NEHEMIA 1 - Sumi Naga CL (Re-edited) Bible (BSI)

Jerusalem lono Atsape

¹ Hacaliah nu Nehemiah tsa. Akükau Artaxerxes yepe mpe amkuu lo, Kislev qhi lono, I no Susa phughitou lo ake lono atüqhüdo hipaqo sholu.

² I thiküzümi lakhi Hanani no Judah lono timi amqo khami sasü ighi. I no panongu vilo Jerusalem ghili eno Judahmi pojolu keqo ngo hakiphi sawuve keu lono xülu keqo ghili inijue.

³ Panongu no I vilo pi, “Hakiphi sawuve keu lono xülu no aghakhu lo ideighi keqo ye shishe aghime eno akukujopu shi ani. Jerusalem kupuwu ye kütsavae eno paw khaghoqo ye ami no pitivae.”

Nehemiah Kighini

⁴ I no tipa tsa chilu kemtsa iqi iqa no qauve eno atsala kutomo mloqave, I no tamo kümvü püzü kungugha Lhou lau inikhu.

⁵ Eno I no pi, “O Ampeu, kungugha Lhou, No ye akighiche eno akughushu Lhou, khunono O zakütsü pecheni keno Nono Ow puloshoqhi eno iqemokeu kikimiye piye cheni.

⁶ O qeu no akighini shi akeu chilutsü penike, O kini kughope tsaqüi inilo eno o nhethi tsükhope ngo tsülo, kughengu I no O lau putho pucho O qemi Israelmi ghenguno inikhu ani. Eno I no piphe anike ningu Israelmi no pimivae eno O zülo axine shivae. Ni ampi eno I puasüqo ghi axine shivae.

⁷ Ningu no O zülo kixikila shivae eno Nono Ayezah ngo akhuaye khikhi O qeu Moses vecheo ni tsü keno tipaqo pemove ke.

⁸ Nono O qeu Moses vilo hitoi azah tsükeu kümsülu lo: ‘Tsala nongu no I lau amikucho shimove aye, I no nongu pesü kütami shiye dolo kutholeve nani.

⁹ Ikemu nongu no I lau tsüghü ighi no I zakütsüqo pelu aye, nongu dolo hapheve kemi no atsütsü shekha lo wuve aghi namu, tilauno I no panongu sachile ighi nani eno I je pesü tile apeniye kisheluve ke-a lo panongu hekütsüpe qhinani.’

¹⁰ Panongu ye O küka kije lono xaphelu kemi O qemi eno ow timiqo ke.

¹¹ O Ampeu, O kini kughope O qeu kighini chilu tsülo, O qemi kütami O je sümsa chekemi kighini ini tsülo, ishi no ni O qeu lau tokulu puwu tsülo, eno timi hipau zülo ow kimiyekini I tsülo.” Ni ye akükau jukhu kipeu shi cheke.