NEHEMIA 6 - Sumi Naga CL (Re-edited) Bible (BSI)

Nehemiah Shou Küsüqe

¹ Kughou Sanballat, Tobiah, Arabmi Geshem, eno ni ghümi kütami no ni ye akupuwu mlaqhivae eno hephove keu do lakhimu kühavae pi chilu keno, (kuchou loye khaghoqo lo ahukikha ye sümono ake),

² Sanballat ngo Geshem pama no I lau asütsa pi puwu, “Ningu Ono qa lo Hakkephirim lono kushoni ke ighilo.” Ikemu panongu ye I ghüzani ke kuchughu ae.

³ I no atsapemi panongu lau puwu no pipe, “Ni ye akhoto kümla shi anike tilau iqighi mlae. I no nokujo lau iqighi niye kushiye akümla lakhani kea?”

⁴ Pama no hitoi ghuthu bidi I lau puwu kemu ti kümtsü lo I no atho khochileve.

⁵ Tipa gholau no Sanballat no pa qeu launo mekhamo keu yesü pesü I lau ghuthu apunguu pi puwu.

⁶ Yesü hitoi yepüaghi: “Shiyeqo dolo kügha ani, eno Geshem ghi pi anike no eno Jewmi ye hebide nike kughu ani; tighenguno nongu ye akupuwu shiqhe ani. Eno atsa chikulu kiqilo nono panongu kükau shiniye ani.

⁷ Nono Jerusalem lo tungkupmi khami puwu no ‘Judah lo akükau ani,’ ipi o ghenguno sheshu peniye shie. Itehi ye akükau no atsa hipaqo chilu niae. Ikehu ighilo ningu akükümsü tsükileni.”

⁸ Ikehu I no atsapemi lakhi launo pi puwu, “Nono pi akeqo kiumu shi püamoe, ikemu nou no o mlo lono tipaqo iqiphe ani.”

⁹ Panongu ye ni shikümsa niye ishi kümsü ae, “Panongu ye au süchile niae eno akümla kishekha lumoae.” Ikemu, O Alhou, itehi I shikumto tsülo.

¹⁰ I no Mehetabel nu Delaiah nu Shemaiah pütsani ye wu, pa ye aki lo likhi ache. Pa no I vilo pi, “Nikujo Alhou ki, achineki alou no kushoni. Achineki hukikhaqo khaveni, kughengu panongu no o pithive niye cheni. Panongu ye putho lono o pithive nike chenie.”

¹¹ Ikemu I no pi, “I toi kemi ghi pokave masa keshea? Eno I toi kemi no aküxü xaluni ke achineki alou ilo masa keshea? Ni ye ilomoe.”

¹² Alhou ye Shemaiah puwu püamoe pi I no vethaluve, eno pa no I lau tungkuptsa pikeu ye Tobiah ngo Sanballat pama no piqe kepi phulu.

¹³ Shemaiah piqe keu ye I shikümsa no I pelo axine shivepe, eno I je shipüsave tsüno I shipütha niye ke.

¹⁴ O I Lhou, Tobiah ngo Sanballat pama no hitoi shike ghenguno pama kümsülu lo, eno tungkupliu Noadiah ngo tungkupmi khunoqo I shikümsa niye shikeno panongu ghi kümsülu lo.

Akupuwu Shiqhive

¹⁵ Atsala lhopungu akiniu, Elul qhi atsala muku apunguni no akupuwu mlaqhi luve.

¹⁶ Kughou ni ghümi kümtsü no hi chilu keno, shiye ni hokümxa lo küami kümtsü msave eno panongu nguagha ye shishe thibuive, kughengu akümla hi ye Alhou kukuphu lono kepi panongu no ithive.

¹⁷ Tinguno alau, tipa ghuloki lo Judah lo sakiphemi ngo Tobiah dolo yesü kutomo yekili cheke.

¹⁸ Kughengu Judah lo timi kutomo no pa lau tushoqhi püae, kughengu pa ye Arah nu Shecaniah makishiu, eno pa nu Jehohanan no Berekhiah nu Meshullam nonga luke.

¹⁹ Timiqo no I zülono Tobiah kümla kivi ghili ghi piche eno I no pikeu tsaqo pa vilo piche. Ikehu Tobiah no I shikümsa niye yesüqo I tsüpuwu cheke.