Piyeküsü 1 - Sumi Naga CL (Re-edited) Bible (BSI)

Hukuthu Tsa

¹ Hi ye asheazü lo kiu shiniye ani keno Alhou no Pa qemi piye penike Jisü Khristo tsükeu piyeküsü ke. Khristo no Paw kungumi vecheo tipau pesü Pa qeu John lau kilethitsü,

² ikehu John no Alhou tsape eno Jisü Khristo shepekishi ithulu keu kümtsü pesü ashepe shitsü ani.

³ Khuu no asütsa süqhe ghi tungkuptsa hipau phisüni keno akümghapu, khunono chiluni keno akümghapu, eno khunono tipau lo yepüakeu peluni keno akümghapue, kughengu ado ye kupunuvae.

Akukuhou Tsüni Lau Petha

⁴ John no Asia bocho lo akukuhou tsüni lau: Küpükini eno aloino keu tsülu ani, ti ye Alhou Khuu acheghi, Khuu acheni eno Khuu ighi nani keno Pa launo ighikeu, Pa kükalakhü zülo akimthe ghungu tsüni akeqo launo,

⁵ eno pükhükulupu thopiu, akithi lono xüputhu tüghüu, ayeghi lo kükami shou Yepeu, Jisü Khristo launo ighikeu pesü nongu tsü ani. Khuu no ningu kimiye cheni, eno Pa ji vecheo axine lono ningu kuqhophepe

⁶ Pa Lhou eno Apu huthu peniye ningu pesü achinemi kükaqha lakhi toi shitsü keno, Pa lau alholo eno pülhapuju ajekipi eno aküka apelo. Amen.

⁷ Julo, Pa ye khüngküsü lono cheni, Pa qhuqhi kemiu ghi süno kümtsü nhethi lono Pa ithulu nani; eno ayeghi lo ashiaye jeli kümtsü no Pa ithulupe ighaqa nani. Tishi peniu, Amen.

⁸ “Ni ye Alpha eno Omega, Khuu acheghi, Khuu acheni eno Khuu ighi nani keno, Akughushuu huke” ipi Ampeu Alhou no pi.

Timi Nu Ithukulu

⁹ Jisü laumi shino aghime kitikhi shi Alhou kükaqha ghenguno kutuokutuu puqhe chekeu nongu küsau eno athiküzüu, ni John, ye Alhou tsape eno Jisü shepekishi ghenguno Patmos ipikeu züdoyeghi lo ake.

¹⁰ Ampeu Tsalani I no Aghungu lono kuposhu akeloye I thiu afuko toi asütsa lakhi no vekipighi pikeu chilu,

¹¹ “Nono kiu ithulu keno kaku lo yesülo eno akukuhou tsüni, Ephesus, Smyrna, Pergamum, Thyatira, Sardis, Philadelphia, eno Laodicea lau tsüpuwu lo.”

¹² Tileno I pütsa akeu sütsa küdau juniye I no tsüghü ighi kelaye ameshoyi kulukibepu tsüni ithulu,

¹³ eno tipau mta lo Timi Nu toike lakhi, chijeboike phi kushuo pepusü ameshoyi mlaküxa no pa mla vehopu aghi.

¹⁴ Pa kütsüsa ye metsüghoi asüpha kimiye, mürasü toi. Pa nhethi no ami mili toi,

¹⁵ Pa pukhu no alazayi ghukimthepe phuphushi aketoi, eno Pa sütsa no aghoki kuloghi ghügha toike.

¹⁶ Pa u ajeu no ayepu tsüni pe, Pa kichi lono putoputo züta ipeghi, eno Pa gi no khetsünhe kümka toi vüae.

¹⁷ Kughou I no Pa ithulu keno ni ye thive keshi Pa pukhu philo ikiqive. Ikemu Pa no Pa u ajeu pesü I shou beno pi, “Msa kevilo, Ni ye Atüghüu eno Ashekhau,

¹⁸ eno Xüküau huke. Ni ye thive kemu itehi ye alholo xüauvae. Akithi ngo Kithigha khaqhiyi ye I u lo ani.

¹⁹ Ikehu nono ithuluve keu, ithulu akeu eno hipa thiu shiniye akeu thime jeli kümtsü yelo.

²⁰ I u ajeu ayepu tsüni pe akeu eno ameshoyi kulukibepu tsüni nono ithuluve keu lo tuqhou vehu akeu ye hike: ayepu tsüni huye akukuhou tsüniw kungumi eno akulukibepu tsüni huno akukuhou tsüni ke.”