NAHUM 3 - Sumi Naga CL (Re-edited) Bible (BSI)

Nineveh Haküsapu

¹ Ajikuqo mishighüna haküsapue, akimki eno aküpka no chhitoi— thechu keu no ashekha kühae!

² Akighikipili no hekeu ngo kuluho no qhoqhoshi ilu, khurshi ngo khurkulu no kokoshi!

³ Khurshimi no kite, azütakikihi eno angu no kulo phaphashi, ghiqhive kemi no aqokitikhi jehi, akumo no amoqhe, akithi kumo no ashekha kühae— timiqo no akumo küpxalu!

⁴ Hi kümtsü kütüqhalimi loji no jukivi eno akithipu gha pesü kütüqha keu ghenguno ke, li no kütüqha keu eno züküghüzü keu gha pesü shiye eno timiqo thechuvae.

⁵ Julo, Ni ye o mjochile ani, ipi aqokitikhi Mpeu no sheshu, o mini xapukupe o gi nha tsüni; I no shiyeqo pelo o phikümsa ithulu peni eno kükaqhaqo pelo o kukujopu lo jupuku peni.

⁶ I no xine-xigha o shou lepukuni, o jukünatha peni eno kutuxoxo o jupe nani.

⁷ Eno o ju akeqo kümtsü no o launo tsüghüve no pi nani, “Nineveh ye ixapinyivae; khuu no li ghenguno mloni kea?” Ni ye o lokughuno tsüni kemi khile phuwuni kea?

⁸ No ye Nile phivilo achekeu, azü no bothape achekeu, azüghi no aliwo shipe achekeu Thebes nguno akiviu keshea?

⁹ Cush eno Egypt ghi kihikütha kühano li kumtopu lakhi shiche; Put ngo Libyami ye li kukuphumi shiche.

¹⁰ Ikemu li ye haküghütsüve kemi shive no akughu lo sawuve; li nga kughunuqo ye alapa kümtsü lo aleqhi shi heqhi khave tsüe; liw gihuküzümi ghenguno asaqhi, eno akhotomiqo ye ayikichhe no tshü sawuve.

¹¹ No ghi shomzüve nani; eno no ye itshüuve nani; o ghümi lau sükusho phuwu nani.

¹² Ow sükusho-aqo ye mububoqo toi sükini kelo mubuthi amsüu no ikiqi chu akeu kichi lo iloveke toike.

¹³ Julo, ow ghüshimiqo ye topumiqo toike. O yeghi lo khaghoqo ye o ghümi lau khaqhi püani; ami no o khaduqo pitive tsüae.

¹⁴ Lenike ghenguno azü shophe lo; o liwoqo shikumto lo; aghani-a lo wulo; achepo qodalo; pititu mla chekeu bohu kuto lo!

¹⁵ Tilauno ami no o pitiqhive nani; azütakikihi no o micheve nani. Tino tülhaqu toi o munove nani. Tülhaqu toi eno atikha toi nongu likhi nongu kughuko lo!

¹⁶ Ow kilhikishimi nono atsütsü lo ayepuqo nguno akichiu kughukoe. Tülhaqu no pa chishibo xakhope yewuve.

¹⁷ Ow kükapumiqo ye atikha toi, o yezah kükütsümiqo ye tülhaqu loji toi akumko tsala lo aghutu kuptu lo ake toi— kughou khetsünhe ipeghi keno, panoqo ye yewuve; panongu ye khile ani keno khunomu mthae.

¹⁸ O mbekhemi ye zü auvae, O Assyria kükau; ow yepemi ye ingu auvae. Ow timiqo ye naghutoqo lo hakiphivae khunomu panoqo hekütsüni kemi kühae.

¹⁹ O ghüzaku khatsüni kemi kühae; o zaku ye akithipu shi anie. O sütsa chilu kemi kümtsü no panoqo u kukhu o tsü ani. Kughengu ow ashe küha keu küsakügha no khuu shou ikughimo keu ania?