NEHEMIA 8 - Sumi Naga CL (Re-edited) Bible (BSI)

Ezra no Ayezah Phisü

¹ Timi kümtsü no Azü Khagho zülo kobidi-a lo lakhishi kumqo. Panongu no Ayezah kiyeu Ezra vilo Alhou no Moses vecheo Israelmi tsükeu Ayezah kaku pesü ighilo pi.

² Tighenguno aqhi akütsüniu atsala atüghüni achineu Ezra no Ayezah pesü kiptimi, totimi eno chilu no vethaluni kemi mishi zülo ighi.

³ Pa no Azü Khagho zülo puthughope kobidi küdau juno inaqhe no puchomghü kutolo kiptimi, totimi eno vethakulumi kümtsü lau phisü. Eno timi kümtsü no akini kughope tsaqüi Ayezah Kaku inie.

⁴ Tipani ghenguno mla püakeu asü khache lo Ezra no puthugho. Pa u ajeu no Mattithiah, Shema, Anaiah, Uriah, Hilkiah, eno Maaseiah no puthugho, eno pa u piyiu no Pedaiah, Mishael, Malkhijah, Hashum, Hashbaddanah, Zechariah, eno Meshullam no puthugho.

⁵ Timiqo no ithulu ghi Ezra no kaku lhaphe, kughengu pa no kümtsü nguno qhemghai keu lo puthugho ake. Pa no kaku lhaphe kemtsa kümtsü no puthughove.

⁶ Ezra no Ampeu, akughushu Lhou sheqhe eno timi kümtsü no au peqheno khochile, “Amen, Amen.” Panongu no akütsü pishiqhope agi no ayeghi daluve no Ampeu mllae.

⁷ Levi laghami hipaqo ghi timiqo lau Ayezah hepho piyekeu lo kuphutsü, Jeshua, Bani, Sherebiah, Jamin, Akkub, Shabbethai, Hodiah, Maaseiah, Kelita, Azariah, Jozabad, Hanan, eno Pelaiah.

⁸ Panongu no Alhou Yezah kaku lono mtsümishei phisü no timiqo no vethakulupu shi hepho piye.

Atsala Hipau ye Akimthe

⁹ Angh Nehemiah ngo Achineu Ezra gholo Ayezah kiyemi eno timi shika akeqo Levimi no timi kümtsü vilo pi, “Atsala hipau ye nongu Lhou Ampeu lau akimthe shikeu tsalae, tighenguno mloqa momu ighaqa kevilo.”

¹⁰ Pa no timiqo vilo pi, “Idewolo, achuqupu kivi chulo, akungo tsaizü yelo, eno küha kemi sasü küsaje lo, kughengu atsala hipau ye ni Mpeu lau akimthe shikeu tsala ke. Amloiju kevilo kughengu Ampeu lokivi no nongu kükakumto ke.”

¹¹ Ikehu Levimi no timiqo ghaküghüqü ghi pi, “Qümüive lo, kughengu atsala hi ye akimthe ke; amloiju kevilo.”

¹² Timi kümtsü no alokivi kije lono chusho eno kütami sasü küsaje nike wokhave, kughengu kiu pi keno panongu no vethaluve ke.

Apusho lo Ghulhu Pini

¹³ Atsala akiniu lo, ali lo akütsü thaqhü eno Achinemi ngo Levimi no Ayezah shika nike Ayezah kiyeu Ezra lau ighi.

¹⁴ Ampeu no Moses vecheo Israelmi vilo aqhi akütsüniu ghulhu ye apusho lo ngono pini masae pi azah tsükeu panongu no Ayezah lo yepüaghi keu ithulu,

¹⁵ eno hi ye aphughi kümtsü lo ngo Jerusalem lo sheshu masae pi vethalu, “Ato yeghi lo wulo eno olive, aghalo olive, myrtle, amsabo, eno asü kütau lokaqo pighepe Ayezah lo yepüake toi apusho mlalo.”

¹⁶ Timiqo no wuno alokaqo pighepe pütüta ki kütsüqa lo, aki khala lo, achineki khala lo, Azü Khagho kobidi lo, eno Ephraim Khagho kobidi lo apusho mlave.

¹⁷ Akughu lono ideighi no kumqo akemi kümtsü no apusho mlave eno tipaqo lo ngove. Nun nu Joshua ghuloki lono tipa tsalani kutolo, Israelmi ye khilemu tishi mphi, ikehu timiqo ye shishe alovive.

¹⁸ Tsalakipetsü atüghüu tsala lono ashekha kutolo pa no Alhou Yezah kaku lono phisü. Panongu no apusho ghulhu atsala tsüni kutolo ikhilu eno akütacheni ye azah tsü püake toi, mishi no kumqolu.