Piyeküsü 14 - Sumi Naga CL (Re-edited) Bible (BSI)

Ambeti eno Xachilelu Kemi

¹ Tithiu I no pishipuwo jukelo Ambeti no Zion naghuto lo puthugho aghi, eno julo, Pa gholo timi khunono akishe lo Ambeti je eno Papu je yepuku püa keno pano lakh lakhi qhethonhe lhobidi bidi aghi.

² Tile kungugha lono azüghizü eno tsütsüküsü ghügha kuloghi toike sütsa lakhi I no chilu. Asütsa ti ye küghaküsü lebo kipemi no pano lebo küigha akeshi chilue,

³ panongu ye kükalakhü, aküxüküa lhoxü bidi eno layemiqo zülo puthugho no ale kithe pheae. Ayeghi lono xachilelu kemi pano lakh lakhi qhethonhe lhobidi bidi no kumo aye khunomu ale tipau phemlae.

⁴ Timi hipaqo ye totimi sasü kikivi püamo kemi, kughengu panongu ye athathe aphie. Ambeti no khile khile wumu papeche keqo ye hipaqo ke. Hipaqo ye timi kümtsü gholono Alhou eno Ambeti lau amsüu xathi shi xachile luve keqoe,

⁵ eno pano ye tichetighepu küha kehu pano kichi lono akimki tsapi chilumoe.

Kungumi Küthü Tsape

⁶ Tileno kungumi kütau lakhi no ayeghi lo küami, shiye eno ashiaye jeli, timi mqo eno atsa jeli kümtsü lau lhokta tsakiviu sheshuni ke atsütsü mta lo yecheghi keu I no ithulu.

⁷ Pa no asütsa kuloghi lono pi. “Alhou msalo eno ajuküvü pe Pa tsülo, kughengu Paw küghakütha tüqhüdo ye ighivae, eno Khuu kungugha eno ayeghi, azüghi eno azüpukiqo lhosü keno, Pa mllalo.”

⁸ Kungumi akiniu no küpape ghi hitoi sheshu ighi, “Ikiqivae, Babylon akijeu, khuu no pitipüza ashupu asalha xine jukhu pesü shiye kümtsü shokümzü chekeno, li ye ikiqivae.”

⁹ Itaghi kungumi atüghüu pama shelo küpape ghi aküthüu no asütsa kuloghi shi sheshu ighi, “Khuana no tüghashi ngo tipau julho mllave, eno akishe lo momu au lo amchipu shive aye,

¹⁰ azü temokeu tsaiji toi pa jukhu lo Alhou loghu akümkau lesü no pije nani, eno kungumi kimthemi ngo Ambeti zülono ami eno amichu pesü ghimeqhi piti nani.

¹¹ Panongu pitikeu michhi ye pülhapuju eno alholo phoiku anani. Tüghashi eno tipau julho kümllami, eno khukhumu tipau michipu ithuluve kemi ye putho lo na puchou namu akulhokiqhi ithumla nani.”

¹² Hi ye küpülümi khunono Alhou zakütsü pelu no Jisü lau aküpülü acheni keno tipaqo pelo kutuokutuu peniye kukeu ke.

¹³ Tishino kungugha lono asütsa lakhi I no chilu: “Hi yelo, hinguno hilau ye khunono Ampeu laumi shi thiveni keno akümghapue.” Aghungu no piqatsü, “Iyei akümghapue, panongu ye pano ghime lono akulhoqhi luniae, kughengu panongu kümla no pano pape chenie!”

Ayeghi Shou Ghilekuhu

¹⁴ Itaghi I no pishipuwo jukelo khüngküsü metsüghoi ke lakhi ithulu, eno timi nu toike lakhi no tipau shou iqa no ameshoyi kütsükuqho pusü pa u lo ayevü kütsügha lakhi pecheghi.

¹⁵ Tile kungugha chineki lono kungumi kütau lakhi ipeghi, eno asütsa vekipighi khuu khüngküsü shou iqa akeno pa vilo pi: “O yevü pesü ghothulo, kughengu aghibo kugho ghuloki ye ighivae, eno ayeghi shou ghile hukepu do ghi tovae.”

¹⁶ Ikehu khüngküsü shou iqa akeu no aqha kümtsü lo pa yevü peitha thuve no ayeghi gholu khave.

¹⁷ Tithiu kungugha chineki lono itaghi kungumi lakhi ipeghi, eno pa ghi ayevü pecheghi.

¹⁸ Itaghi kungumi lakhi khuu ami shou yepeu keno pa no akiptia lono ipeghi no ighamku ayevü kütsügha kipeu kungumi vilo pi, “O yevü pesü ayeghi lo atsaipho ghokike lo, kughengu tipau tsaithiqo ye nivae.”

¹⁹ Ikehu kungumi huno aqha kümtsü lo pa yevü peithathu, eno ayeghi lo atsaithi ghile lupusü atsaithi kütsüghü bohu kije lo Alhou loghu ikughi peniye vesüve.

²⁰ Eno mishighüna khalau no atsaithi qothu kelo tipau lono aji qoipeghi keu no auxakuchho kinia toike vesü ikughi, eno qowu keu no kilometer aqhe küthü kutolo wuve.