NEHEMIA 4 - Sumi Naga CL (Re-edited) Bible (BSI)

Akümla Mjochile

¹ Kughou ningu no akupuwu kümla shithuvae pi Sanballat no chilu keno pa ye amlo ideve eno Jewmi thaigha junuqhi.

² Pa thiküzümi ngo Samaria ghüshimi zülono pa no pi, “Hi miqemlei kemi Jewmi ye kiu shi anie pi kümsü ania? Panongu ye pano sala shiqhe niye ani keo? Panongu ye aghashi nani keo? Panongu ye atsala lakhi lono shiqhilu nani keo? Panongu ye xine-xigha kiptia lono aki kishi tu mlaphelu nani keshea?”

³ Ammonmi Tobiah no pa phivilo puthugho no pi, “Iyei, panongu no kiu kupuwu mla luni keapi, aghalo tsü nomu iku aye atu kupuwu tulaqhive tsü nani!”

⁴ O ni Lhou, inilo kughengu ningu thogha ani. Panow thokügha no pano kutsü shou iku pelo, pano pükaqhive pelo eno panongu ye akughu shisü inaghami yeghi lo wuve pelo.

⁵ Pano kipimi pevetsü kevi, pano xine kümsümave tsü kevilo, kughengu pano no akümla kishimi zülono O pelo amloide ani peke.

⁶ Tishino ningu ye akupuwu mlauve. Akupuwu kümtsü akiqhelau tüxa kuto shiqheve, kughengu timiqo no aghüiloqhiyi mla ake.

⁷ Ikemu kughou Sanballat, Tobiah, Arabmi ngo Ammonmi eno Ashdodmi no ningu no Jerusalem kupuwu kümla lo ajuiche akeu, eno akupuwu hephove keqo mekhave akeu chilu keno, panongu no ighono amlo ideve.

⁸ Panongu kümtsü ighi no Jerusalem lenike kughu eno kübangü keu süghi tsüniye kuchughu.

⁹ Ikemu ningu no ni Lhou vilo inikhu eno putho pucho panongu jukuto nike aghukhemi qhive.

¹⁰ Judah lo ishi piuve, “Ape kimshi puche keqo küka ye hau cheae. Xine-xigha kutomo ani. Ningu likhi ye akupuwu shiqhe kithe luni chemoe.”

¹¹ Eno ni ghümi no pi, “Nino panongu dolo iloghi no pithive püzü akümla lakhave tsü moke kutolo, panongu ye ningu ithimo nani momu ithulumo nani.”

¹² Tipa ghuloki lo Jewmi khunono aghümi phivilo xü akeno panongu no aqha kümtsü lono ighi no ghuthu chighi piqi ningu vilo pi, “Nongu ye ningu lau ideighive lo.”

¹³ Ikehu I no azütakikihi, angu, eno shexilika timiqo tsüno akupuwu thiu alagha kiqi lono akümla shikhamo no akeqo lo ngope.

¹⁴ I no jukuto apüzü ithu no sakiphemi eno hiyampemi ngo timi kümtsü vilo pi, “Panongu msa kevilo. Ampeu khuu no kije eno akümzapu keno, Pa kümsü lulo eno nongu thiküzümi, no tianuli, anipu, eno no kungo kiqo ghenguno aghü shilo.”

Itaghi Akümla Huthuve

¹⁵ Ni ghümi no nino pano mqü ithivae pi chiluve eno Alhou no pano kukughuqo hexave tsüapi ithive kethiu ningu kümtsü no akupuwu kümla lo ide wuve.

¹⁶ Tinguno tilauye I qemi tüxa no akümla shi eno tüxa ye angu, azüto, eno shexilika pesü kheluve. Eno sakiphemi no Judah laghami

¹⁷ khunoqo akupuwu mla kithe akeno tipaqo kuphue. Tinhemgha pekishe akeqo no au tüxa no khape eno tüxa ye aghünanu pesü mlae.

¹⁸ Akümlami ghi pütüta chita lo azütakikihi xipue. Timi khuu no afuko ighani ye akeno pa no I gholo ae.

¹⁹ I no sakiphemi eno hiyampemi ngo timi kümtsü vilo pi, “Akümla ye kije kushuo qhawovae eno ningu ye akupuwu no ningu shokhape lakhi no lakhi launo putosü ani.

²⁰ Ikehu khile no afuko ghügha chiluni keno, tilau poighi lo. Ni Lhou no ni ghenguno aghü shitsü nani.”

²¹ Ikehu tsala kipetsü tsütho kemtsa kijiliu ayepu ipeghike kutolo ningu ye tüxa no akümla shi eno tüxa no angu pesü kheae.

²² Tipa ghuloki lo I no timiqo vilo pi, “Kümtsü no pa qemi sasü putho loye Jerusalem lo ngove lo, tishianguno panongu pelo putho lono akhemi shi eno puchou no mla penie.”

²³ Ikehu ni eno I thiküzümi, I qemi, I khemi khumu aphimini xaqhi moe; ningu kümtsü aghünanu ningu u ajeu pesü ngoe.