Piyeküsü 13 - Sumi Naga CL (Re-edited) Bible (BSI)

Tüghashi Atüghüu

¹ Tithiu tüghashi lakhi akibo chighi, tipaqo lo kükakütsüqho aküphashi xapu, eno akütsü tsüni, tipaqo lo küthaküghapu je heda pusü azüghi lono ipe cheghi keu I no ithulu.

² Tüghashi tipau ye akhighiu ngushuu mihi; apukhu no ava pukhu toi, eno akichi no abongshuu kichi toi. Dragon no pa kumto, pa kükalakhü eno kükagha kuloghi pesü tüghashi tsüve.

³ Akütsü lakhi ye akithipu ghüzaku toi xapuae, ikemu aghüzaku ti ye kuuve aghi, ayeghiqha no mzamghalei tüghashi pape wuve.

⁴ Timi kümtsü no dragon mllauve, kughengu pa no kükagha pesü tüghashi tsüve ke, eno panongu no tüghashi ghi mlla ghi pi; “Tüghashi toike khuu ani kea? Khuu no tipau sasü kichighilu nani kea?”

⁵ Tishino aqheküza eno küthakügha tsa jeli pikulupu kichi pesü tüghashi tsüve, itaghi aqhi lhobidi kini kutolo pa küka peithalu penike azah tsüve.

⁶ Tüghashi no Alhou lau küthakügha tsa piniye akichi xükho, eno Alhou je, Pa kungo-a, eno khunoqo tile acheni keno, tipaqo kümtsü thaigha thuve.

⁷ Itaghi tipau pelo küpülümi shou aghü küpüghü no toluve penike azah tsüve. Ashiaye jeli, timi mqo, atsa eno shiyeqo shou aküka peithalu penike azah tsüve,

⁸ eno Ambeti Khuu ghiqhive keno Paw aküxüpu kaku lo khunoqo je ayeghiqha boqha ghomphi lono yepuku püaghimo keno tipaqo thaqhü no tüghashi mlla nani.

⁹ Khukhumu akini akeu no chilulo:

¹⁰ Khuana küghaluve penike kughuve aghi aye, pa ye akughu lo wuve cheni; khuana azütakikihi no ghiqhive penike kughuve aghi aye, azütakikihi no pa ghiqhive masae. Hi ye küpülümi pelo kutuokutuu eno aküpülü apeniye ku anie.

Tüghashi Akiniu

¹¹ Tileno ambeti toi akibo kini eno dragon toi atsa pikeu tüghashi kütau ayeghi lono ipe cheghi keu I no ithulu.

¹² Tino tüghashi atüghüu küka kümtsü pa zülono peitha, eno ayeghi lo küami pelo akithipu ghüzaku lono viluve keu tüghashi atüghüu mllape.

¹³ Tüghashi akiniu no amchipu kije, atsütsü lono ayeghi lo ami piqikeu kutolo shipe timi zülo piye,

¹⁴ eno tipau pelo tüghashi atüghüu küa lono amchipu jeli mla penike azah tsüve kehu pa no ayeghi lo küxümi pishiqhi, panoqo vilo azütakikihi no ghüza kemu xüluve keu tüghashi ghenguno ajulho shilo pi.

¹⁵ Eno ti tüghashi julho lau atuthu shesütsü penike azah pa tsü, tishianguno ajulho no atsau ghi pilu, eno khunono tipau mllamo keno pithive peniye ke.

¹⁶ Tüghashi huno itaghi kijemi kitilami, kinimi kumlhomi, tsügha püakemi ililai kemi kümtsü pelo au ajeu momu akishe lo amichi shipeni keu shive,

¹⁷ ikehu amchipu, ti ye tüghashi je momu tipau je kikihi, aghimo kelo khunomu qhü-limla peniye ke.

¹⁸ Hi ye alokütsü shi peniye ghutu ani: khuu no vethakulu ani keno pa no tüghashi kikihi kiqikuto julo, kughengu ti ye timiw kikihi ke, pa kikihi ye 666.