Piyeküsü 16 - Sumi Naga CL (Re-edited) Bible (BSI)

Akiptibo Tsüni Lo Alhou Loghu

¹ Tileno asütsa kuloghi lakhi achineki lono kungumi tsüni vilo ishi pikeu I no chilu, “Wulo eno Alhou loghu akeu kiptibo tsüni pesü ayeghi lo leqhilo!”

² Ikehu kungumi atüghüu no pa kiptibo pewo ayeghi lo leqhi, ikelo tüghashi michipu akemi eno tipau julho mlla chekemi shou alhoksa eno kumthu kümna piyi küsü ikughive.

³ Kungumi akiniu no pa bohu pesü azüghi lo leqhi, ikelo azü no kithimi ji toive no tile lhoxü jeli qhoi thikhave.

⁴ Kungumi aküthüu no pa bohu pesü aghoki eno azüpukiqo lo leqhi kelaye tipaqo no aji ilhouve.

⁵ Tileno azüghi jukütsü akeu kungumi no ishi pikeu I no chilu, “O Akimtheu, Khuu acheni eno acheghi keno, Nono achipiu kehu küghakütha hipaqo süghie.

⁶ Kughengu panoqo no küpülümi ngo tungkupmi ji peleve tsü kehu Nono panoqo pijeni ke aji pesü tsüvae. Ti ye panongu no ithulu küzüpu huke!”

⁷ Akiptia lono pikeu tsa I no chilu, “Iyei, Ampeu Alhou Akughushuu, Ow küghaküthaqo ye kuchou eno achipi ke!”

⁸ Kungumi abidiu no pa bohu pesü khetsünhe lo lepuku, ikelo tipau migha pelo timi phuqhi penike azah tsüve.

⁹ Akülü kümgha no shishe timiqo phuqhive kehu panongu no Alhou Khuu püsaqo shou aküka akeno Pa je thaigha ghusho kethono xaidemo, eno Pa jepipi tsümoe.

¹⁰ Kungumi apunguu no pa bohu pesü tüghashi kükalakhü lo leqhi kelaye tipa kükaqha kümtsü aküzü lo ilove. Timiqo no pano mili tsatha iju-ime

¹¹ eno apiyi küsü jeli pulho kelauno kungugha Lhou ghusho ake thono pano kümla lhoksa lono xaide moe.

¹² Kungumi akütsüghou no pa bohu pesü Euphrates ghoki kije lo leqhi, ikelo kipelau no kükami chekeqo ghenguno ala shetsüni kehu tipau zü qhaive tsü.

¹³ Tileno mithekumo ghawu küthü, achuyi toi püzü dragon kichi lono lakhi, tüghashi kichi lono lakhi, eno kichileu tungkupu kichi lono lakhi ishi ipe cheghi keu I no ithulu.

¹⁴ Kughengu hipaqo ye tüghaküsa ghawu, amchipu kümla ghi shiche keqoe, hipaqo no Alhou Akughushuu tsala kije lo aghü küpüghüni ke ghenguno akuaqha kümtsü lo kükami akeqo hekütsü süghi niye wuve.

¹⁵ (“Julo! Ni ye küpkami lakhi toi ighi nanie! Khuu no tsükhüi shi ithu aphimini pepusü aghini keno pa kümghapue, tishianguno pa ye aphikümsa wumo nani momu aqha zülo tishi ithulumo nani!”)

¹⁶ Tishino aghawuqo no kükami hekütsü sawo Hebrew tsauno Armageddon ipi chekeu-a lo kumqo.

Akiptibo Akütsüniu

¹⁷ Kungumi akütsüniu no pa bohu pesü amülhü lo leqhi, ikelo achineki lo kükalakhü lono asütsa kuloghi lakhi ishi ipeghi, “Hi no kishekhavae!”

¹⁸ Tileno tsütsüpha kulouve, tsütsüküsü ghügha no vekipighi igha, eno ayeghi küghütha kije ipeghi, paküta keu yeghi küghütha kehu timi xülo titoi keu ye khilemu ighiju mphie.

¹⁹ Aphughi akijeu ye amqo küthüshi itave, titoi ayeghiqha lo aphughi kümtsü ikiqi kütsa khave. Tithiu Alhou no Babylon akijeu pelo Pa loghu jukhu lo akeu kümtsü yeve peni keu kümsülu.

²⁰ Züdoyeghi kümtsü lakhikhi no yimive eno naghutoqo no thosü-a lo ngo move no külaqa khave.

²¹ Atsütsü lono apüghütu kuloghi, lakhikhi lo ahu lhopungu qhalo shi timiqo shou ghuqhi; püsa tipau ye panoqo ghenguno akumou mkamghai kehu pulho kelauno panongu no Alhou ghushove.