NEHEMIA 2 - Sumi Naga CL (Re-edited) Bible (BSI)

Judah lo Nehemiah Puwu

¹ Akükau Artaxerxes yepe mpe amkuu eno aqhi abidiu lo kughou atsaiji pa zülo pewo qhitsü keno, I no atsaiji lesüpe akükau tsüe. Ni ye khilemu pa zülo I mloküsa piye mphie.

² Pa no I vilo pi, “No ye küsükini shiamo, ikemu kushiye amlo saqhiyi ani kea? Hi ye kütau kumono amlo ime ani.” Ni ye ighono msave.

³ I no akükau vilo pi, “Akükau pelo axüshu peniu! Ni ye kishino I puasüqo kumo kuqho phughi ixapinyi ani eno tipa khaghoqo pitileve apüzü amlo samono ngo luni kea?”

⁴ Akükau no pi, “No ye kiu qhüiniju ani kea?” Tileno I no kungugha Lhou vilo inikhu.

⁵ Eno I no akükau vilo pi, “Akükau no Judah lau amloqilu aye eno o qeu no o mlo chulu aghi aye, I puasüqo kumo kuqho phughi, Judah lo I puwu no I pelo shiqhe kithelu pelo.”

⁶ Akükau no I vilo pi (kükaliu ghi pa phivilo iqa ae), “No ye ado khitohi ghenguno wuve nani eno kughono ideighi nani kea?” Kughou I no kihiküthado pa tsüve keno, akükau no pulove tsü.

⁷ Tishino I no akükau vilo qhüiniju, “Akükau pulou shi aye, Aghoki Kukuu ghakhuqo lo angh tsükepu yesü I tsülo, tishianguno I pelo kathasü Judah lo wulu peni,

⁸ eno akükau ghasü kheu Asaph lau ghi yetsülo, tishianguno pa no achineki hukikha khagho, aphughi kupuwu, eno I no ngokepu ki ghenguno akika shikulupu sü I tsüpenie.” Akükau no I no khukeqo pulove tsü, kughengu Alhou u no I shou ake.

Jerusalem Kupuwu Xuju

⁹ Akükau no ghüshimi kijemi khami gholono khurshimi aqo lakhi I gholo puwu. Eno I no akükauw yesü pesü Aghoki Kukuu ghakhuqo lo angh akeqo tsüe.

¹⁰ Ikemu akükau qemi Horonmi Sanballat ngo Ammonmi Tobiah pama no timi khami Israelmi kivipu ghenguno mlani ye ighi ani pi kelo ighono amlo qimove.

¹¹ Tishino ni ye Jerusalem lo wuno atsala küthü tile ngove.

¹² Alhou no Jerusalem ghenguno kiu mla kepu ilolo müzü sütsü keno ni ye khuu vilomu pimoe. I no zübumta lono ithu I gholo timi khami sasü khalau ipe. I no sache keu khurshi kumo aye, lhoxü kütau lakhimu kühae.

¹³ I no aphughi qhive no Akhila Khagho vechesü Dragon Züpuki lono Xine-xigha Khagho lo wuno aphughi kupuwu ipopinyive keqo eno ami no pitive keu khaghoqo xujue.

¹⁴ Tishino I no Azüpuki Khagho ngo Akükau Zükikhe lo wu, ikemu tinguno tilau ye I no sachekeu khurshi ghenguno wukepu la kühave.

¹⁵ Tileno I no putho lono akhila lono akupuwu juwu eno xaidesü Akhila Khagho lono aphughi lo ideilove.

¹⁶ Tile kijemi ye khumu I no khila wuve eno kiu shi akeno mthae. Tikutolo ni ye Jewmi, achinemi, kijemi, eno akümlami vilomu kiumu pimono ae.

¹⁷ Tile I no panoqo vilo pi, “Ningu ye kiu veküsa lo ani keno julo, Jerusalem ye ixapinyi ani eno tipau khaghoqo ye pitileve no ani. Ighilo, ningu akupuwu shiqheni, tishianguno ningu kukujopu ye tave nani.”

¹⁸ Akivipu ghenguno Alhou no kishi I gholo ani, I kuphu eno akükau no I vilo kiu pi keno, I no panoqo vilo pi. Ikelo panongu no pi, “Ningu ithu no shiqhe pukuni.” Ikehu panongu no pano u shikumto no akümla kivi shinike huthuve.

¹⁹ Kughou Horonmi Sanballat ngo Ammonmi aqeu Tobiah eno Arabmi Geshem pano küthü no chilu keno, panongu no ni junuqhi eno thaigha ghi pi, “Nongu ye kiu mla anie pi ania? Nongu ye akükau hebide ani keshea?”

²⁰ I no khochile, “Kungugha Lhou no ni pelo tolupe nani. Ningu pa qemiqo no ithu no mla nani, ikemu nongu ye Jerusalem lo amheghi momu achipiu momu khaghi no pekishe ighikeu saje kiumu kühae.”