Obadiah 1 - Sumi Naga CL (Re-edited) Bible (BSI)

¹ Obadiahw kungunhetsü. Ampeu Alhou no Edom ghenguno pitsü: nino Ampeu launo atsape chiluvae, atsapeu lakhi shiyeqo gholo puwuvae: “Ithulo! Ningu li mjochile aghü shini nolo!”

Edom ye Kuchunive nani

² Julo, I no o pesü shiyeqo dolo aghulo shive tsüni; eno o jukünatha peni.

³ O mlo lo aqheküza no o pishiqhivae, no khuu atuki qhemghai keu lo xü acheni keno, nono o mlo lono ishi pi cheni, “khuu no ayeghi lo I saiqighi kulupu kea?”

⁴ Nono alhuqu toi kunguu yecheghi na, ayepuqo gholo o püsü shipüaghi namu, tilauno I no o sünhe saiqighive nani, Ampeu no shuphevae.

⁵ Tsala küpkami no o lau ighi aye, xulepuwuve chekemi no putho lono ighi aye, no ye kishi kütsaveni chekela! Panongu ye pano sala likhi püka luveni cheke kumo? Atsaithi xoni kemi no o lau ighi aye, panongu ye xokhakumo qhiveni cheke kumo?

⁶ Esau küakini pekütsü püakeu, kishi hakho luve tsü kelae!

⁷ O ngulami kümtsü no o lughi kutolo o haphe puwuvae; o sasü külashi ache kemi no o pishiqhivae; panongu no o mhoqhivae; o sho chuche kemi no o zülo alichhe kuto püanie— no ye vethakulu kühavae.

⁸ Ampeu no pi ani, tipa tsalani, Ni ye Edom lo alokütsümi eno Esau Naghuto lono vethakulumi kütsave moni keshea?

⁹ Eno ow akumtomi ye aghüthi süve nani, O Teman, tishino Esau Naghuto lo timi kümtsü ghiqhi khave nani.

Edom no Jacob shou Kütsakungo

¹⁰ O thiküzüu Jacob shou kütsakungo ke ghenguno, akukujo no o küzüluve nani, eno pülhapuju ghenguno o sasü ayigheve nani.

¹¹ Nono qhemghai ake ghuloki lo, inami no khagho lo iloghi no Jerusalem ghenguno asaqhike tsalani, eno inami no pa küakini pewuve akelo no ghi panongu toiveke.

¹² Ikemu o thiküzüu nguküsa tsala lo pa ju anheshu kelauno alovi kevilo; Judah timi shou kütsakungo keu tsala lo alokivi shi akevilo; aghime tsala lo qheza kevilo.

¹³ Iw timi mhekiqi tsala lo panow khagho lo ilo kevilo; pa mhekiqi tsala lo, paw küsakusho jupe anhekushu lono alovi kevilo; pa mhekiqi tsala lo pa küakini lepuwuve kevilo.

¹⁴ Aghime tsala lo ghükulumi küghaluve tsü kevilo; pokichemi lakha luve niye alapa lo ngokhe kevilo.

Ampeu Tsala ye Kupunuvae

¹⁵ Kughengu Ampeu tsala ye shiye kümtsü kupunuvae. Nono mlake toi o lau mla nani; o kümla ye o kütsü lo ideikughi nani.

¹⁶ Kughengu I kimthe toghi lono nono shomzü ikehu shiye kümtsü no shomzü kibe nani; panongu no shopusü munove no khilemu tishimo ketoi nani.

¹⁷ Ikemu khunoqo no pokalu keno Zion toghi lo anani, eno ti ye akimthe shi nani, Jacob laghami ye pano mheghi ithuluve nani.

¹⁸ Jacob laghami ye ami toi nani, Joseph limi no amiküqü toi nani, eno Esau kibolomi no aghijini; panongu no tipaqo piti pühave nani, eno Esau kibolomi ye ghükulumi kühave nani, kughengu Ampeu no piqhivae.

Ampeu Kükaqha

¹⁹ Negebmi no Esau toghi qhasü luve nani, eno Shephelahmi no Philistiami yeghi qhasü luve nani; panongu no Ephraim ngo Samaria yeghi qhasü luve nani, eno Benjamin no Gilead yeghi qhasü luve nani.

²⁰ Haküghütsüve kemi Israelmi aqokitikhi no Canaanmi yeghi Zarephath kutolo qhasü luve nani, eno Jerusalemmi haküghütsüve kemi Sepharad lo akeqo no Negeb phughiqo qhasü luve nani.

²¹ Xaluve kemi no Esau Toghi lo ayepe nike Zion Toghi lo iku nani, eno kükaqha ye Ampeuw shive nani.