NEHEMIA 13 - Sumi Naga CL (Re-edited) Bible (BSI)

Ashekhau Shikikithe

¹ Tipani panongu no Moses kaku lono timi kümtsü zülo phisü. Tile Ammonmi ngo Moabmi ye khilemu Alhouw kuküsü hoho lo iloghi pemo nike yepüaghi keu ithulue.

² Kughengu panongu no asho ngo azü pesü Israelmi saluke kumono Balaam piqepe Israelmi ghushoe, ikeghi ni Lhou no ghukusho pesü kükümgha shive tsüe.

³ Kughou Israelmi no tipau yezah phisü keu chilu keno, panongu no inaghami kümtsü pano gholono ikhipheve.

⁴ Hipa züu achineu Eliashib, achineki lo anhemgha kiqhi-a jukükütsüu eno Tobiah sasü kütshükime akeu huno

⁵ Tobiah ghenguno achebo lakhi achineki lo kutotsü. Ti ye inahuu athi kümllagho, müsüghüta, abohuqo, athi, atsaizü, eno thazü chighi saje sükeqo pekütsü pesü azakütsü lono Levimi, alephemi, khagho khemi, eno achinemi ghenguno qhiche keu chebo ke.

⁶ Tishi akelo ni ye Jerusalem lo kühae, kughengu Babylon kükau Artaxerxes yepe mpe shighi akiniu lo ni ye pa lau wuveke. Ado hami thiu I no akükau vilo azah khuve no

⁷ Jerusalem lo ideighi. Tileno Eliashib no Tobiah pelo Alhou kilo ngo penike achebo kuto tsükeu lono küsakügha shive keu chilue.

⁸ Ni ye ighono amlo ideve eno Tobiah nhemgha kümtsü khalau vepheve tsü.

⁹ Tishino achebo tipau shikimtheve penike azah tsüke toi panongu no mitheve eno I no Alhou kilo abohu ngo athi kümllagho eno müsüghüta kümtsü tile qhikitheve.

¹⁰ Levimi ghenguno achuqupu pekütsü chekeu panongu tsümove keu lono Levimi ngo alephemi achineki lo mla chekeqo ye pütüta lu chiwuvae pikeu ghi I no chilu.

¹¹ Tighenguno I no achineki lo ampemi sakiyi no pi, “Kushiye Alhou ki kughuchove ani kea?” I no panongu kümtsü sachile ighive no pütüta-a lo mla penike qhive.

¹² Tithiu Judah qha kümtsü lono athi ngo atsaizü eno thazü lo chighi saje pesü achineki lo pekükütsü chebo lo süuve.

¹³ I no achineu Shelemiah, Ayezah kiyeu Zadok ngo Levimi Pedaiah pano küthü pelo pekükütsü chebo shou akini pighiu shivepe, eno Mattaniah nu Zaccur nu Hanan pelo akukuphuu shivepe, kughengu panongu ye pükhübekulu, pano kümla ye pano thiküzümi lau achipi lono chuqu-kusho kijeni keue.

¹⁴ Hipaqo ghenguno I kümsülu lo, O I Lhou, eno I no akümla kivi I Lhou ki ghenguno mla püakeqo ngo Pa qe huthu keu pühave tsü kevilo.

¹⁵ Tipa ghuloki lo Judah lo timiqo no Sabbath tsala lo atsaithi lono atsaizü qophe aghikeu I no ithulu, eno athi amoqhepe qhikeqo ngo atsaizü, atsaithi, mubuthi, eno kütau thimeqo panow khurha pipe no Sabbath tsalani no Jerusalem lo pewu cheghi. Ikehu I no Sabbath tsala loye kiumu jemla kepi lakhave.

¹⁶ Tyremi aphughi lo xüküami ghi akha ngo tinhemgha jeli pesü ighi no Sabbath tsalani no Judahmi lau je cheghi eno Jerusalem lou ghi je aghive!

¹⁷ Tighenguno I no Judahmi sakiphemi sakiyi eno pi, “Nongu ye kushiye axine kümla hi shi ani kea eno Sabbath tsala shipixi ani kea?

¹⁸ Nongu puasüqo no hitoi shino Alhou no amhekiqi hitoi ningu lau eno aphughi hipau shou süghi ke kumo? Itehi ye nongu no Sabbath tsala shipixi keu vecheo aloghu alau Israel shou süghi ani.”

¹⁹ Sabbath tsala zülo, avelau khetsünhe ilove kemtsa I no khaghoqo khavepe eno Sabbath tsala puwo mphi kutolo khaqhi pemo nike azah tsüve. Sabbath tsalani ye kiumu pesü iloghi pemo nike I no I qemi khami khaghoqo lo qhive.

²⁰ Ikelo ghuthu lakhi kini ye alhikishimi ngo anhemgha jeli je chekemi ye Jerusalem khalau züve.

²¹ Ikemu I no panoqo kütüghü no pi, “Nongu ye kushiye akupuwu khalau züani kea? Tsala nongu no itaghi hitoi shi aye, I u nongu shou ikughi niae.” Tinguno tilauye Sabbath tsalani ye panongu ghi ighi move.

²² Tishino Sabbath tsala akimthe shi pini nike I no Levimi vilo pano shikimtheve eno wuno khaghoqo kheluve lo pi azah tsü. O Alhou hi ghengu ghi I kümsülu tsülo eno Ow iqemokeu kikimiye vecheo I pükhape qhitsülo.

²³ Tipa ghuloki lo Judahmi kutomo no Ashdod, Ammon, eno Moab limiqo sasü külave keu ghi I no ithulu.

²⁴ Eno pano tianuliqo tüxa ye Ashdodmi tsa piuve eno Judah tsa ye pimla, ikemu pütüta tsa likhi pi aghi.

²⁵ Ikehu I no tipaqo ighono sakiyi no panongu ghushoqhi, eno khami ye heqhi no asa phivetsü. Tishino I no panongu vilo Alhou je lono ashoqhi shipe, “Nongu ye khilemu nongaqo pesü pano pumi lau küla puwo moni eno nongu nu momu nongu ghi pano ngaqo sasü akibo moni.

²⁶ Israelmi kükau Solomon pelo axine shivepe keu ye inaghami totimi no ke kumo keshea? Shiye kutomo dolo ghi, akükau pa toike kühae eno pa ye Alhou no kimiye kütü kehu Alhou no pa pesü Israelmi kümtsü shou akükau shipe ke. Ikeghi inalimi totimi no pa thotsü axine shivepe.

²⁷ Tishiaye ningu ye nongu tsa pape no axine hi kümtsü shini keshea, eno inalimi sasü külakupu shikeu vecheo ni Lhou pishiqhini keshea?”

²⁸ Achinetou Eliashib nu Jehoiada nuli dolo lakhi ye Horonmi Sanballat makishiu, Ikehu I no pa hapupove.

²⁹ O I Lhou, panoqo kümsülu lo, kughengu panongu no achinemi kümla ngo achinemi eno Levimi sasü puloshoqhi shikeu shikuchhubevae.

³⁰ Hitoi I no thokha inaghami launo panongu shikimtheve, eno achinemi ngo Levimi kümlapu pütüta kümla pekithipe qhivetsü;

³¹ I no asü kümllagho ngo amsüu xathi küma ghenguno kishekulu shi kutove tsü. O Alhou, akivi ghenguno I kümsülu tsülo.