Piyeküsü 10 - Sumi Naga CL (Re-edited) Bible (BSI)

Liküküzü Kaku Aghulou

¹ Tileno I no kungumi kughushu kütau lakhi kungugha lono milisü no pa kütsü shou vehope khüngküsü no küzüpe iqi cheghi keu ithulu, pa gi ye khetsünhe toi eno pa pukhu no ami tsükucho toike.

² Pa ye liküküzü kaku aghulo lakhi au lo xükhope ae. Pa pukhu ajeu no azüghi lo nepe, piyiu no ayeghi lo nepe,

³ eno abongshuu ghügha toi asütsa kuloghi lono asheshu. Pa no asheshu kelo tsütsüküsü tsüni huno igha.

⁴ Eno kughou tsütsüküsü tsüni no igha keno, I no yeniye shikemu atsütsü lono asütsa lakhi no pikeu I no chilu, “Tsütsüküsü tsüni no kiu pive akeno mekhape qhivelo, eno tipau yepeqhi kevilo.”

⁵ Tileno kungumi khuu azü eno ayeghi shou puthugho akeno, pa u ajeu kungugha lo chhopuku keu I no ithulu

⁶ eno Khuu alholo eno pülhapuju xü acheni, Khuu no kungugha, ayeghi eno azüghi ngo tile ache keqo lho keno, Pa je lono tushoqhi ghi pi, “Itehi ye süpushu moae,

⁷ ikemu kungumi akütsüniu no pa fuko küighani keu ghuloki lono Alhouw tuqhou küsü püakeu shikupu nani, ti ye Pa qemi tungkupmi lau kütüghü püakeu kiqi lono ke.”

⁸ Tishino kungugha lono asütsa I no chilu püakeu huno itaghi I vilo pi, “Wulo, eno kungumi khuu no azüghi eno ayeghi shou puthugho ani keno, pa u lono liküküzü kaku lhaphe püakeu ikhilu lo.”

⁹ Ikehu I no kungumi lau wuno pa vilo liküküzü kaku aghulou hu I tsü penike khu. Pa no I vilo pi, “Luvelo, eno ti chulo; hi no o polo khumtsai nani ikemu o kichi loye akhingozü toi ngonyi nani.”

¹⁰ I no kungumi u lono liküküzü kaku aghulo hu ikhipe chuve. Ti ye I kichi lo akhingozü toi ngonyi michelu, ikemu I no ti chusü kelo I po no khumtsaive.

¹¹ I vilo highi pi, “No ye itaghi ashiaye, shiye, atsa jeli eno kükami kutomo lau tungkuptsa pimasae.”