Philemon 1 - Sumi Naga CL (Re-edited) Bible (BSI)

Pethakütsü

¹ Paul, Jisü Khristo ghenguno akughushi akeu eno ni thiküzüu Timothy no, Ningu kümtsa mla achekeu eno qhuivü chekeu Philemon,

² ni chepukishiu Apphia ngo Khristo ghüshimi Archippus eno o kilo akukuhou akeu lau ye ani:

³ Ni Pu Alhou eno Ampeu Jisü Khristow küpükini ngo alokiqipu pesü tsü ani.

Philemon Kikimiye eno Aküpülü

⁴ I no akighini shikelo alhokuthu o kümsülu eno I Lhou shikimthi acheni,

⁵ kughengu nono Ampeu Jisü lau eno küpülümi lau ow kikimiye eno aküpülü akeu I no chilue.

⁶ Nono o küpülü kütami sasü küsaje keu lono Khristo ghenguno ningu lolo akivi chhitoi akeu kümtsü ithitoilu penike I no inikhu ani.

⁷ I thiküzüu, ni ye o kikimiye lono alokivi eno alokughuno shishe ithuluvae kughengu o vecheo küpülümi ghüthi püxü tsüke.

Onesimus Ghenguno Qhüiniju

⁸ Tishi kehu Khristo küdau no ni ye akumto shino kiu shikepu keno azah o tsü kulupu shiani,

⁹ tishimu kikimiye ghenguno, ni ye o qhüinijuni keu shivae—ni Paul, layemi lakhi eno itehi Khristo Jisü ghenguno akughumi shi akeu—

¹⁰ I no I nu Onesimus, khuu I no akughushi akelono papu shilu keno, pa ghenguno o qhüiniju ani.

¹¹ (Püzüu ye pa ye o ghenguno avehupu shimla ke, ikemu itehi ye o ghenguno eno I ghenguno ghi, kuchou no pa avehupu shivae.)

¹² I no ni ampi mlo tsüpuwu aketoi o lau pa kighide puwo ani.

¹³ Ni ye amlokiqi shi I gholo pa qhinishi ae, tishianguno I no atsakiviu ghenguno akughu shi akelo o züqhushi pa no I kuphutsü peniye ke,

¹⁴ ikemu nono polumo kelo ni ye kiumu shimoni keu shivae, tishikeu lono o kivi ye anguka lono kumono o pulou lono ipeghi peniye ke.

¹⁵ Kughengu pa no ado hami o launo kütüta shive keu ye o pelo alhokuthu ghenguno pa sachile luve peniye shi aghiluvi ke,

¹⁶ ti ye aqüaxemi gholau no kumoe, ikemu aqüaxemi nguno alau qhuivü keu thiküzüu toilu peniye ke. Pa ye ashi lo eno Ampeu küdau ghi I qhuu ke, ikemu tinguno alauno o qhuu ke.

¹⁷ Ikehu, ni ye o poshuu kepi nono kihi aghi aye, ni ikhilu aketoi pa ikhilu tsülo.

¹⁸ Tsala pa no o lau kiuala akumou shi püaghi momu o pi puaghi aye, I no lochile nanie pi kihivelo.

¹⁹ Ni Paul no, I u no hi ye ani: I no lochile nani—I no o piputo akepu küha kemu kuchou loye nou no I pi puanie.

²⁰ Enoma, athiküzüu, ni ye o launo, thime hami ala shinishi ani thono. Khristo lono I ghüthi püxü tsülo.

²¹ I no kiu pi ani keno no ye tinguno alau ghi mla nani kepi o ghokulu ithi ghi ni ye o lau ye ani.

²² Hipau gholono, I ghenguno achebo lakhi kuto püaghi lo, kughengu I no laju anike nongu kighini vecheo küpükini no I sasü nongu lau ighi nani.

Ashekha Petha

²³ Epaphras, Khristo ghenguno kümtsa akughushi akeu no petha nongu tsü ani,

²⁴ tihutoi I gholo kümtsa mla chekemi Mark, Aristarchus, Demas, eno Luke no petha nongu tsü ani.

²⁵ Ampeu Jisü Khristow küpükini no nongu ghungu gholo apeniu!