Piyeküsü 12 - Sumi Naga CL (Re-edited) Bible (BSI)

Atotiu Eno Dragon

¹ Tishino atsütsü lo amchipu kije lakhi ipeghi: totimi lakhi no khetsünhe pepu, apukhu no aqhi nepe no ayepu chighikini pesü dakeu kütsükuqho xapu aghi.

² Li ye mishipusü apunu küsü ghügha shino aghime launo ighaqa ae.

³ Itaghi atsütsü lo amchipu kije kütau lakhi ipeghi, dragon kije lakhi huchuyi shino akütsü tsüni, akibo chighi eno kükakütsüqho tsüni aküphashi xapu aghi.

⁴ Pa shomhi no atsütsü lo ayepu kikije küthü lo lakhi ghokütsü luve no ayeghi lo küzaqhive. Pa ye atotiu khuu no pununi ye akeno li no punu keu nga tsüchu nike li zülo puthugho ae.

⁵ Li no kiptimi punuve, anu khuu ayiküsü pesü shiye kümtsü shou ayepeni keu lo akeno pa huke. Ikemu anu huye Alhou eno Pa kükalakhü-a lo mxape ikuve,

⁶ eno atotiu ye atsala 1,260 kutolo yenguyike-a lono tucho peniye Alhou no khile kuto püatsü keno, tilau pove.

Ayeghi lo Satan Vepiqive

⁷ Ikelo kungugha lo aghükishi ipeghive, Michael ngo paw kungumiqo no dragon sasü küpüghü. Dragon ghi paw kungumiqo sasü mjochile,

⁸ ikemu pa ye theqhive, eno tithiu ye kungugha lo panongu-a kühave.

⁹ Dragon kuloghi huye küghape vepiqive, ti ye mulholo pighi, khuu pesü tüghami eno Satan ipi cheni keno, ayeghiqha kuchopu pishikiqhiu—pa küghape paw kungumiqo gholono ayeghi lo vepiqive.

¹⁰ Eno kungugha lono asütsa kuloghi lakhi I no chilu, “Itehi ni Lhou kükaqha, xakulupu, aküka, eno Paw Messiah kükagha ye ighivae, kughengu khuu no ni Lhou zülono putho pucho ni thiküzü chelimi nguku chekeno, akipimi kütsüu ye hape vepiqivae.

¹¹ Ni thiküzü chelimi no pa shou tolukeu ye Ambeti ji eno pano küxü shepe tsa lono ke; kughengu panongu ye akithi kutolo mu pano küxü küpümo ke.

¹² Tighenguno alovilo, O nongu kungugha lo akeqo! Ikemu nongu ayeghi lo eno azüghi lo akeqo hasapuae, kughengu tüghami ye pa do ikhonheive keu ithi no shishe axuidesü nongu lau iqivae!”

¹³ Kughou dragon no pa pesü ayeghi lo vepiqive keu ithive keno, pa no atotiu khuu anu punu keno li hathuve.

¹⁴ Ikemu li lau alhuqu kije chishibo kini tsüpüa kehu tino li pelo apighi launo yewo yenguyike-a lo ampe küthü tüxa kutolo khileno li loji peniye kuto püatsü keno, tipa-a tolupe.

¹⁵ Apighi no züqozü pesü atotiu yipe wuve peniye pa kichi lono aghoki toi azü qopipe.

¹⁶ Ikemu ayeghi no atotiu kukuphu shi ighi no pa kichi mukupe dragon kichi lono qopipe keu zü munove.

¹⁷ Tileno dragon ye atotiu jupe axuideve no li polo kughukomi khunono Alhou zakütsü pecheni eno Jisü shepe shicheni keno kümtsü sasü aghü shiniye wuve.

¹⁸ Eno pa ye azüghimkü lo asaye shou puthughove.