Piyeküsü 15 - Sumi Naga CL (Re-edited) Bible (BSI)

Kungumi Tsüni Eno Püsa Tsüni

¹ Tileno atsütsü lo amchipu kije eno akümzapu lakhi I no ithulu, kungumi tsüni no püsa tsüni khikhino ashekhau shi akeno, tipaqo pesü Alhou loghu kishekhave tsüniye aküphashi pecheghi.

² Eno ayina züghi ipi kepu toikeu lo ami bubushi iqü akeu I no ithulu, eno khunono tüghashi eno pa julho ngo pa je kikihi theqhilu keno pano u lo Alhouw küghaküsü lebo pesü ayina züghi mkülo puthugho aghi.

³ Panongu no Alhou qeu Moses ngo Ambeti shikipili le ishi phe, “O kümla ye kije eno akümzapue, O Ampeu Alhou Akughushuu! O laghi ye achipi eno kuchoue, O shiyeqo shou Akükau!

⁴ Khuu no O msa moni eno O jepipi moni kea O Ampeu? Kughengu O likhi no akimthe ke. Shiye kümtsü ighi no O mlla nani, kughengu O chipiu mikucho kümla ye pephe piyevae.”

⁵ Hipa thiu I no pishipuwo jukelo kungugha lo kuposhukulu phiki alou akimthe chineki khaqhi püaghi,

⁶ eno kungumi tsüni no phepheike phi tsüghükhüi pepusü ameshoyi mlaküxa no panongu mla veho puve no püsa tsüni pesü akimthe chineki lono ipeghi.

⁷ Tile aküxüküa lhoxü bidi gholo lakhi no ameshoyi kiptibo tsüni lo Alhou Khuu pülhapuju eno alholo xüacheni keno Pa loghu chhitoi akeu pesü kungumi tsüni aküphashi tsü,

⁸ ikelo Alhou Nguagha eno Pa Küka jekipi launo ighikeu michhi no achineki phochighive eno kungumi tsüni u lo püsa tsüni akeu kümtsü kishekha moke kutolo milakhi mu akimthe chineki lo ilolu move.