Piyeküsü 11 - Sumi Naga CL (Re-edited) Bible (BSI)

Ashepemi Kini

¹ Tishino aqheküsü toike akimghipu süta lakhi pesü I tsüno I vilo pi, “Ithu no Alhou chineki eno akiptia ngo tile mlla chekemi mighi julo,

² ikemu achineki khala ye mighi kevino kopheve lo, kughengu ti ye Alhou kümthami shiye lau ikhiphe tsüvae, eno panoqo no aqhi lhobidi kini kutolo Akimthe phughi neda qoda nani.

³ I no kükagha pesü I shepemi kini tsüni, eno pama no kumshophi pepusü atsala 1,260 kutolo tungkuptsa sheshu nani.”

⁴ Hi pama ye ayeghiqha Mpeu zülo olive sübo kini eno akulu kibepu kini puthugho achekeu huke.

⁵ Khukhumu pama ghüzani ye shi aye, pama kichi lono ami ipeghi no aghümi pitive nani. Khukhumu pama ghüza keu ye akithi za hitoi keu sholupe nani.

⁶ Pama ye atsütsü khaluve kepu küka ani, tishikeu lono pama no tungkuptsa piake tivilo tsüghu move nani, pama ye azüghizü pesü aji kughulhove kepu küka ghi ani, eno pama pulou lono püsa jeli pesü ayeghi shou vepukulu kepu küka ghi ani.

⁷ Kughou pama no ashepe shikhaveni keno, akuthoku lono ipeghi keu tüghashi huno pama sasü aghüshi thuve nani eno pama theqhive no pithive nani,

⁸ eno pama sükumo ye aphughi khileno pano Mpeu yeda pithive keno, akiqipu tsa shi ghi Sodom eno Egypt ipi chekeu phughi laghi lo qhinani.

⁹ Atsala küthü tüxa kutolo timi jeli, ashiaye, atsa, eno shiye jeli no pama sükumo lo jupuku no pewo shiqhoni keu ghi lakha nani,

¹⁰ eno ayeghi lo xüküami no pama ghenguno alovi ilhe no agho pesü tsükile nani, kughengu tungkupmi hi pama ye ayeghilomi kijiküpsau ke.

¹¹ Ikemu atsala küthü tüxa thiu pama lolo Alhou launo ighikeu aküxüpu tuthu ilove no pama ye puthugho luve, eno khunono pama ithulu keno akümsapu kije no pano shou ikughive.

¹² Tileno pama no asütsa kuloghi lakhi atsütsü lono pikeu chilu, “Hilau ikughilo.” Pama ghümiqo no ithulu ghi pama ye khüngküsü lono kungugha lo ikuve.

¹³ Tipa tüqhüdo lono shishe ayeghi ilüuve, eno aphughi kikije chighi lo lakhi ye kütsave. Ayeghi küghütha lono timi 7,000 thive, eno achili aghi keqo ye thüghüive no kungugha Lhou lau ajekipi juküvü tsüe.

¹⁴ Ahasapu akiniu ye wovae; julo, itehi ye aküthüu kighitheno cheni.

Afuko Akütsüniu

¹⁵ Tileno kungumi akütsüniu no pa fuko küigha kelo kungugha lono asütsa vekipighi pi, “Ayeghiqha yekipe ye ni Mpeu eno Paw Khristo yekipe shivae, eno Pa no alholo eno pülhapuju ayepe nani.”

¹⁶ Ikelo layemi muku bidi khunoqo Alhou zülo kükalakhü lo iqa acheni keno panongu no itsaqi agi no ayeghi daluve no Alhou mlla ghi

¹⁷ pi, “Ampeu Alhou akughushuu, Khuu acheni eno acheghi keno, Nino O shikimthi ani, kughengu Nono O küka kije ikhiluve no ayepe thuvae.

¹⁸ Shiyeqo no axuide anamu O loghu kighide ighivae, kithimi shou küghathabe kepu do shivae, tungkupmi O qemi, küpülümi, eno khunono O sümsa cheni keno, kijemi kitilami ajume tsünike, eno ayeghiqha shiküpsami shipüsa nike ighivae.”

¹⁹ Tileno kungugha lo Alhou chineki khaqhi eno tilehi Paw Puloshoqhi bohu akeu ithulu. Ikelo tsütsüküsü küvü no phaphashi, vekipighi igha, ayeghi no ilüuve no mürasü kuloghi ghuqhi thuve.