NEHEMIA 9 - Sumi Naga CL (Re-edited) Bible (BSI)

Israelmi no Axine Piphe

¹ Atsala muku abidini Israelmi no yeqhiyephi pepusü ayeghimkhu epe akütsü lo puku no kümvü ae.

² Panongu kümtsü no inaghami launo kütüta shive no puthughope pano xine ngo apuasüqo xine piphe.

³ Panongu no puthughope ayikihedo küthü kutolo panongu Mpeu Alhou Yezah phisü; eno itaghi ayi kihedo küthü panongu xine piphe no Ampeu Alhou mllae.

⁴ Levimi khache kighe lono Jeshua, Bani, Kadmiel, Shebaniah, Bunni, Sherebiah, Bani eno Chenani noqo no puthughope ighamku pano Lhou Ampeu lau inikhu.

⁵ Tishino Levimi Jeshua, Kadmiel, Bani, Hashabneiah, Sherebiah, Hodiah, Shebaniah, eno Pethahiah noqo no pi, “Puthugho lo eno alho lono alholo Ampeu nongu Lhou shelo. O jekipi je sheqhelo, kughengu O je ye shekiqhe eno akishe kümtsü nguno akiqheu lo peqhe püanike.

⁶ “O likhi no Ampeu ke; Nono kungugha eno atsütsü, aqhi ayepu, ayeghi eno tile thokha thime, azüghi eno alou thokha thime, kümtsü lhoke; Nono ti kümtsü püxüpe qhike; eno kungugha lo aküka jeli no O mllae.

⁷ No ye Ampeu Alhou, Abram kishelu no Chaldea lo Ur lono pa saipeghi no Abraham ipi pa je kutsü keu huke.

⁸ Pa mlo no O shou pükhükulupu shikeu Nono ithulu kehu Canaanmi, Hittimi, Amorimi, Perizimi, Jebusimi, eno Girgashimi yeghi pesü pa lagha tsüniye pa sasü puloshoqhi shike. Eno Nono Ow pikiqhitsa papeke, kughengu No ye amikucho ke.

⁹ “Nono ni puasüqo no Egypt lo kishi aghime shi keno ithulu eno Akuhu Züghi lo panongu no ighamku keu chilu tsüe,

¹⁰ Pharaoh ngo pa qemi kümsü eno paw timi kümtsü shou amchipu ngo akümzapu kümla mlae, kughengu panongu no ni puasüqo shou qheza keu Nono ithi ae. Tilauno Nono O je shikeu ishi kutolo anie.

¹¹ Nono panongu zülono Azüghi kijeve tsü, eno ayeghi qhaikeu lo nepuku ghi Azüghi mta lono Nono panoqo sawue. Eno atu pesü azü kutho lo vesü ketoi, panongu haighi keqo ye Azü kutho lo vesüve.

¹² Puchou no khüngküsü tsükucho shi Nono panongu sache, eno putho lono ami tsükucho shino alaghi yepüvü panongu sawuke.

¹³ Nono Sinai Toghi shou iqighi no atsütsü lono panongu pütsa eno achipiu ngo kuchou khuaye, akivi eno azakütsü pesü panongu tsüe.

¹⁴ Nono O kimthe Sabbath panongu pelo ithilupe, eno O qeu Moses vecheo Nono O Yezah panongu tsüe.

¹⁵ Panongu müzü ghenguno kungugha lono asho tsü, atüghü ghenguno atuqu lono azü tsüe. Nono panongu tsünike tushoqhi keu yeghi lo ilo no qhasü luvelo pike.

¹⁶ “Ikemu panongu eno ni puasüqo no akuchhoma shi pano kütsü kughove eno O zakütsüqo pape move.

¹⁷ Panongu no agholu move, Nono akümzapu kümla shikeqo shou amlo tsümove no panongu kütsü kughope Egypt qüaxe lo idewove nike pano sakipheu kisheve. Ikemu No ye axine qhikütsü Lhou ke; No ye küpükini eno kimiyekiniu, asheshi no amloide kicheu eno kikimiye no pofushi achekeu Lhou kehu panongu pheve moe.

¹⁸ Panongu no ameshoyi no amshiti julho mlano pi, ‘Hi no Egypt lono nongu sasü ipeghi keu lhou ke,’ eno küthakügha kije shi keghi,

¹⁹ Ow kimiyekini shishe kije akeu vecheo, No ye asayeqha lo panongu pheve moe. Khüngküsü tsükucho, puchou pano sasü chekeu no panongu launo kühave moe eno titoi ami tsükucho, putho lo panongu laghi yetsü chekeu hu ghi panongu pheve moe.

²⁰ O Ghungu kivi Nono panongu tsü, pano launo Ow manna süchileve moe eno pano tüghü ghenguno azü tsüke.

²¹ Nono asayeqha lo ampe lhobidi panongu püxüpe qhi, eno panongu ye kiumu püqümoe. Pano phimini ye aqa shivemoe eno pano pukhu ye inguuve moe.

²² “Nono kükaqha ngo ashiayeqo eno ayeghi cheku kümtsü pano tsüke. Ikehu panongu no Heshbon kükau Sihon kükaqha eno Bashan kükau Og kükaqha leluve ke.

²³ Nono atsütsü lo ayepu jehi, atianuli kutomo pesü panongu tsü, eno pano puasüqo vilo wuno küghüna lo pikeu yeghi lo panongu sailoke.

²⁴ Ikehu panongu no ilo no ayeghi tipau leluve, eno Nono panongu zülono Canaan yeghi eno tipaqha lo kükami ngo ashiaye kümtsü pesü panongu u lo süvetsü eno panongu pelo pano ghoshi Canaanmi peitha peke.

²⁵ Panongu no aliwo kuptu phughiqo, aghüma yeghi, thime kivi akeu kiqo, azükikhe chhu püakeu, atsailu, olive ghutu, axathibo kupukuno shi akeqo kümtsü hakholu. Panongu no aghapiqi chu no O kivi lo alopiqilu.

²⁶ “Ikeghi panongu no O gholu mono O hebide eno O yezahqo pano zübou qhive. Tungkupmi khunono pano pelo O lau ideighi penike kütüghü keno, tipaqo pithive tsü, eno shishe O küthakügha shike.

²⁷ Tighenguno Nono pano ghümi u lo panongu süve tsüno aghime shipe. Eno aghime lono panongu no O lau ighamku, tileno Nono kungugha lono chilu tsüe. Ow kimiyekini kije kiqi lono Nono xakulumi panongu tsüno tipaqo no aghümi launo panoqo xaphelue.

²⁸ Ikemu kughou akulho qhilu keno panongu no itaghi axine shikithe, eno Nono pano ghümi pelo itaghi pano leluvepe. Ikeghi panongu no xaide ighi no O lau ighamku kelo, Nono kungugha lono chilu tsüke. Ghuthu kutomo Nono panoqo xaphe.

²⁹ Nono O Yezah lo sachile ighi niye panongu kütüghü, ikemu panongu no aqheküza shino O zakütsüqo papemo no axine shive. O zakütsü hipaqo ye timi no pape aye aküxüpu ani, ikemu panongu no kuthovi eno akuchhoma shi agholu move.

³⁰ Ampe kutomo Nono panongu lau kheakulu shino tungkupmi vecheo O Ghungu no panongu kütüghü ke. Ikeghi panongu no initsü moe, tighenguno Nono ashiayeqo pelo pano leluve peke.

³¹ Ikeghi Ow kimiyekini kije lono Nono pano püghave mo momu qhive moe. No ye küpükini eno kimiyekini Lhou ke.

³² “Tighenguno itehi, ni Lhou, akijeu, akumtou, eno akichiqhipu Lhou, puloshoqhi eno iqemokeu kikimiye pekupu chekeu, Assyria kükami ghuloki lono ishi kutolo aghime ni shou ikughi keu eno niw kükami, sakiphemi, achinemi, tungkupmi, apuasü, eno timi kümtsü shou ikughi keu jukuloti tsü kevilo.

³³ Tishimu ni shou ikughi ke kümtsü lo No ye amikuchoe, kughengu nino axine shive kemu, No ye pükhükulupu ke.

³⁴ Niw kükami, sakiphemi, achinemi, eno apuasüqo no O yezah papemo, O zakütsü lo amlo tsümo, eno ghutu keu tsa ini tsümoe.

³⁵ Pano kükaqha lou ghi, eno Nono akivi kije pano tsüke ghi, eno kinikülü yeghi kije pano tsüke ghi, panongu ye O qemo momu pano xeküsü kümla lono ideighi moe.

³⁶ Julo, ishi ningu ye aqüaxemi shi ani; Nono ni puasüqo tsükeu yeghi hipau lo küghüna no ni pelo tipau xathi ngo agho kivi jeli xochu peniye shikemu julo, ningu ye aqüaxemi shi anie.

³⁷ Eno ni xine ghenguno ayeghi lono kupukuno shi ipeghi keqo ye Nono ni shou qhi püatsü kemi kükami lau wuve anie. Panongu no ni phimpi eno niw lhoxü shou pano pulou lono ka auvae eno ningu ye shishe aghime kutho lo anie.

³⁸ “Hi kümtsü ghenguno ningu no puloshoqhi akumto hi yepeqhi ani, eno niw sakiphemi, Levimi, ngo achinemi je pesü kaku lo jemchi shipuku püani.