NEHEMIA 5 - Sumi Naga CL (Re-edited) Bible (BSI)

Kumlhomi Qhaküsü Lakhave

¹ Timi kutomo no panongu nipu sasü pano thiküzümi Jewmi shou igha ipeghive.

² Kughengu khami no pi, “Ni kibolomi ye kutomo anike ningu pelo athi ithulu pelo, tishianguno nino chuno xünie.”

³ Khami ishi pi kemi ghi ae, “Püqümiye ghenguno ningu ye ni luza ngo atsailu eno akiqo pesü atheli shi athi luvae.”

⁴ Kütami ishi pi kemi ghi ae, “Ningu ye ni ki-alu ngo atsailu zame akükau tsünike pisa na püani.

⁵ Ni phimpi ghi ni thiküzümi phimpi toi, ni tianuli ghi pano tianuli toi, ikeghi ningu ye ni tianuli pelo aqüaxe shive anipe eno ningu ngaqo khami ye aqü-axe lo jesüvae. Ikemu ningu ye tipaqo mjochileni keu küka kühavae, kughengu ningu lu eno atsailu kümtsü timi kütami no lukhavae.”

⁶ Kughou panongu no ighamku akeu eno atsa hipaqo chilu keno, ni ye ighono amlo ideve.

⁷ I no kümsü tsaqüi luve paghi no sakiphemi ngo hiyampemi nguku ghi pi, “Nongu ye kushiye pütüta thiküzümi launo akighishe luani kea?” Eno I no mishi hoho lakhi kusü no panongu ngukube,

⁸ eno pi, “Tolukivi thaqhü ningu ye ni thiküzümi khunoqo shiye kütami lau jesüve keno sachile ighi ani, ikemu nongu ye no thiküzümi ghi jesüve ani, tishianguno ningu lau jesüve peniye ke!” Panongu ye inaqhoive eno kiumu pimlave.

⁹ Ikehu I no pi, “Nongu no kiu shi ani keno küqü ani. Ni ghümi no ni thaigha pemoni ke nongu ye ni Lhou sükümsa lono chekepue.

¹⁰ Itaghi, ni eno I thiküzümi ngo I qemi no timiqo pisa ngo athi pünatsü ani. Ningu akighishe lukeu lhoaye hipau qhiveni nolo.

¹¹ Ishi tsala lono pano lu, atsailu, Olive ghutu, eno aki tsüchileve lo, eno panongu launo pisa, athi, atsaizü, eno thazü lo akighishe lupüa keqo tsüchileve lo.”

¹² Panongu no pi, “Nino hipaqo tsüchileve no pano launo kiumu lumoveni. Nono pike toi nino shini.” I no achinemi kuno sakiphemi pelo panongu no piveke toi shikupu penike tushoqhipe.

¹³ Ni ghi I phishe sükini ghi pi, “Khuu no ashoqhi hipau pemoni keno, pa ki eno pa kümla lono Alhou no hitoi pa kilhe phepe abokümsa shive peniu.” Hohomi kümtsü no “Amen” ipi eno Alhou sheqhe. Eno timiqo no panongu tsa shikupuve.

Nehemiahw Tsükini

¹⁴ Judah yeghi lo I pesü ampe chighikini angh shi kelo, ti ye akükau Artaxerxes yepe mpe amkuu lono shighi akiniu kutolo, ni eno I thiküzümi khumu angh no ithulu küzüpu shi akeu chuqupu chumoe.

¹⁵ I züu angh shi ighi keqo no timiqo shou shishe amakho bepüaghi eno panow tsalakipe chuqupu ghenguno timiqo launo atsala lo ghükayi ahu tüxa lu cheghi. Panongu qemi thotsü timiqo qhasüpe ache. Ikemu ni ye Alhou sükümsa ghenguno titoi shimoe.

¹⁶ Ni ye akupuwu kümla lo ighono amlo tsüqhiyi shi mla, ningu ye kiu yeghi mu lumoe, eno I qemi kümtsü no akümla lou hekütsüpe ngoke.

¹⁷ Tinguno alau hokümxa lo shiyeqo no ni pütsani ye ighi keu sümono I ghulhu-a lo Jewmi ngo hiyampemi pano 150 no chuche.

¹⁸ Tsalakipetsü ni ye amshitsü lakhi, ambe tsügho, eno aghau shi kuto, eno atsala chighighi lo atsaiji jeli kümtsü kupukuno shi kutoche. Ikeghi ni ye kiumu angh no ithulu küzüpu chuqupu khumoe, kughengu ti ye timiqo ghenguno ighono amakho shi acheke.

¹⁹ O I Lhou, I no timi hipaqo ghenguno mla tsükeu I kivi kümsülu tsülo.