghoki khipaqo shou kütüqhaliu no iqa akeu nono ithulu püa keno tipaqo ye timi aqokitikhi, shiye eno atsa jeliqo ke.

¹⁶ Eno nono akibo chighi ithulu keu ngo tüghashi ishi küqhano kütüqhaliu jumithi nani. Panoqo no li küakini qhoi hakholuve no aphikümsa küghüküghalei qhive nani, eno li shi chuve no ami pesü pitive nani,

¹⁷ kughengu panoqo no amlo lakhi shino pano kükagha pesü tüghashi lau pephetsü keu ye Alhou no Pa tsa shikupu khamoke kutolo Pa kukughu kiqi lono mla peniye panongu mlo lo süvetsü keu ke.

¹⁸ Eno atotiu nono ithulu keu ye ayeghi lo kükami kümtsü shou qhasüpe achekeu mishighüna akijeu huke.”